Phawuloosa Teselonqqe Asayis Xaafeez Nam7intho Kiita
Gelo
Kiristtoosa nam7intho yi7ithayil afa denddeez oychchay palama medhdhittar yhanigeez gishos Teselonqqe woosa keetha meto gaanggittar gaanggittar qiteeza. Phawuloosa Teselonqqe asayis xaafeez nam7intha kiitay, «Goda yi7ith gallasay ukkeeza» yeegiz ammano timirttayil afa miinthii odiza. Phawuloosa odittar Kiristtoosa ye7odaypp tiina, «Zhuca atha» ginttinttiz Kiristtoosana ixxizay kaalithizay yha alamel afa iitatithinnee cubotithii gaanggittar yhanigoda yeegiz u ammana luulisiza.
Hawaaray, metonnee waaye gaanggikoka unttii fa ammanayid minggoday garkk eenne ezar wolla yezitay ootheezay garkk, unttii fa yessis beeziza baz denggodayis miinggii yhanttoday garkk ma lo77o ooso oothodayis guye gaamay garkk unttan miinthii zoriza.
2 Teselonqqe kiitay aykkeez qofita
Gelo 1:1-2
Galatannee maganth 1:3-12
Kiristtoosa nam7intho yi7ithi bagga inggintteez timirtte 2:1-17
Ammanor yessal afa inggintteez zore 3:1-15
Kuste qofannee sarotho 3:16-18
1
1 Phawuloosapp, Silaaseppennee Ximaatoosappe Teselonqqe woosa keetha yez ammaniza asayis, Xoossa Aday baggannee Goda Yesuus Kiristtoosa bagga maaqqeez asayis xaafeez kiita.Haw. O. 17:1
2 Xooss nu Adayppenne Goda Yesuus Kiristtoosapp aadho keehatithaynnee sarotithay yinttis maaqqo.
Kiristtoosa nam7antho yi7ithayid ingginttod pirdda
3 Nu ishuntho, yi ammanannee yi woli siiqiza siiqqay lo7ithii dicciza gishos nuunii yeyis Xoossa ubba wode galatiza, galatodayiskka beeziza 4 Yinttan helleez bayi7ithayidannee waaye ubbay garzhorannee ammanor miinggii eqqeez gishos nuunii nu ommas Xooss woosa keetha yi bagga markkattittar yinttal ceeqinttiza.
5 Yi E gishos gi meto ekkiz Xooss kaatetithayis beezizita maaqqii taybinttoday garkk Xooss geeshsha pirddayis yhayi malla. 6 Xoossii tuma pirdda pirddoda. Xoossii yinttan waayisizitayil afa waaye ki7i u gata ciggoda. 7 Goda Yesuusa fa wolqqama kiitanchchitayra ye7ii yhatti waayinttiza yinttanannee nuna shemppisoda. 8 E laxiz tamar benttoda, Ma Xoossii fana erowazitannee nu Goda Yesuus Kiristtoosa Wonggelayis kiitinttoowazita eexiz tamar pirddoda. 9 Unttii Goday tiinapennee e bonchcho wolqqapp shaakinttii medhina dhabor pirddinttoda.Isa. 2:10 10 Ye gallas, E faasitayrannee fana ammanizita ubbayil bonchchinttodayisinnee sabinttodayis ye7odar nu yinttis odeez kiita yi ammaneez gishos yi eza bonchchizitay ganccennee sabbizitay gancce payidinttoda.
11 Nuunii yinttis ubba wode qofa gachchekkazar Xoossii woossizay yeyisii. Nu Xoossii yinttan xeegeez xeegithayis beezizita maaqqii payidinttoday garkk woossiza. Yi lo77o baz oothodayis amottiza amannee yi ammano oosa E fa wolqqar folo. 12 Ezayid nu Xoossannee nu Goda Yesuus Kiristtoosa aath keehatithayid, Goda Yesuusa suntha yi bonchchoda; yinttanakka E bonchchinttoday garkk nu woossiza.