ኦሮꬅ ጫቆ ፍልጲሶሳ 1

ጳዉሎሳ ፍልጲሶሳ አሳይስ ጻፌዝ ኪታ

ገሎ

ጳዉሎሳ ፍልጲሶሳ አሳይስ ጻፌዝ ኪታይ ጻፍንቴዛይ፥ ኦሮመ ቢታ ማቃዶና አዉራጃ፥ ፍልጲሶሳ ቢታ የዝ ዎሳ ኬꬃይስ። የ ዎሳ ኬꬃይ ጳዉሎሳ አዉሮፓ ቢታ ቲናቲ ኤሴዝ ዎሳ ኬꬃቶ። Ꮊ ኪታይ ጻፍንቴዛይ፥ ጳዉሎሳ አች ኬꬃ የዝ ዎደ ሀራ ዎሳ ኬꬅ ኦሶ ኦꬅዝ አማንዛ አሳይ ኤዛ እጼዝ ዎደኔ ፍልጲሶሳ ዎሳ ኬꬃ ደንዴዝ ዎርዶ ትምርተ ባጋር ኤ ዎዝናይ ጋመ አዛኔዝ ዎደ። ዝን፥ ጳዉሎሳ የሱስ ክርስቶሳ ሚንꬂ አማንዛ ግሾስ Ꮊ ኪታይድ ቆንጨ በንትዛይ፥ ኡፋይስኔ ፎሎ አማንንቶ። ፍልጲሶሳ የዝ ጋመ አሳይ ኦሮመፕ ድእንቲ የኤዝ አስታ። ኡንቲ ኦሮመ ቢታስ ምጭንትዛኔ ሎእꬂ ናግዛ። ኡንታፕ ፐታይ ፐታይ አማኖ ግሾስ ፋ ቢታ አሳይር ባይእንቴዛ። የ ባይእꬃይ ኡንታል አፋ መቶኔ ማንቆትꬅ ከኤዛ (ሀዋ። ኦ። 16:20-21)።

ጳዉሎሳ Ꮊ ኪታ ቲን ጻፎዳይ ጋርክ ኡዴዛይ ኤ መቶ ዎደ ኤዛ ማዶዳይስ ፍልጲሶሳ አማንዛ አሳይ ማዴ ኤዝስ ዳኬዝ ግሾ ኡንታን ጋላቶዳይሲ። ኤዛል አፋኔ ኡንታል አፋ ዱማ ዱማ መቶ ሄሌዝባዝ ማቅኮካ ኡንቲ ሚንጎዳይ ጋርከኔ ኩንꬅ አማኖ አማንንቲ የዞዳይ ጋርክ Ꮊ ደንጌዝ ኦጋይር ኡንታን ምንꬃꬅዛ። ኡትራኔ ጋይሮ አሺ፥ የሱስ ክርስቶሳ አሽከትꬃር ኡንቲ ኩሞድ ጋርክ ሚንꬂ ኡንታን አካክስዛ። የሱስ ክርስቶሳር ዎላ ደንጌዝ ደአይ ጾስ ኣꬎ ኬሃትꬃፕ ፑልቴዛኔ አማኖር ኡንቲ ኤኬዛይፕ አትን አይሁድታይ ወጋ ፖሎር በንተካዛና ኡንታን አካክስዛ። የሱስ ክርስቶሳር ዎላ የዝ ኡባይስ ጾሳይ እንግዛ ሳሮኔ ኡፋይስ ኡንትስ ጻፍዛ።

Ꮊ ኪታይ ኤርንትዛይ ኡፋይስ፥ አማንንቶ፥ ፐትፐትꬅኔ አማኖር ሚንጊ የዞድ የስ ቆንጭሲ ቤዝዛ። የይል አፋ ጉጂ፥ ጳዉሎሳ ፍልጲሶሳ ዎሳ ኬꬃይስ ቃꬍዛ ግታ ቃꬋ ቤዝዛ።

ፍልጲሶሳ ኪታይ አይኬዝ ቆፍታ

ገሎ 1:1-11

ጳዉሎሳ የዜዝ የሳ 1:12-26

ክርስታነ የሳይ ኣዝሶ 1:27—2:18

ጽማቶሳስኔ ኤጳፍራድቱሳስ የዝ ቆፋ 2:19-30

ሞርክታይፐኔ ኢትታይፕ ናግንቶ 3:1—4:9

ጳዉሎሳኔ ፍልጲሶሳ አማንዛ አሳይስ ሺሼዝ ጋላታኔ ዞረ 4:10-20

ሳሮꬅኔ አንጆ 4:21-23

1 ክርስቶስ የሱሳስ ማቄዝ፥ ፍልጲሶሳ ካታማ የዝ ዎሳ ኬꬅ ጭምታይስ ዳቆንታይስኔ የሱስ ክርስቶሳር የዝ ጌሽታይስ ኡባይስ የሱስ ክርስቶሳ አይለ ማቄዝ፥ ጳዉሎሳፐኔ ጽማቶሳፕ ኪትንቴዝ ኪታ።

2 ኑ አዳ ኑ ጾሳይፐኔ ጎዳ የሱስ ክርስቶሳፕ ኣꬎ ኬሄትꬅኔ ሳሮትꬅ ይንትስ ማቆ።

ጳዉሎሳ ጋላታኔ ዎሳ

3 ታኒ ይንታን ቆፕዛ ዎደ ኡባይድ፥ ታ ጾሳ ጋላትዛ። 4 ታኒ ይ ኡባይስ ጾሳ ዎስታር ኡፋይሳር ዎስዛ። 5 ይ ብንፕ Ꮊይኖ ሄሎዳይስ፥ ዎንግለ ማርካትታር ታር ዎላ ማቂ፥ ታና ማዴዝ ግሾ ታ ጾሳ ጋላትዛ። 6 ይንታር ሎኦ ኦሶ አይኬዝ ጾሳይ፥ የሱስ ክርስቶሳ ማቅዝ ጋላሳይ ሄሎዳይስ፥ ፖሎዳና ታ ሎእꬅ ኤርዛ።

7 ታኒ አቻ ገሎዳይፕ ቲናኔ Ꮊት አቻ የዝንካ ዎንግለ ናጎራኔ ዎንግለ ሚንꬂ አይꬃር ጾሳይ ታስ እንጌዝ ኣꬎ ኬሄትꬃ ይንትካ ታር ሻግንቴዛ። ይ ኡባ ዎደ ታ ዎዝና ጋንጨ የዛ። ታኒ ይንትስ ኡባ ዎደካ ሎኦ ቆፕዛ። 8 ታ ይንታን ኡብታ የሱስ ክርስቶሳ ሲቃይር አብ ጋርክ ላሞትዛኮ ጾሳይ ታስ ማርካ።

9 ይ ሲቃይ ቱማ ኤረትꬃራኔ አካካር ጉጂ ጉጂ ድጮድ ጋርክ ታ ጾሳ ዎስዛ። 10 የይካ ይ ሎኦ ባዝ ሻኪ ኤሪ ክርስቶሳ ማቂ የኦዳር ጌሽታኔ ቦርንቶዝታ ማቃዳይ ጋርከ። 11 ይ የሳይ የሱስ ክርስቶሳ ባጋር በንትዝ ጽሎትꬅ ኣፈር ኩሚ ጾስ ቦንቾኔ ጋላታ ክእዝታ ማቃዳ።

ጳዉሎሳ አጭንትꬃይ ዎንግላይ ዳልጎድ ጋርክ ማዴዛ

12 ታ እሹንꬆ፥ ታና ሄሌዝ ባዛይ ዎንግለ ዳልጎድ ጋርክ ቱማ ማዴዛና ይ ኤሮዳይ ጋርክ ኮይዛ። 13 ታኒ ክርስቶሳስ ኦꬅዝ ግሾ አጭንቴዛና፥ ካት ካራ ናግዝታይኔ Ꮊንክታይ ኡቢታይ ኤርዛ። 14 ታ አቻይ ባጋር ኑ እሽታይፕ ጋምታይ ጎዳይል ሎእꬂ አማንንቴዛ። የይ ግሾ፥ ጾሳ ቃላ ያሻ ባይꬅ ቲናሳይፕ ኣꬂ ሚንጊ ኦዶድ ጋርክ ኡ ምኖትꬅ ደንጌዛ።

15 ማቆዝን፥ ፐታይ ፐታይ ቅናተራኔ ፓላማር ክርስቶሳ ባዝ ኦድዛ፥ ዝን Ꮊንክታይ ሉለ ዎዝናፕ ኦድዛ። 16 ሉለ ዎዝናፕ ኦድዝታይ፥ ጾሳይ ታስ ዎንግለ ናጎ ኦሶ እንጌዛና ኤርዛ ግሾ ሲቆር ኦድዛ። 17 ዝን የይትታይ ክርስቶሳ ባጋ ዎብꬅ ሳባክዝታይ ታ አቻይል አፋ ሀራ መቶ ኮኦዳይስ ፋና ዶሲ ክርስቶሳ ባዝ ኦድዛፕ አትን ቱማ ዎዝናፕ ኦዶያ።

18 የ ኡባይድ ታና ኡፋይስዛ። ቱማ ዎዝናር ማቅን ዎይ ዎርዶ ዎዝናር ማቅን የ ኡባይር ክርስቶሳ ሳባክንትዛይ የይ ታና ኡፋይስዛ። ማ ቲናስካ ታና ኡፋይስዛ ባዛይ፥ 19 ታኒ ይ ዎሳራኔ የሱስ ክርስቶሳ አያና ማደር አቻፕ ከዞዳና ታ ኤርዛ ግሾስ ታና ኡፋይስዛ። 20 ታ ግታ አሞትꬃራኔ ኡፋይሳር ታ ኦሶ ኡባይራ ታ ዬላታማና ናግዛ። ዝን ኡባ ዎደ ኦꬅዛይ ጋርክ፥ Ꮊተካ ታኒ ፓꬅ የዝን ዎይ Ꮊይቂን ያሽተካዛር ታ ኩንꬅ አሰትꬃይድ ክርስቶሳ ቦንችንቶዳ ግ ምኖትꬃር ኦድዛ። 21 ታስ ደኦ ጉሳይ ክርስቶሳ ኣዳስ የሰ፤ ማ ታ Ꮊይቅኮካ ታስ ኡሳ ሎኦ። 22 ዝን ታ ፓꬅ የዝኮ ኣፈር በንትዝ ኦሶ ኦꬆዳ። የያ ማቅኮካ ፓꬅ የዛይፐኔ Ꮊይቆፕ ኣያ ዶሮዳዛኮ ታስ ኤርንቶያ። 23 ታኒ Ꮊ ናምእታይፕ ኣያ ዶሮዳዛኮ ታና ዋይꬄዛ። Ꮊ የሳይፕ ሻክንቲ ክርስቶሳር ዎላ የዞዳይስ ታ አሞትዛ፤ ክርስቶሳር ዎላ የዝዛይ ኡሳ ሎኦ። 24 ሀራ ባጋር ታኒ ይ ግሾስ ፓꬅ የዝዛይ ይንትስ ኡሳ ሎኦ።

25 ታኒ፥ ይ አማኖር ድጮድ ጋርከኔ ኡፋይቶድ ጋርክ ይንታር ፓꬅ የዝዛ። የያ ታኒ ሎእꬂ ኤርዛ 26 የይ ግሾስ፥ ታኒ ይንትኮ ማቂ የኦዳር ታ ባጋር ክርስቶሳ የሱሳር የዝ ይ የሳይድ ይ ጬቅንታይ ጋንጎዳ።

27 ኡባፕ ኣꬂ፥ ይ ክርስቶሳ ዎንግላይስ ቤዝዛ የስ የዞይታ። ታ ይ ይንታን ብእን በአም እጽን ይ ፐቲ ቆፋር ሚንጊ ኤቂ፥ ሀራ አሳይ ዎንግላ አማኖድ ጋርክ ፐቲ ዎዛና ማቂ ፐትፕ ዎላ ቡትትዛና ታ ስኦዳ። 28 ይ ሞርክታይስ ያሽትፓተ። የይ ይ ምኖትꬃይ ኡንትካ ይንታር ኤቅንትዛባዝ ማቅኮ ይንትስ አቶትꬅስ ኡንትስ ꬋቦስ ጾሳፕ ማቄዝ ማላ ጋርከ። 29 ክርስቶሳስ ኦꬅዝ አንጃይ ይንትስ እንግንቴዛይ፥ ይ ኤዛ አማኖድ ጋርክ ኣዳ ባዝን ይ ኤ ግሾ መቶ ኤኮድ ጋርከ። 30 የይ ግሾ፥ ይ ታ ዋያ ቲና በኤዛ፤ Ꮊተካ ታ መቶትዛና ይ ስእዛ። ይንትካ ታ መታይ ጋርክ መትንትዛ ።

1:1 ሀዋ. ኦ. 16:12

1:13 ሀዋ. ኦ. 28:30

1:30 ሀዋ. ኦ. 16:19-40