1 Ta ishuntho, yhayttitay hanod laythitaynnee agintay bagga yinttis xaapodayis koshshooya. 2 Goday gallasay kayizo qamma yi7izay garkk ye7odana yi lo7ithii eriza.Mat. 24:43; Luq. 12:39; 2 Phix. 3:10 3 Asay, «Sa7a saro, akkoyka baaya» yeegodar, maachchi iqithii aykkizay garkk dhabo unttii qoppekkazin unttal afa ye7oda. Unttii aba ogerkka yesha buutaamii.

4 Zini nu ishuntho, ye gallasay yinttis kayizo yi7izay garkk ye7odayis yi dhuma baaya. 5 Yi ubbay poo7o asinnee gallasa yez as; nuunii qamma as woy dhuma as baaya. 6 Yeyi gishos, nuunii yhankkitay genttizay garkk genttodayis beezooya; nuunii barkkodayisnnee giigii yezodayis beeziza. 7 Genttizitay qamma genttiza; mathizitayikka qamma mathiza. 8 Zini nuunii poo7o as maaqqeez gishos beezizay garkk yezodayis beeziza. Ammanonnee siiqo xurure garkk tiral ma77ii, atotith ufayssa ommal ola biraata barneexa garkk gaddii yezodayis beeziza.Isa. 59:17; Efi. 6:13-17 9 Xoossii nuna nu Goda Yesuusa baggar kunth atotithi ekkoday garkk dooreezappe attin kachis doorekkaya. 10 Nuunii paxa yezin woy yhayqqin, Kiristtoosa yezeez wode ezar pettipp yezoday garkk Kiristtoosa nu gishos yhayqqeeza. 11 Yeyi gishos, yi tiina ootheezay garkk, pettay petta minthathoyttannee dichchoytta.

12 Nu ishuntho, yi gancce oothizita, yinttan kaalithoday garkkennee zoroday garkk Goday dooreezita bonchchoday garkk yinttan ta woossiza. 13 Unttii oothiza oosay gishos unttan usa bonchchoyttannee siiqoytta. Wolla saror yezoytta.

14 Nu ishuntho, boozita kaccoytta; yashittizita minthoytta; daabureezita maaddoytta; as ubba danda7oytta yeegii nuunii yinttan zoriza. 15 Oonkka iita gishos iita mahaamay garkk naaginttoytta. Yi wolisinnee as ubbayis lo77o baz oothodayis miinggoytta.

16 Ubba wode ufayttoytta. 17 Ubba wode Xooss woossoytta. 18 Ubba bazar galatooytta. Kiristtoosa Yesuusa baggar Xooss yinttapp koyizay yeya.

19 Geeshsha Ayyana oosa duucipatte. 20 Tinbbite leqqipatte. 21 Ubba baz faaccoytta; lo77o baza ekkoytta. 22 Iita ooso ubbaypp haakkoytta.

23 Saro inggiza Xoossay fa ommas yinttan folo geeshsho. Nu Goday Yesuus Kiristtoosa ye7od gallasis, Xooss yi ayyana, yi shemppannee yi kuminth asetitha boro bayth naago. 24 Yinttan xeegizay ammanintteezaya maaqqeez gishos yeya E poloda.

25 Nu ishuntho, nuus Xoossa woossoytta.

26 Ammaniza as ubba geeshsha yeerar sarothoytta.

27 Yi yha kiita ammaniza as ubbayis nabbaboday garkk Goday sunthayir yinttan ta woosiza.

28 Nu Goda Yesuus Kiristtoosa aadho keehatithay yinttar wolla maaqqo.