Phawuloosa Filimoonas Xaafeez Dabdaabe
Gelo
Pilmoona ammanor erintteez asii. Asay ezana Qolaasiyasa woosa keeth as maaqqada yeegii qoppiza. Pilmoonas Anasmoosa giz ayllay yeza. Yha ayllaykka fa goday karapp bette yhanigitar achch keeth yez Phawuloosar woli helleeza. Phawuloosa baggar Xoossa ammaneeza. Phawuloosa Pilmoonas Xaafeez Kiitay Pilmoona maaqqii eeko yi7ithal yez ayllayir dabotoday garkk qopisizaya. Ma gujjikka Anasmoosa Xooss ammaniza gishos yikkepp ammaniza as garkk ekkodaypp attin yikkepp aylle garkk payidippe yeegii odiza.
Filimoona kiitay aykkeez qofa
Gelo 1-3
Phawuloosa Filimoonana galato 4-7
Phawuloosa Anasimoosas shiisheez mino woosa 8-22
Kustte qofa 23-25
1
1 Yesuus kiristtoosas acintteez ta Phawlossappennee nu isha Ximaatoosapp dosintteez nuur wolla oothiz Filimoonas 2 nu mishittii Afibiyasinnee nuur kiristtoosas wottadare maaqqeez Arkkiphasasinnee ne kara shiiqiza ammaniza as ubbayis 3 Xoossa nu Adayppennee nu Goda Yesuus Kiristtoosa aadho keehatithayinnee sarotithay yinttis maaqqo.
Filmoona siiqonnee ammano
4 Ta woosayid ubba wode nena qopp ta Xoossa galatiza. 5 Goda Yesuusal yez ne ammanannee ammaniza asayis yez ne qadha ta si7eeza. 6 Neenii ne ammana hara asis shagizay nuus Kiristtoos Yesuusa baggar yi7iza lo77o baz ubbay erinttod garkk taanii Xoossa woossiza. 7 Ta ishayyo ammanizitay wozinay ne oosayir sheemppeez gishos ne siiqayir gaame ufayssinnee minthatho ta denggeeza. 8 Yey gishshos ne oothodayis beeziza baz oothoba gi Kiristtoosa baggar yashsha bayth kiitodazin, 9 Ubbar yhay garkk haneez ta Phawuloosa cimay, yhattekka ma Yesuus Kiristtoosas achch maaqqeezay, siiqo bagga woossiza. 10-11 Kase nena maaddekka attikokka yhatti maaqqiko nenakka tanakka maaddiza gishos ta achcha yezar kiristtoosa baggar yeleez ta na7a Anasmoosa gisho woossiza. 12 Ta eza neeko mahii dakoda, neenii ta wozinay garkk neeko dakkeezay garkk udii ekkoba. 13 Ta wongile gishoss accinttii yezin e ne aqo tana maaddod garkk ta eza ashshod geezin. 14 Zin ne lo77otithay wolqqanthor baazin dosor maaqqad garkke gi neer zorinttekkazar ashshodayis takoyekkaya. 15 E neepp shaginttii gam7eezay ubba wode neer yezod gishos maaqqada. 16 Yhaypp guye neer yezoday aylle garkk baazin ayllepp aadho dosintteez ishe garkke, e taas dosintteez ishe maaqqiko nees ashorannee ayyanar siiqo ishe wayizii maaqqoosa? 17 Yikkee tana nees ishe udii ekkiko ezakka ta garkk udii ekkoba. 18 Ababazikka nena qoheez baz yezikonnee aco ezal yeziko taal oloba. 19 Ta Phawuloosa ta kusher e aca ciggoda gi nees xaafeeza, ne ne ubbas ta acor yezana ta qopisaamii. 20 Yikkee ta ishayyo yha lo77o oosa ne taas oothod garkk ta nena woossiza. Hayyana ta wozina Goday baggar shemppisoba 21 Ta nees geezaypp aathii ne oothizay gishosinne azazinttiza gishos ta erii odiza. 22 Yeyiddakka Xoossay yi woosa si7ii tana yinttiko kammadana ta ufayttiza gishos taas shemppiza aqo giigisoytta. 23 Yesuus Kiristtoosa gisho taar acintteez Ephafira sarotho shiishiza. 24 Taar wolla oothiza Marqqoosara Arisxirokosa Deemaasa Luqaasakka sarotha shiishiza. 25 Goda Yesuus Kiristtoosa aadho keehetithay yinttar maaqqo.