1 ታ እሹንꬆ፥ ታ ቃꬍዙንꬆ፥ ታ ላሞትዙንꬆ፥ ታ ኡፋይስታይኔ ታ ኦሶ አክልሉንꬆ ይኬ ጎዳይል ሚንጊ ኤቆይታ።

2 ኤዎዳራነ ስንጺካ፥ ይ ናምእታይ፥ ፐቲ ቆፋር ጎዳይ ባጋር ዎልስ ምሽታ ማቂ የዞድ ጋርክ ታኒ ይንታን ዞርዛ። 3 ታር ኦꬅዝ አማንꬅዛዮ፥ ኔኒ Ꮊ ማችታ ማዶድ ጋርክ ታ ነና ዎስዛ። Ꮊ ማችታይ ታር፥ ቀለምንጾሳራ ኡ ሱንꬃይ ጾስ ደኦ ማጻፋይ ጋንጨ ጻፍንቴዝ ሀራ አሳይር ዎላ ዎንግለ ኡባ አቆ ሄልꬆዳይስ ዳቡሬዛ።

4 ኡባ ዎደ ጎዳይር ኡፋይቶይታ። ታኒ የያ ጉጅካ ኦድዛ፤ ኡፋይቶይታ።

5 አስ ኡቢታይ ይ ሃዮትꬃ ኤሮ፤ ጎዳይ ኡከር የኦዳ። 6 ጾሳ ይ ዎስታር ኡባ ዎደ ኤዛ ጋላትታር፥ ይንታን ኮሽዛ ባዝ ኡባይስ ዎሶይታፕ አትን አባባዝስካ ህርግፓተ። 7 አስ ኤረትꬅ ኡባይፕ ኣꬊዝ ጾስ ሳሮትꬃይ፥ ይ ዎዛናኔ ይ ቆፋ ጎዳ የሱስ ክርስቶሳ ባጋር ናጎዳ።

8 ዉርስꬃል፥ ታ እሹንꬆ፥ ይ ካሃይራ ሎኦ ባዝኔ ጋላትስዛባዝ ቆፖይታ። ቱማ ማቄዝባዝ ኡባ፥ ቦንቾ ማቄባዝ ኡባ፥ ቆሆ ማቆዋ ባዝ ኡባ፥ ጌሽ ባዝ ኡባ፥ ሲቆ ባዝ ኡባኔ ኡፋይስዛ ባዝ ኡባ ቆፖይታ። 9 ይንቲ ታፕ ታማሬዝ ባዝ፥ ኤኬዝባዝ፥ ስኤዝባዝኔ በኤዝ ባዝ ኡባ ኦꬆይታ። ሳሮትꬅ እንግዝ ጾሳይ ይንታር ዎላ ማቃዳ።

10 ጋመ ዎደፕ ጉየ፥ ይ ታባዝ ማሂ ቆፕꬅ አይኬዝ ግሾስ ታኒ ጎዳይል ሎእꬂ ኡፋይትዛ። የያ ጉሳይ፥ ታስ ቆፖዳይስ ይንትስ ሀናም እጼዛይፕ አትን ታስ ቆፖያ ጉስ ባያ። 11 ታኒ የያ ግዛይ መቴዝ ግሾስ ጎያ፤ ታስ የዛ ባዝ ግዶድ ጉሳ ታ ታማሬዛ። 12 ታኒ መትንቲ የዝዛ የሳ ኤርዛ፤ ደሞካ ꬋቦካ ኤርዛ። አባ ማቅን ማ አባ ዎደካ ታኒ ምሽስ ናየስ፥ ፓጨስካ ኩንꬅስካ የዝ ጹራ ታ ታማሬዛ። 13 ዎልቃ እንግዝ ክርስቶሳር ኡባ ባዝ ታ ኦꬆዳይስ ዳንዳእዛ።

14 ማቅኮካ፥ ይ ታ መቶ ታር ሻክንቴዛይድ ሎኦ ኦꬄዛ። 15 ፍልጲሶሳ አሳዮ፥ ዎንግለ ቲና ኦዶዳይስ ታኒ ማቃዶናፕ ከዝዝ ዎደ እሞር ማቅን ኤኮራካ ይ ዎሳ ኬꬃፕ አትን ሀራ ኦንካ ታና ማደካዛ ይ ኤርዛ። 2ቆሮ. 11:9 16 ተሰሎንቀ ታ የዛ ዎደካ ይ ታና ማቂ ማቂ ማዴዛ። ሀዋ. ኦ. 17:1 17 ታኒ፥ ይንታፕ ይ እሞታ ኤኮዳይስ ኮዪ ባዝን እሞፕ ይእዝ አንጆ ይ ኤኮዳይ ጋርኬ።

18 ታኒ፥ ይ እንጌዝ ኡባባዝታኔ ግዲ ፉጭዛባዝ ኤኬዛ። ይ ዳኬዝ ኡብታ ኤጳፍራድቱሳፕ ኤኬዛ፤ ኮሽዛ ባዝ ኡባይ ታስ የዛ። ይ ታስ ዳኬዝ እማይ ጾስስ ቶንክ ግዝ ሳዎ፥ ኤ ቃꬍዛ፥ ኤ ኡፋይትዛ ያርሾ ጋርከ። ከስ 29:18 19 ታ ጾሳይ ፋ ቦንቾ ዱረትꬃይ ጋርክ፥ የሱስ ክርስቶሳ ባጋር ይንትስ ኮሽዛ ባዝ ኡባ እማዳ። 20 ኑ አዳይስኔ ኑ ጾሳይስ መꬊናፕ መꬍና ሄሎዳይስ ቦንቾ ማቆ። አምንኤ።

21 ክርስቶስ የሱሳ ባጋር ጾስ አማንዝታ ኡብታ ሳሮ ጎይታ። ታር የዝ እሽታይ ይንታን ሳሮ ግዛ። 22 ጾስ አማኔዝ አሳይ ኡባይ፥ ኡባፕ ኣꬂ ካት ቄሳረ ኬꬃ የዝታይ ይንታን ሳሮ ግዛ።

23 ጎዳ የሱስ ክርስቶሳ ኣꬎ ኬሃትꬃይ ይንታር ማቆ።