Oroth Caaqo Waannisa Qonccitha 11

Nam77ii markkitta

1 Yeypp guye, yhadhdhas maadediz gufe inggii, «Yhanigii Xooss karannee yarshsho aqay aapun yhadhdhazako yhadhdhoba; ezayid goynnizitakka payidoba. 2 Zini Xooss Keeth dirssapp gaxa yezay Ayihude maaqqekka asayis inggintteez gishos yhadhdhekkazar ashshii ashshoba. Ayihude baa asay geeshsha katamtto oytamannee nam77ii aginas yedhdhii haaroda. 3 Taanii kayo afila ma77eez ta nam77ii markkitta kiittoda; unttii pettii mukulonnee nam77ii xeetinnee usuppuntam gallas tinbbite ododay garkk ta unttis wolqqa inggoda» yeegeeza.

4 Ye nam77ii markkitay alame Goday tiina eqqiza nam77ii woyira mithitannee nam77ii xomppe gaddiz kochchita. 5 Oonkka unttan qohodayis koyko u doonaypp tama kezii, u morkkita xuugiza. Unttan qohodayis koyeez oonkka yhay garkk hanii yhayqqoda. 6 Unttii tinbbite odiza wode ira bukkaamay garkk salo gorddodayis unttis mawute yeza. Ubbarakka haathe suuth laammodayis, maakka u fa koyeezaygarkk biitta duma duma gador dhabisodayis unttis mawute yeza.

7 Unttii fa markkatitha haaseezaypp guye, ciimmo ollapp kezeez do7ay unttar olinttii unttan gamoda; wodhoda. 8 U ahay aazisor Soodome woy Gibxxe ginttinttii xeeginttiz gita katama ogayil afa olinttoda. Izakka u Goday mazqalel afa sotintteezano. 9 Ma zerethi ubbaypp, kochch ubbaypp, duma duma doona odinttizitayppennee kaatetithii ubbaypp ye7eez asay u aha hayidzii gallasinnee bagga hellodayis be7ada. U ahay mooginttaamay garkk asay kayoda. 10 Yha nam77ii nabitay sa7a yez asa waaytheez gishos asay u yhayiqayid ufaytteeza. Fa ufayssa beezodayis pettay pettayis imota inggeeza.

11 Hayidzii gallasinnee baggapp guye, shemppo inggiza ayyana Xooss kalepp yi7ii u gancce gelin, unttii denddii eqqeeza. Unttan be7eez ubbay iita yashitteeza. 12 Yeypp guye, ye nam77ii nabitay, «Yhana ud salo kezoytta» giz qaala u salopp si7eeza. U morkkitay unttan be7adar, unttii shaara gancce gelii pud salo kezeeza.

13 Ye saatayid biittay wolqqama eni7o eni7in, katamaypp taphphintha kushay dhabeeza. Ma biitta eni7or laappun mukulo asay yhayqqeeza. Atteez asay iita kukkurii yashittii; salo Xoossayis bonchcho inggeeza.

14 Nam7antha ayyay aadheeza, yikkee hayidzintha ayyay eele ye7oda.

Laappuntha tulitula

15 Laappuntha kiitanchchay fa tulitula puggeeza. Salopp, «Sa7a kaatetithay nu Godayisinne Ees Kiristtoosas maaqqeeza; E medhinappe medhina hellodayis kawutoda» yeegiz wolqqama giirthitay sintteeza. 16 Yeypp, Xooss tiina, fa zufaanitayil betteez laatamannee oyddii cimitay xuggunii, Xoossis goynnitar,

17 «Yhattekka binkka yezayo,

Ubba mooddiz Goda Xoossayo,

neenii ne gita wolqqa aykkeeza.

Ne kawuteez gishos

nuunii nena galatiza.

18 Ayihude baa asay kaccintteeza,

zin ne kachchay ye7eeza.

Yhayqqeezitayil afa ne pirddiza woday ye7eeza.

Neenii ne ayllitayis, nabitayis,

geeshshitayisinnee ne sunthayis yashittizitayis,

laafitayisinnee gititayis,

u oosay garkk inggiza woday helleeza.

Alame dhabisizita dhabisiza woday ye7eeza»

yeegeeza.

19 Salo yez Xooss Keethay dooyintteeza; e gancce Xooss caaqo taabotay bentteeza. Ma zeelinthii zeelinggeeza, dadannee dada saarthii guumeeza; biitta eni7eeza; wolqqama shachchii shacceeza.

11:1 Iziqe. 40:3; Zak. 2:1

11:2 Luq. 21:24

11:4 Zak. 4:3

11:6 1 Kaat. 17:1; Kes. 7:17

11:7 Daan. 7:7; Wan. Qon. 13:5

11:8 Isa. 1:9

11:11 Iziqe. 37:10

11:12 2 Kaat. 2:11

11:13 Wan. Qon. 6:12; 16:18

11:15 Kes. 15:18; Daan. 2:44; 7:14

11:17 Kes. 3:14

11:18 Maz. 2:5; 110:5; 115:13

11:19 Wan. Qon. 8:5; 16:18; 21