Ibraawe Asayis Xaafintteez Kiita
Gelo
Yha kiitay xaafintteezay, deexo meto hellin, fa ammana ashshodayis helleez ammaniza asayisii. Ye maxafitto xaafeezay, Yesuus Kiristtoosa wurssithinnee tuma Xooss qonccith maaqqeezana Ibraawe asayis beeziza. Ye ammaniza asay fa ammanayid miinggoday garkk unttan minthathiza. E yeya udittar hayidzii tumita aathii beeziza.
1. Yesuusa fa ekkeez metayid fa Adayis tuma kiitintteez medhina Xooss Na7a. E Xooss Na7a maaqqeez gishos cima Caaqo wode yez nabitayppe, kiitanchchitayppennee Museppe lo7ithii aadhiza.
2. Yesuusa cima Caaqo qeesitaypp ubbar aadhiz medhina qeese maaqqeezana Xoossii fa ommas markkatteeza.
3. Yesuusa baggar ammaniza as nagarappe, yashshapenne yhayiqoppe attiza. Yesuusa qeese halaqa maaqqeeza, tiina Ibraawitay ammano wogannee mehe yarshshor eesho garkk benttiz atotitha yhatti tuma ootheeza.
Xaafay Isreele asay taarikennee waarer yez asay ammano aaziso udii ekkii (Shem 11) yha maxafitto nabbabiza asitay fa ammanayid miinggoday garkk akaakisiza. Yey garkkekka, shemppo 12 nabbabizitay fa aafa Yesuusal afa gaddii, fa ammanayid miinggoday garkkennee aba metonnee waaye hellikokka, unttii garzhoday garkk zoriza. Wurssitha zorayidannee akaakiso qaalayid fa kiita aathiza.
Ibraawe kiitay aykkeez qofita
Gelo: Xoossii Kiristtoosar qoncceeza 1:1-3
Kiristtoosa kiitanchchitaypp afa 1:4—2:18
Kiristtoosa Museppennee Iyyaasopp aath 3:1—4:13
Kiristtoosa qeesetithay ubbaypp aathii 4:14—7:28
Kiristtoosa qaala caaqay ubbapp aath 8:1—9:22
Kiristtoosa yarshshinttay puca 9:23—10:39
Ammano bayratitha 11:1—12:29
Xooss ufaysso 13:1-19
Wursith woosa 13:20-22
Anjjonnee kustte 13:22-25
1
Na7ay kiitanchchitaypp aathii
1 Binii binkko Xoossii, nu aditayis nabitay baggar duma duma oger gaame wode odeeza. 2 Zini yha wurssith wode ubba baz eza laatiseez ma alamakka e baggar medhdheez fa Na7ay baggar nuus odeeza. 3 Na7ay Xooss bonchcha pocithinnee hanayir muumer Xooss aazii kunth Xooss Xoossatith ekkii, fa mawute qaalayir yha alama miinthii aykkeeza. Asa u nagaraypp shaagishsheezaypp guye Ubbapp afa Xooss ushachch salo betteeza.
4 Ees inggintteez sunthay kiitanchchitay sunthaypp aath maaqqeezay garkk E unttapp lo7ithii aadhiz gishosii. 5 Yikkee, Xooss kiitanchchitaypp ooko,
«Neenii ta Na7a;
ta yhayino nees ade maaqqeeza» yeegeenee?
woy ooko,
«Taanii ees ade maaqqoda;
eekka taas na7a maaqqoda» yeegeenee?Maz. 2:7; 2 Sam. 7:14; 1 Zeena. 17:13
6 Ma Xoossii fa bayra Na7a yha alame kiittittar,
«Xoossii kiitanchchitay ubbay ees goynno»
yeegeeza.Nam7i. 32:43 7 Xoossii kiitanchchitay bagga odittar,
«Xoossii fa Kiitanchchita carkkita,
fa ayllita tama lath udiza»
yeegiza.Maz. 104:4 8 Zini fa Na7ay bagga odittar,
«Xoosso, ne kaatetithay medhinas yeziza.
Ne kaatetitha ne xillotithar aqisoda.Maz. 45:6-7
9 Neenii xillotithi doseeza; iitatith ixxeeza.
Xoossay, ne Goday, nena ne zhamitaypp aathii dooreeza,
ufayss zayite*Ufayss zayite: E kawutiza wode asay ufayisar ililii eza kawutisiza beeziza. nena tizheeza»
yeegiza.Maz. 61:1, 3 10 Xoossii mahii,
«Godayyo, tiina neenii sa7a medhdheeza;
salitay ne kushe oosita.
11 Yeyititay ubbay dhaboda;
zin neenii yezoda.
Unttii ubbay afila garkk wuroda.
12 Neenii unttan saline garkk xaaxoda;
ma unttii afila garkk laaminttoda.
Zini neenii ubba wode nena;
ne laythitayiskka wuristhii baaya»
yeegiza.Maz. 102:25-27 13 Zini Xooss kiitanchchitaypp ooko,
«Taanii ne morkkita ne tokay
yedhdhiz aqo udod hellodayis,
yhaydda taapp ushachch baggar bettoba» yeegeenee?Maz. 110:1
14 Kiitanchchitay ubbay atotith denggodayis yez asita maaddodayis Xoossii kiitteez ayyanita baasannee?