ጳዉሎሳ ቆላስያሳ አሳይስ ጻፌዝ ኪታ
ገሎ
ጳዉሎሳ ቆላስያሳ አሳይስ ጻፌዝ ኪታይ ጻፍንቴዛይ፥ ጽቃ ኢሳ፥ ኤፍሶነፕ አዋ ከስ ባጋር የዝ ቆላስያሳ ካታማ የዝ ዎሳ ኬꬃትሲ። የ ዎሳ ኬꬃ ኤሴዛይ ጳዉሎሳ ባ ማቅኮካ፥ ኦሮመ ቢታ ኢሳስ ዋና ካታማ ማቄዝ ኤፍሶናፕ ዎንግለ ሳባክታ ኪትዛይ ኤዛ ማቄዝ ግሾስ ቆላስያሳላካ አደትꬂ ኤስ የዛ። ቆላስያሳ ዎሳ ኬꬃ፥ «ጾስ ኤሮዳይስኔ ኩንꬅ አቶትꬅ ደንጎዳይስ አስ ኡባይ አያና ዎልቅታይስኔ ማዉታይስ ጎይኖዳይስ ኮሽዛ» ዬግዝ ዎርዶ አስታማርታይ የዛና ጳዉሎሳ ስኤዛ። የ አስታማርታይ ታማርስዛ ሀራ ባዝ፥ ማ፥ «አሲ ኡባይ ዶካልንቶ ዬግዝ አዛዞ ዎግታይስ ሞድንቶዳይስኔ ሙስ ዎጋ ኡባ ናጎዳይስ ኮሽዛ» ዬግዛ።
ጳዉሎሳ Ꮊ ኪታ ጻፌዛይ፥ ቱማ አማኖ ትምርታ ታማርሲ፥ ኡ ዎርዶ ትምርታ ላሎዳይሲ። ኤ ማሄዝ ማህꬅታይፕ ዋናትዛይ፥ «የሱስ ክርስቶሳ ኩንꬅ አቶትꬅ እንግዛ፤ ዝን Ꮊ ሀራ ሀይማኖትታይኔ ኡ ኦስታይ ኤፕ ሃክꬅዛ» ዬግዛያ። ጾሳይ ክርስቶሳ ባጋር አላመ መꬌዛ። ማ ኤ ባጋር ማሂ ፋኮ ኮኦዳ። Ꮊ አላማይስ አቶትꬅ ኡፋይስ የዛይ ክርስቶሳ አማኖ ባጋራ። የይ ግሾስ፥ ጳዉሎሳ Ꮊ ግታ ትምርታ አማንዛ አስ ደኦ ዋይዚ ኦሶል ፔሾዳይስ ቤዝዛኮ ኦድዛ። Ꮊ ኪታኔ ኤፈሶና አሳይስ ጻፌዝ ኪታይ፥ ፋ አይኬዝ ቆፋይራኔ ኪታይ ዎል ኣዝዛ። Ꮊ ናምኢ ማጻፍታይ ጋንጨ የዝ ዱማትꬃይ፥ ኤፈሶነ ክርስቶሳ ዎሳ ኬꬅስ ኩስተ ዬግዛ፥ ዝን ቆላስያሳ ክርስቶሳ መትꬅስ ኩስተ ዬግዛ።
Ꮊ ኪታ ጳዉሎሳፕ ኤኪ ቆላስያሳ ሄሎዳይስ Ꮊንጌዝ ትክቆሳር ዎላ የዛይ አናስሞሳ ማቄዛና ቤዞስ ማድዛ ባዚ። ዋይዚ ጊኮ፥ ጳዉሎሳ አናስሞሳ ግንትንትዝ ፋ ኦሳንቻይ ባጋ ፍልሞናስ ሀራ ኪታ ጻፌዛ።
ቆላስያሳ ኪታይ አይኬዝ ቆፍታ
ገሎ 1:1-8
ክርስቶሳ ሀናኔ ኦሳ 1:9—2:19
ክርስቶሳር የዝ ኦሮꬅ ደኦ 2:20—4:6
ዉርስꬅ ሳሮꬆኔ ኩስተ ቆፋ 4:7-18
1
1 ጾስ ሸነር ክርስቶሳ የሱሳ ሀዋረ ማቄዝ ጳዉሎሳፐኔ ኑ እሻ ጽማቶሳፕ፥ 2 ቆላስያሳ ካታማ የዝ ክርስቶሳስ አማንንቴዝ ጌሽታይስ ጻፌዝ ኪታ።
ጾሳ ኑ አዳይ ኣꬎ ኬሃትꬃይኔ ሳሮትꬃይ ይንትስ ማቆ።
ጳዉሎሳ ጋላታ ዎሳ
3 ኑኒ ይንትስ ዎስታር ጾሳ ኑ ጎዳ፥ የሱስ ክርስቶሳ ኣዳ ኡባ ዎደ ጋላትዛ። 4 ኑኒ ክርስቶሳ የሱሳር የዝ ይ አማናኔ ጌሽታይስ ኡባይስ የዝ ይ ሲቃ ስኤዛ። 5 ይ ቱማ ኪታ ማቄዝ ዎንግለ ቲና አማኔዝ ዎደ የ ኡፋይሳ ስኤዛ። የያ ይ ኦꬄዛይ ይ ኡፋይሳይ ሳሎ ይንትስ ናግንቴዝ ግሾሲ። 6 ይ Ꮊ ዎንግላ ስኤዝ ዎደኔ ጾስ ኣꬎ ኬሃትꬅ ቱማትꬃ ሻኪ ኤሬዝ ዎደፕ አይኪ ይ ጋንጨ ሀኔዛይ ጋርክ ቢታ ኡባይድ ዳልግታራኔ ኣፍታር የዛ።
7 ይ የያ ኑር ዎላ ክርስቶሳስ ኦꬅዛ አማንንቴዛኔ፥ ዶስንቴዝ ኤጳፍራፕ ታማሬዛ። ቆላ. 4:12፤ ፍልሞ. 23 8 ኤ የይል አፋ ጉጂ አያናይ ይንትስ እንጌዝ ሲቆር ይ ዎል ቃꬍዛና ኑስ ኦዴዛ።
9 የይ ግሾስ፥ ኑኒ ይ ባዝ ስኤዝ ጋላሳይፕ አይኪ፥ ጾሳይ ፋ ሸና ይንታን ቤዞዳይ ጋርከ፥ ጌሻ አያናይ እንግዛ ኤራትꬅራኔ ኤጨትꬅ ኡባይር ይንታን ኩንꬆዳይ ጋርክ ኡባ ዎደ ይንትስ ጾስ ዎስዛና አሻሚ። 10 የይ ጋርከካ፥ ጎዳይ ኮይዛይ ጋርክ ይ የዞድ ጋርክ፥ ኡባ ዎደ ኤ ኡፋይቶዳይ ጋርክ፥ ሎኦ ኦሶ ኡባይድ ይ ኣፈ ኣፎድ ጋርከኔ ጾሰ ኣꬂ ኤርታር ድጮዳይ ጋርክ ጾሳ ዎስዛ።
11 ጾሳይ ፋ ግታ ዎልቃይር ምኖትꬅ ኡባ ይንትስ እንጎ። ይ ዳንዳአራካ ጋርዦዳይ ጋርክ ኡፋይሳር ጊግንቴዝታ ማሆ። 12 ማ ጾስ አስታ ፖኦ ካተትꬃ ላቶዳይ ጋርክ ይንታን ኦꬄዝ ጾስ ኣዳ ጋላቶይታ። 13 ኤ ኑና ꬉማ ዎልቃፕ ሻኪ አሺ ፋ ዶስዛ ናአይ ካተትꬃ ገሎዳይ ጋርክ ኡዴዛ። 14 ኤ ዎዝን ኑ ኑ ናጋራይስ አቶትꬅ ደንጌዛ። ኤፍ. 1:7
ክርስቶሳ ꬎቃትꬅ
15 ክርስቶሳ በንቶዋ ጾሳይስ ቱማ ኣዝሶ። ኤ መትꬅ ኡቢታይፕ ኣꬎ ግታ ባይራ። 16 ኡባ ባዝ ኤ ባጋር መꬍንቴዛ። በንትዝባዝታይኔ በንቶዋባዝታይኔ፥ ዎልቅታይኔ ጎድታይ፥ ሞድዝታይኔ ማዉተ አድታይ፥ ሳሎኔ ሳአ የዝ ኡብታ ጾሲ ኤ ባጋራኔ ኤስ መꬌዛ። 17 ኤ ኡባባዛፕ ካሰ የዛ። ኡባ ባዝ ክርስቶሳ ባጋር ፋ አቆ አቆ አይክንቲ ኤቄዛ። 18 ኤ ፋ አሰትꬅ ማቄዝ ዎሳ ኬꬃይስ ኩስተ። ኤ ኡባይፕ ኣꬅ ማቆዳይስ Ꮊይቆፕ ደንዶር ቲናኔ ባይራ። ኤፍ. 1:22-23
19 ጾሲ ፋ ኩንꬅ ጾሳትꬃይ ፋ ናአይ ጋንጨ የዞዳና ኮዬዛይ ጾስ አዳይ ሸነ ማቄዝ ግሾስ የይካ ሀኔዛ። 20 ማ ማዝቃለል አፋ ላሌዝ ፋ ናአ ሱꬃይር ሳሮትꬅ መꬊ ሳሎኔ ሳአ የዝ ኡባ ኤ ባጋር ፓር ዳቦꬄዛ።ኤፍ. 2:16
21 Ꮊይፕ ቲና ይ ቆፋይኔ ይ ኦሶ ኢታትꬃይ ይንታን ጾሳፕ ሻጌዛኔ ኤስ ሞርክታ ኡዴዛ። 22 ዝን Ꮊት ክርስቶሳ አሾር Ꮊይቄዝ Ꮊይቃይ ባጋር ጾሲ ይንታን ፓር እግንꬂ፥ ጌሽታ፥ ቦሮ ባዝታኔ ጽልታ ኡዴዛ። 23 ይ፥ ይ አማኖር ኤንኤካ ሚንጊ ጻጲ የዞዳይስ ቤዝዛ። ይ ዎንግለ ቃላ ስኤዝ ዎደ ኤኬዝ ኡፋይሳ ሚንꬂ አይኮይታ። የ ዎንግላ ይ ስኤዛኔ አላመ ኡባይል ሳባክንቴዛ። ታ፥ ጳዉሎሳካ Ꮊ ዎንግላይስ ኦሳንቾ ማቄዛ።
ጳዉሎሳ ሀዋረትꬅ ኦሶ
24 ታኒ ይ ግሾስ Ꮊት ኤክዝ መታይ ታና ኡፋይስዛ። ክርስቶሳ ኤ አሰትꬅ ማቄዝ ዎሳ ኬꬃትስ ኤኮዳር ፋጬዝ መታ ታኒ ታ አሻይል ፖሎዳ። 25 ጾሳ ቃላ ይንትስ ዉርሲ ኦዶዳይ ጋርክ ታስ እንግንቴዝ ማዉታይር ዎሳ ኬꬅስ ኦሳንቾ ማቄዛ። 26 Ꮊ ቃላይ ብኒ ኣꬌዝ ላይꬅታይድ የለትꬅ ኡባይፕ ጌንጊ ጋምኤዛ። ዝን Ꮊት ጾሲ Ꮊ ጹራ አማንዛ ኡባይስ ቆንጭሴዛ። 27 ጾሲ አይሁደ ማቄዝ አሳይ ጋንጨ Ꮊ ጹራ ቦንቾ ዱረትꬃ ቆንጭሴዛ። ኤካ ቦንቾ ኡፋይስ ማቄዝ ይ ጋንጨ የዝ ክርስቶሳ።
28 የይ ግሾስ፥ ፐቲ ፐቲ አሳ ክርስቶሳር ኩንꬅ አስ ኡዲ ሺሾዳይስ ኤጨትꬅ ኡባይር አሳ ታማርሶራኔ ዞረር ክርስቶሳ ባጋ ሳባክዛ። 29 ጾሲ ፋ ዳማ ዎልቃር ታል ኦꬅዛ ግሾስ Ꮊኖ ሄሎዳይስ ኤ ዎልቃር ቡትትዛኔ ዳቡርዛ።