1 ታ ይንትስኔ ሎዶቃ ካታማ የዝ አሳይስ፥ Ꮊይ ጋርክ ታና ኣፈር በኤካ አስ ኡባይስ አብ ጋርክ ቡትትዛኮ ይ ኤሮድ ጋርክ ታ ኮይዛ። 2 ታ ቡትትዛይካ ኡንቲ ፋ ዎዛናይር ሚንጊ፥ ሲቆር አጭንቲ፥ ፎሎ ማቄዝ ኩንꬅ አካካ ዱረትꬅ ደንጊ ጾስ ጹራ ክርስቶሳ ኤሮድ ጋርከሲ። 3 ኤረተꬅኔ ኤጨትꬅ ሻሎ ኡባይ ቆስንቲ የዛይ ክርስቶሳራ።

4 ታ የያ ግዛይ ኦንካ ይንታን ዶሻ ቃላር ባልꬃም ጋርከሲ። 5 ታ ይንትፕ ሃኪ የዝኮካ አያናር ይንታር የዛ። ይ የሳይ ዎጋኔ ክርስቶሳ ይ ሚንጊ አማንዛና ብእን ታና ኡፋይስዛ።

6 ይ ጎዳ ክርስቶሳ የሱሳ ኤኬዛን ጋርክ ኤዛር የዞይታ። 7 ኤዛል ጻጶይታ፤ ኤዛል ኬጽንቶይታ። ይ ታማሬዛን ጋርክ አማኖር ሚንጎይታ፤ ጾሳይስ ኩሚ ፑጬዝ ጋላታ እንጎይታ።

8 ክርስቶሳፕ ባዝን አስ ዎጋራኔ Ꮊ አላማይ ጨረ ዎጋል ኤቄዝ አስ ኤረትꬃር መꬊ ከሴዝ ትምርታይራኔ ጨረ ዶሻር ኦንካ ይንታን ባልꬂ ድኣማይ ጋርክ ናግንቶይታ። 9 ጾስ ጾሰትꬅ ፎሎ ኩንꬄትꬃይ አሰትꬃር ቆንጭ የዝዛይ ክርስቶሳራ። 10 ይንትካ ማዉተስኔ ዎልቃ ኡባይስ ኩስተ ማቄዝ ክርስቶሳር ኩንꬅ ደኦ ደንጌዛ።

11 ይ ክርስቶሳና አማኖር ዶካልንቴዛ። የይካ አስ ኩሸር ባዝን ይ ኢታ ናጋራራ ኩሜዝ ሀኖትꬅ ሃስዝ ክርስቶሳር ኦስንቴዝ ዶካልንቶ። 12 ይ ጻማቅንቴዝ ዎደ ክርስቶሳር ዎላ ሞግንቲ፥ ክርስቶሳ Ꮊይቆፕ ደንꬄዝ ጾስ ዎልቃ አማኒ፥ ክርስቶሳር ዎላ ደንዴዛ። ኦሮ. 6:4

13 ይ፥ ይ ናጋራ ግሾኔ ይ ጬጋ አሰትꬃ ዶካልንተካ ግሾስ Ꮊይቂ የዝን፥ ጾሲ ይ ናጋራ አቶ ጌዛ። ክርስቶሳር ይንትስ ደኦ እንጌዛ። ኤፍ. 2:1-5 14 ኤ ኑ ሞታኔ ኑር ኤቅንትዛ፥ ኑል አፋ ጻፍንቴዝ አጮ ጹፋ ፔꬊ ማዝቃለል አፋ ምክንቲ ኦገፕ ታጌዛ። ኤፍ. 2:15 15 ክርስቶሳ ዎልቂታኔ ማዉተ አድታ ማዝቃለል ጋሚ፥ ኡ ዳንጫ ብልእሲ፥ ድእንቴዝ አስ ጋርክ ኡዲ ኡንታን ቆንጨ ከሲ ቤዜዛ።

16 የይ ግሾስ፥ ሚዝባዛር ዎይ ኡዥዝ ባዛር፥ አጌና ጼርዛ ቃማ ዎይ ማላ ቦንቾ ባጋ ኦንካ ይንታል አፋ ፕርድፐ። ኦሮ. 14:1-6 17 የይትታይ ቲናፕ የኦዳይስ የዛ ባዝታይስ ኤሾ፥ ዝን ኡባይ ክርስቶሳ። 18 ቆፕ ቆሞ ሃዮትꬅኔ ኪታንቾስ ጎይኖር ጬቅንትዛ ኦንካ ይንታን ይ ዎይታይፕ አሽፐ። የይ ጋርክ አሲ ፋ በኤዝ ቆንጭꬃር ሳብንትታር ፋ አሾ ቆፋር ጨረ ኡትርትዛ። 19 የይ ጋርክ አሳይስ ኩስተ ማቄዝ ክርስቶሳኮ ሺቆ ባያ። ኤ አሰትꬃ ኡባ ሻሻራኔ ዎል ሄልꬂ አይꬂ ሙዚ ድችዛ። ጾሲ የይ ጋርክ ኦገር አሰትꬃ ኡባ ድችዛ። ኤፍ. 4:16

20 ይ ክርስቶሳር Ꮊይቂ Ꮊ አላማ ሃርዛ አያንታይ ዎልቃፕ ዎዝንቴዛ። የዝን፥ አብስ ሻክንተካ አስ ጋርክ ማቂ Ꮊ ዎግታይስ ሞድንቴ? 21 Ꮊ ዎግታይ፥ «አይክፐ፤ ላእፐ፤ ቦችፐ» ግንትንትዝታ። 22 Ꮊ ኡባይ አስ ዎጋኔ ትምርተ ማቄዝ ግሾስ ኦሶል አፋ ፔዤዛይፕ ጉየ ꬋቦዳይስ የዛ። 23 Ꮊ አዛዝታይ አሲ ፋ ኡባ ቆፋፕ መꬌዝ ጎይኖ፥ አቆፕ ኣꬌዝ ሃዮትስኔ አሰትꬃ ቆሆር ኤርንቶ ኡንትስ ኤጨትꬂ ኣዝዛ፥ ዝን ኑ ኢታ አሞትꬅ ሃሮዳይስ ኡንትስ ዎልቃ ባያ።