3
አይሁድታይ አማኖ እጾ
1 የዝን፥ አይሁደትꬅ አብስ ማዴ? ዎይ ዶካልንቶስ አባ ማዴ የኔ? 2 ቱማ አይሁደ ማቅꬃይ ጋመ ኦገር ማድዛ። ኡባፕ ቲን ጾሳይ ፋ ቃላ ሀዳራ አይሁድታይስ እንጌዛ።
3 የዝን፥ ኡንታፕ ፐታይ ፐታይ ቃላ አማናም እጽኮ፥ ኡ እጻይ ጾስ ጌሸትꬃ ካይነኔ? 4 ካዮያ! አስ ኡባይ ዎርዶ ማቅኮካ ጾሳይ ቱማ ማቆ። ጌሻ ማጻፋይድ፥
«ነቃላይር ነ ጽሎዳ፤
ነና ሞትዛና ፕርዳር ላꬆዳ»
ግንትንቲ ጻፍንቴዛ። ማዝ. 51:4
5 የዝን፥ ኑ ዎርዣይ ጾሳይ ጌሻ ማቅዛና ቤዝዛ ባዝ ማቅኮ፥ ኑ ዋጎዴ? ጾሳይ ኑ ናጋራ ግሾስ ኑል አፋ ፕርድኮ፥ ሉሎ ባሳኔ? Ꮊያ ታኒ አስ ቆፋ ጋርክ ግዛ። 6 የያ ባያ። የይ ጋርክ ሀንኮ፥ ጾሲ Ꮊ አላማይል አፋ ዋይዚ ፕርዶደ?
7 ዝን ታ ዎርዶትꬃይ ጾስ ቱማ ቆንጭሲ፥ ኤ ቦንቻ ዳምሲ ቤዝዛ ባዝ ማቅኮ፥ የዝን፥ አብስ ታል አፋ ናጋራንቾ ጋርክ ፕርድኔ? 8 ፐቲ ፐቲ አሳይ፥ «ሎኦ ባዝ የኦድ ጋርክ ኢታ ኦꬅዛ» ዬጊ ታማርስዛይ ጋርክ ኡዲ ታና ሞትዛ። የይ ጋርክ አሳል ይእዛ ጾስ ፕርዳይ ቤዝዛያ።
ጽሎ ፐታካ ባያ
9 የዝን፥ ኑኒ ዋጎዴ? ኑ ኣꬆኔ? የያ ባያ! አይሁደ ማቅን፥ ግርኬ ማቅን ኡቢታይ ናጋራ ኦሞ የዛና ታኒ ቲናቲ ይንትስ ኦዴዛ።
10 ጌሻ ማጻፋይድ፥
«ጽሎ አስ ፐታካ ባያ። ማዝ. 14:1-3፤ 53:1-3
11 አካክዛ አስ ባያ፥
ጾስ ኮይዝ ኦንካ ባያ።
12 ኡቢታይ ባልንቴዛ ፐትፐ አዶዝታ ማቄዛ ሃዮትꬅ ኦꬅዛይ ባያ።
ፐቲ አስካ ባያ።
13 ኡ ዶናይ ዶይንቴዝ ዱፎ፥
ፋ እራንꬃይር ዶሽዛ።
ኡ ዶናይፕ፥
ሾሺ ማርዘ ከዝዛ። ማዝ. 5:9፤ 140:3
14 ኡ ዶናይድ ጫሞ ኦዳኔ ባድꬂ ኩሜዛ። ማዝ. 10:7
15 ኡ ቶካይ ሱꬅ ላሎዳይስ ኤልስዛ። ኢሳ. 59:7-8
16 ኡ ኦጋይድ ꬋቦኔ ዳቡርስ የዛ።
17 ኡንቲ ሳሮትꬅ ኦገ ኤሮያ።
18 ፋ የሳይድ ጾስስ ያሽቶያ»
ግንትንቲ ጻፍንቴዛ። ማዝ. 36:1
19 አስ ኡባ ዶና አይꬆዳይስኔ አላማ ሙመር ጾስ ፕርደፕ ኦሞር ሺሾዳይስ፥ ህገ እንግንቴዛይ ህገፕ ኦሞ አቅዝታይስ ማቄዛና ኑ ኤርዛ። 20 የይ ግሾስ፥ ኦንካ ህገስ ኪትንቲ ጾስ ቲና ጽሎዳይስ ዳንዳኦያ። ህገ አስ ኡቢታይ ናጋራንቾ ማቄዛና ቤዝዛ። ማዝ. 143:2፤ ጋላ. 2:16
ጽሎትꬅ አማኖራ
21 ዝን Ꮊት ህገኔ ናብታይ ማርካቴዝ ጾስ ጽሎትꬃይ ህገ ባዝን ቆንጬዛ። 22 Ꮊ ጽሎትꬃ፥ ጾስ የሱስ ክርስቶሳ አማኖ ባጋር አስ ኡባስ ሻኮ ባዝን እንግዛ።
23 አሲ ኡባይ ናጋራ ኦꬄዛ፤ ጾሲ ኡንትስ እንጌዝ ቦንቻይፕ ፋጨዛ። 24 ዝን ኡንቲ ጾስ ኣꬎ ኬሃትꬃር፥ ዎዝዛ ክርስቶስ የሱሳ ባጋር ጨር ጽሌዛ። 25 ጾሳ የሱስ ክርስቶሳ ያርሾ ኡዲ እንጌዛይ፥ ኤዛ አማንዛ ኡቢታይ ኤ ሱꬃይር ናጋራ ማሮትꬅ ደማድ ጋርከ። ጾሳይ የያ ኦꬄዛይ ፋ ዳንዳአይር ቲን ናጋራ ታይበካ አሺ፥ ፋ ጽሎትꬅ ቤዞዳይስ። 26 Ꮊ ዎዳይድ የሱሳ አማንዛ ኡባ ጽልሶር፥ ጾሳይ ፋ ኡባስ ጽሎ ማቄዛና ቤዝዛ።
27 የዝን፥ ኑ ጬቅንታይ አባ የኔ? የይካ አቴዛ። ኑኒ ጬቅንትዛይ ህገስ ኪትንትዛ ግሾኔ? ዋኣ! አማኖ ህገራፕ አትን። 28 ጾሲ አስ ጽልስዛይ አማኖራፕ አትን ህገ ናጎር ባዛና ኑ ኤርዛ።
29 ዎይ ጾሳይ አይሁድታይስ ኣዳ ጾሶኔ? አይሁደ ባዝታይስ ጾስ ባሳኔ? ቱማ፥ አይሁደ ባዝታይስካ ኤ ጾሰ። 30 ጾሲ ፐቶ፤ አይሁድታኔ አይሁደ ባዝታይስካ አማኖር ጽልስዛይ ኤዛ። ናምእ. 6:4፤ ጋላ. 3:20 31 የዝን፥ ኑኒ ህገ አማኖ ግሾስ ሻሮዳ ጉሶኔ? የያ ባያ! ህገ ምንꬆዳይፕ አትን።