12
ማቻትኔ ዳዋ
1 የይፕ ጉየ፥ ዎልቃማ ማላ ሳሎ በንቴዛ። አዋ ማኤዝ፥ አግና ፋ ቶኬ ኦሞ ኣꬄዝ፥ ታጶ ናምኢ ጾልንትታ ዛዉደ ጋርክ ፋ ኦማል ጋዴዝ፥ ፐቲ አስታ በንቴዛ። 2 የ አስታ ዎልቃ ኢታዝን፥ እዞ የሎስ እቅꬂ አይክን ኡንእንቲ ኡኬዛ።
3 ማ ሀራ ማላ ሳሎ በንቴዛ። ላፑን ኦምታይኔ ታጲ ካጭታይ የዝ ዳምግታ ዞቆ ዳወ በንቴዛ። ኤ ፋ ኦምታይል አፋ ላፑን ዛዉደ ጋዴዛ። ዳነ. 7:7 4 የ ዳዋይ ፋ ጎይናይር ጾልንትታይፕ ስካ ሳሎፕ ዳፊ ሳአ ኦሌዛ። የ ዳዋይ አስታ ናአ የሊ ኦሌዛን ጋርክ ማዳይስ ኮዪ፥ የሎስ እቅንትዝ አስቲ ቲና ኤቄዛ። ዳነ. 8:10
5 የ አስታ ካተትꬃ ኡባ ብራታ ጉፈር ሃሮዳይስ የዝ ꬊራꬅ ናአ የሌዛ። ናአይ ጾስኮኔ ኤ ዙፋናይኮ ኡዴ ኤክንቴዛ። ኢሳ. 66:7፤ ማዝ. 2:9 6 አስታ ፐቲ ሙኩሎኔ ናምኢ ጼታኔ ኡሱፑንታም ጋላስ ሄሎዳይስ እዞ ናጎዳይ ጋርክ ጾሲ ኢስ ጊግሲ ጋዴዝ አቃ ሊዦ ጋደ ቆስንቶ ቅቴዛ።
7 ሳሎ ኦላ መꬍንቴዛ። ምካኤለኔ ኤ ኪታንችታይ ዳዋይራ ኦልንቴዛ፤ ዳዋይኔ ኤ ኪታንችታይካ ማሂ ኦልንቴዛ። ዳነ. 10:13 8 ዝን ዳዋይኔ ኤ ኪታንችታይ ጋምንቴዛ፥ የይፕ ሳሎ ኡንትስ አቆ ꬋቤዛ። 9 ዳማ ዳወ፥ ብኒ ሾሻይ፥ ሳአ ꬉግንቴዛ። ኤካ ዳቡሎሳ ዎይ ጻላሄ ግንትንትዝ አላማ ባልꬅዛያ። ኤዛ ኤ ኪታንችታይራ ፐትፕ ሱል ኦሌዛ። መ. 3:1፤ ሉቃ. 10:18
10 የይፕ ጉየ፥ ሳሎፕ Ꮊይ ጋርክ ዬግዝ ጊርꬅ ታ ስኤዛ።
«Ꮊት አቶትꬅ፥ ዎልቃኔ ካተትꬃይ፥ ኑ ጾሳይስ ማቄዛ፤
ማዉተ ክርስቶሳስ ማቄዛ።
ይኬ፥ ቃማኔ ጋላስ ጾስ ቲና፥
ኑ እሽታ ሞትዛይ ሳሎፕ ሱል ꬉግንቴዛ።ኢዮ. 1:9
11 ኡንቲ ዱራይ ሱꬃይራኔ ፋ ማርካትꬅ ቃላይር፥
ኤዛ ጋሜዛ።
ኡንቲ ፋ ሸምፖስ ቃꬊንተካዛር
ፋና Ꮊይቆስ ኣꬂ እንጌዛ።
12 የይ ግሾስ፥ ሳሎኔ ኤ ጋንጨ የዝታዮ ኡፋይቶይታ።
ዝን ቢታኔ አባ አየ!
ይኬ፥ ዳቡሎሳ ፋሳ ጽቃ ዎደ አቴዛና ኤሬዝ ግሾስ
ዎልቃማ ካቻር ይንትኮ ዎꬌዛ»
ዬጌዛ።
13 ዳዋይ ፋና ሳአ ኦሌዛና በኤዝ ዎደ ꬊራꬅ ናአ የሌዝ አስቶ ባይእꬄዛ። 14 አስቶ ሾሻይ ቆሃማይ ጋርክ ሊዦ ጋꬋ ኢስ ጊግንቴዛ አቆ ፕራꬍ Ꮊማዳይ ጋርክ ናምኢ ዎልቃማ ጎሎ ቀፈ ኣዝዛይ ኢስ እንግቴዛ። ኤዛይድ ሾሻይ ቲናይፕ ሃኪ ሀይꬒ ላይꬅኔ ባጋ ቦንቾር ናግንትዛ። ዳነ. 7:25፤ 12:7
15 ሾሻይ የ አስቶ ድኦ ኤኪ ቅቶዳይ ጋርክ ዳዋይ ቦርካ ሃꬅ ጋርክ ፋ ዶናይፕ አስቲ ጉየር ጮዢ ጎግሴዛ። 16 ዝን ቢታይ አስቶ ማዴዛ፤ ቢታይ ፋ ዶና ዶዪ ዳዋይ ዶናይፕ ከዜዝ ሃꬃ ምጻጼዛ። 17 የ ዳዋይ አስትል አፋ ኢታ ሸንቲ፥ ኤ ዘርꬅታ፥ ጾስ ኪታ ናግዝታኔ የሱሳስ አማንንቴዝ ማርክታ ኦሎዳይስ Ꮊንጌዛ። 18 ዳዋይ አባ ላንቀ የዝ ሻፈል ኤቄዛ።