15
ሀራ አስታ ኡፋይሶ
1 ኑ ምንꬅታይ ዳቡሬዝታይ ዳቡራ ቶኮዳይስ ቤዝዛ። ኑኒ ኑና ኡፋይሶዳይስ ቤዞያ። 2 ኑኒ ዎል ምንꬆዳይስ ዣምታ ማዶዳይስኔ ኡፋይሶዳይስ ቤዝዛ። 3 ክርስቶሳ ፋና ኡፋይስበኤካያ። ዝን ጌሻ ማጻፋይድ፥ «አሳይ ነና ጫዤዝ ጫሻይ ታና ሄሌዛ»ማዝ. 69:9 ግንትንቲ ጻፍንቴዛይ ጋርክ ሀኔዛ። 4 ጌሻ ማጻፋይ እንግዛ ጋርዦራኔ ምንꬃꬆራ ኑ ኡፋይሳ ኤኮድ ጋርክ ጌሻ ማጻፋይድ ጻፍንቴዝ ኡቢታይ ኑና ታማርሶዳይስ ጻፍንቴዛ።
5 ጋርዦኔ ምኖትꬅ እንግዛ ጎዳይ ይንቲ የሱሳ ክርስቶሳ ካሎዳር ፐትፐተꬅ ይንትስ እንጎ። 6 የይካ፥ ኑ ጎዳ የሱስ ክርስቶሳ ኣዳ፥ ጾሳ፥ ፐቲ ዎዛናራኔ ፐቲ ቃላር ይ ቦንቾድ ጋርከ።
ዎንግላይ አስ ኡቢታይስ
7 ክርስቶሳ ይንታን ኤኬዛይ ጋርክ ጾስ ቦንቾስ ፐታይ ፐታ ኤኮይታ። 8 ጾሲ ብኒ አድታይስ እንጌዝ ኡፋይሳይ ፖልንቶድ ጋርክ ኤ ቱማትꬃይ ኤርንቶዳይ ጋርክ ክርስቶሳ ዶካልንቶ አይለ ማቂ የኤዛና ታ ይንትስ ኦድዛ። 9 ክርስቶሳ ዶካልንቶስ አይለ ማሄዝ ባዛይ ማ አይሁደ ባ አሳይ ጾሳ ኤ ማሮትꬃይ ግሾስ ጋላቶድ ጋርከ። ጌሻ ማጻፋይድ፥
«ታ ነና አይሁደ ባ አስ ጋንጨ ጋላቶዳ፤
ነ ሱንꬃ ሳቦዳ»2ሳም. 22:50፤ ማዝ. 18:49
ግንትንቲ ጻፍንቴዛይ ጋርክ ሀኔዛ።
10 ማ፥ «አይሁደ ባ አሳይስ፥
ጾስ ዎያይራ ኡፋይቶይታ»ናምእ. 32:43 ዬግንቴዛ።
11 ማ ማሂ፥ «አይሁደ ባ አሳይ ኡባይ፥
ጎዳ ጋላቶይታ፤
ካተትꬂ ኡቢታይ ኤዛ ሳቦይታ»ማዝ. 117:1
ዬግንቴዛ።
12 የይ ጋርክ ኢስያሳ፥
«ኢሳየ ጻጶፕ የልንቴዝ ፐታይ የኦዳ፤
ኤ ፋ ካተትꬃ ኡብታ አቅሶዳ።
ኡ ፋ ኡፋይሳ ኤዛል አፋ ጋዶዳ»ኢሳ. 11:10
ዬጌዛ።
13 ጌሻ አያና ዎልቃር ይ ድጮድ ጋርክ ኡፋይስ እንግዝ ጾሳይ፥ ይ አማናይ ባጋር ይንትስ ኡፋይሳራ ሳሮትꬃር ኩንꬅ እንጎ።
14 ታ እሹንꬆ ይንት ሎኦትꬅኔ ኤረትꬂ ኩሜዛና ማ ፐታይ ፐታ ዞሮዳይስ ዳንዳእዛና ታ ጌሺ ኤርዛ። 15 ታኒ ይንታን ፐቲ ፐትባዝ ጉጂ አካክሶዳይስ ኮይ ያሽተካዛር Ꮊ ዳብዳባ ይንትስ ጻፌዛ። 16 ታኒ ክርስቶስ የሱሳ አይለ ማቂ፥ አይሁደ ማቀካ አሳይስ ቄሰ ጋርክ ኦꬂ፥ ዎንግለ ኦዶድ ጋርከ ጾሳይ ታስ ኣꬎ ኬሄትꬅ እንጌዛ። አይሁደ ባ አሳይ ጌሻ አያናር ጌዢ፥ ጾስ ኡፋይስዛ ያርሾ ማቃድ ጋርክ ጾሳይ የያ ኦꬄዛ።
17 ታኒ ክርስቶስ የሱሳር ማቂ ጾስስ ኦꬅዛ ኦሶር ጬቅንትዛ። 18 አይሁደ ባ አሳይ ጾሳይስ ኪትንታ ማቃዳይ ጋርክ፥ ክርስቶሳ ታ ቃላኔ ታ ኦሶ ባጋር ኦꬄዝ ኦሳይፕ አትን ሀራ ታ ጬቅንትዛባዝ ባያ። 19 ጾስ የያ ማላታራኔ ጌሻ አያና ዎልቃር ዋይዚ ኦꬄዛኮ ታ ይንትስ ኦዶዳ። ታኒ የሩሳላመፕ አይኪ፥ ኢልዋርቆኔ ሄሎዳይስ ክርስቶሳ ዎንግለ ሳባኬዛ። 20 ታኒ ሀራ አስ ባሴዝ አቃይድ ኬጾዳይስ ኮዮያ። ክርስቶሳ ሱንꬃይ ጼግንተካ አቆ ዎንግለ ሳባኮዳይስ አሞትዛ። 21 ጌሻ ማጻፋይድ፥
«ኤባጋ ኦድንተካ አሳይ ኤዛ በአዳ፤
ኤ ባጋ ስኤካ አሳይ አካኮዳ»ኢሳ. 52:15
ግንትንቲ ጻፍንቴዛ።
ጳዉሎሳ ኦሮመ Ꮊማዳይስ ቆፔዛ
22 የይ ባጋር፥ ታኒ ጋመ ዎደ ይንትኮ የኦዳይስ ኮይን ዳንዳእንተካያ። ኦሮ. 1:13 23 ዝን ታኒ Ꮊተ Ꮊ ሄራር የዝ አቆ ኡባ ሄሌዝ ግሾስ ጋመ ላይꬃፕ አይኪ ይንታን በአዳይስ ላሞቴዝ ግሾስ 24 ታኒ ኢስጴኔ Ꮊንግታር ይንታን በአዳይስ ቆፔዛ። ማ ጽቃ ዎደ ይንታር ኡፋይቴዛይፕ ጉየ ኢስጴኔ Ꮊንጎዳር ይ ታ ኦጋይስ ታና ማዶድ ጋርክ ኮይዛ።
25 ዝን Ꮊተ ታኒ ጾሳ አስታ ማዶዳይስ የሩሳላመ Ꮊንግዛ። 26 ማቃዶናራኔ አካያ የዝ ጾስ አስታይ፥ የሩሳላመ ጌሽታይ ጋንጨ የዝ ማንቅታ ሚሸር ማዶዳይስ ኮዬዛ። 1ቆሮ. 16:1-4 27 ኡንቲ ማንቅታ ማዶዳይ ኡንትስ አቶዋ ባዝ ማቄዝ ግሾስ ፋ ኡባስ የያ ኦꬆዳይስ ቆፋ አጬዛ። አይሁድታይ አይሁደ ባዝታይራ አያና አንጆ ሻግንትኮ፥ ኡንቲ ማ ፓስ የዛባዛር አይሁድታ ማዶዳይስ ቤዝዛ። 1ቆሮ. 9:11 28 የይ ግሾስ፥ ታኒ የ ሺቄዝ ሚሻ ኡንትስ እንገዛይፐኔ ኤኬዛና ኤሬዛፕ ጉየ ኢስጴኔ Ꮊንግታር ይ ላንቀር ኣꬎዳ። 29 ታኒ ይንትኮ Ꮊንግዛ ዎደ ክርስቶሳ አንጆ ኩንꬃር Ꮊማዳና ታ ኤርዛ።
30 ታ እሹንꬆ፥ ታስ ጾስ ዎስታር ታ ቡትንቶዳር ታር ኤቆድ ጋርክ ጎዳ የሱስ ክርስቶሳራኔ ጌሻ አያና ሲቃይር ይንታን ዎስዛ። 31 ጾሳይ ታና ይሁዳ ጋንጨ የዝ አማኖዋ አስታይፕ አሾድ ጋርከኔ የሩሳላመ ታ ኦꬆድ ኦሶ ጾስ አሳይ ላንቀ ኤክንቶድ ጋርክ ታስ ዎሶይታ። 32 ማ ጾስ ጊኮ፥ ታኒ ይንትኮ Ꮊንጊ ኡፋይሳር ይንታር ሸምፖድ ጋርክ ታስ ዎሶይታ። 33 ሳሮትꬅ ጾሳይ ይንታር ኡባይር ማቆ። አምንኤ።