4
አፍራመ አማኖር ጽሌዛ
1 የዝን፥ ኑ አሾ አደ አፍራመ አብ ደንጌኔ? 2 አፍራመ ኦሶር ጽሌዝባዝ ማቄዛኮ፥ ኤ ጬቅንትዛባዝ የዛ፥ ማቆዝን፥ ጾስ ቲና ጬቅንቶዳይስ ዳንዳኦያ። 3 ጌሻ ማጻፋይ፥ «አፍራመ ጾሳ አማኔዛ፤ ጾሳይ የያ ኤዝስ ጽሎትꬅ ኡዲ ኤኬዛ» ዬጌዛ። መ. 15:6፤ ጋላ. 3:6
4 ኦꬅዛ አꬃይ ኤክዛ ዳሞዛይ፥ ኤ ኦሶ ዎልቃስ ጭግንትዛ አጮፕ አትን ኤዝስ እሞታ ባያ። 5 ዝን ኦሶ ኦꬆዋ ኦንካ ናጋራንቻና ጽልስዛ ጾሳ አማንኮ፥ ኤ አማናይ ኤዝስ ጽሎትꬅ ማቂ ፓይድንትዛ። 6 ጌሻ ማጻፋይድ ዳዉተ፥ ኦሶ ባዝን ጾሲ ጽልስዛ አꬃይ አብ ጋርክ አንጅንቴዛኮ Ꮊይ ጋርክ ዬጊ ቆንጭሲ ቤዝዛ፦
7 «ኡ ቡታይ አቶ ግንትንትዝታይኔ
ኡ ናጋራይ ኡጭንቴዝታይ አንጅንቴዝታ። ማዝ. 32:1-2
8 ጎዳይ ኤ ናጋራ ፓይደካ አሲ አንጅንቴዛያ»
ዬጌዛ።
9 የዝን፥ ዳዉተ ኦዴዝ አንጆ ዶካልንቴዝ አስ ኣዳሶኔ? ዎይ ዶካልንተካ አስሶ? ኑኒ፥ «ጌሻ ማጻፋይ፥ አፍራመ ጾሳ አማኔዛ፤ ጾሳይ የያ ኤዝስ ጽሎትꬅ ኡዲ ኤኬዛ ዬጌዛ»። 10 የዝን፥ የይ አይደ ሀኔ? አፍራመ ዶካልንትነኔ? ዎይ ዶካልንተካ የዝን? ዶካልንቶዳይፕ ቲን ሀኔዛፕ አትን ጉየ ባያ።
11 አፍራመ ዶካልንቶዳይፕ ቲና ኤ አማናይ ኤዝስ ጽሎትꬅ ማታመ ማቂ ፓይድንቴዛና ኤርሶዳይስ፥ ኤ ዶካሎስ ማላ ማቄዛ። የይ ግሾስ፥ አፍራመ ዶካልንተካ አማንዝታይስኔ አማኖር ጽልዝታይስ ኡቢታይስ አደ ማቄዛ። መ. 17:10 12 ኤ ዶካልንቴዝታይስካ አደ። አፍራመ ኡንትስ አደ ማቄዛይ ኡንቲ ዶካልንቴዝ ግሾስ ኣዳ ባዝን ኤ ዶካልንቶዳይፕ ቲን አማኔዝ አማና ኡንቲ ካሌዝ ግሾስ።
ጾስ ኡፋይሳይ አማኖር ኤክንትዛ
13 አፍራመስኔ ኤ ሼሻይስ፥ «አላመ ታ ይንትስ እማድ» ዬጌዝ ኡፋይሳይ፥ አፍራመ አማኖር ጽሌዝ ግሾስፕ አትን ህገ ናጊ ፖሌዝ ግሾስ ባያ። መ. 17:4-6፤ 22:17-18፤ ጋላ. 3:29 14 ህገስ ኪትንቴዝታይ ጾሳይ እማድ ጌዝ ኡፋይሳ ኤክዝታ ማቅኮ፥ አስ አማኖ ጨረ፤ ጾስ ኡፋይሳይካ ሻርንቴዛ። ጋላ. 3:18 15 ህገ መንꬆ ጾስ ካች ክእዛ፥ ዝን ህገ ባ አቆ ህገ መንꬆካ ባያ።
16 የይ ግሾስ፥ ጾሲ እንጌዝ ኡፋይሳይ አማኖር ኤክንትዛ። Ꮊ ኡፋይሳይ አፍራመ ሼሽ ኡባስ ጾስ ኣꬎ ኬሄትꬅ ባጋር እንግንቴዛና ቤዝዛ። የይካ ህገ ናግዝታይ ኣዳስ ባዝን አፍራመ ጋርክ አማኔዝ ኡቢታይስ። አፍራመ ኑ ኡባይስ አደ። ጋላ. 3:7 17 ጌሻ ማጻፋይድ፥ «ታ ነና ጋመ ዎይታይስ አደ ማሄዛ» ግንትንቲ አፍራመ ግሾስ ጻፍንቴዛ። Ꮊ ኡፋይሳይ አፍራመስ እንግንቴዛይ Ꮊይቄዝታይስ ደኦ እንግዛይኔ ኦሮꬅባዝ ኦꬅዛ ጾሳይ ኤዛ ማቅዛና ኤ አማኔዝ ግሾስ። መ. 17:5
18 ጾሳይ አፍራመስ ጋመ ዘርꬅ እማዳና ጫቄዛ። ኡፋይስ ኦꬆዳይስ አብካ ዳንዳእንቶዋ ዎደ አፍራመ ጾሳ አማኔዝ ግሾኔ ኡፋይስ ኦꬄዝ ግሾስ ጋመ ዎይታይስ አደ ማቄዛ። መ. 15:5 19 አፍራመስ ጼት ላይꬅ ኩሞድ ሀንኮካ፥ ዳቡሬዝ ꬊራꬄትꬃኔ ሳራ ናአ የሎዳይስ ዳንዳኦዛ ኤርታር ፋ አማናይር ዳቡረካያ። መ. 17:17
20 ማቆዝን፥ ኤ ፋ አማናይር ሚንጊ ጾሳይስ ቦንቾ እንጌዛፕ አትን ጾሳይ እንጌዝ ኡፋይሳ አማናም እጺ፥ ስካያ። 21 አፍራመ፥ ጾሳይ ጫቄዝ ጫቃ ፖሎዳና ፋ ኩንꬅ ዎዝናር አማኔዛ። 22 የይ ግሾስ፥ ጾሲ ኤ አማና ጽሎትꬅ ኡዲ ፓይዴዛ።
23 ዝን፥ «ኤዝስ ጽሎትꬃ ታይቤዛ» ግዝ ቃላይ አፍራመ ኣዳስ ጻፍንተካያ። 24 የ ቃላይ ኑ የሱሳ Ꮊይቆፕ ደንꬄዝ ጾሳ አማንዛ ኑስካ ኑ አማኖ ጽሎትꬃር ታይብንቶዳይ ጋርክ ጻፍንቴዛይ 25 ኑ ናጋራ ግሾስ Ꮊይቆስ አꬂ እንጌዛ፤ ኤ ኑና ጽልሶዳይስ Ꮊይቆፕ ደንዴዛ። ኢሳ. 53:4-5