1 Nluku ahonlamulela Yakopi: Wunwe, urwee uPeteli ni wakhale wonwo ni wampankele ikhilompi Nluku ookhumelenle ukati wantthawa munnaa Isawu. 2 Vano Yakopi ahohimerya ntthoko nawe na atthu othene yarinawe eeraka: Mwakumihe anluku a malaponi othene wariyari winyu mwiirapihe ni mmware ikuwo cikina. 3 Vano nunwe nirwe uPeteli wonwo kinkontekela ikhilompi Nluku akaakhunle nihuku narinaka masukuli ni hokiveleela mmaphironi mothene mweettaka. 4 Vaavale Yakopi ahovahiya anluku othene oohimaana yari mmatatani ni ipirinku caari mmanyaruni ni Yakopi ahothipela vathi mooko uri wamoca nuSikeni. 5 Vano yahokhumaca, na atthu yakhala yeeyo ilapo eyo Nluku ahaacariha woova mpaka woolwana wattharatthara asaana a Yakopi. 6 Commo, Yakopi na atthu othene yarinawe yahophiyaca o Lusu uneehaniya uPeteli uri ilapo yo Kanaa. 7 Vaavale ahoteka ikhilompi ni nenno nipuro nno ahovaha ncina no El-Peteli, kontha Nluku ahonkhumelela ukati wantthawawe munnaawe.

8 Ahokhwa Teepora, karumeya a Repeka, ni ahovithiya vakhiviru nuPeteli vathi waya mooko ni ahovaha ncina na Alompakuti.

9 Wahoolo Nluku ahonkhumelela tho Yakopi, akhumaka uPatan-Arami ni ahonreeriha. 10 Vano Nluku ahomwiirela: We ncina naa Yakopi. Ukhuma ilelo ncina naa khaninhala wiihaniya tho Yakopi nanso ncina naa ninhala wiihaniya Isirayeli. Ni aheehaneliya ncina na Isirayeli. 11 Nluku ahomwiirela tho: Mi phi mi Nluku okuru cothene. Uyarace ni ukhalane ucuulu mwinci. Mwiirutthuni mwa we, inaakhumelela ilapo cinci na atthu enci, ni ammokhumelela mamwene menci. 12 Mi kimmowuvaha we ilapo invahilyaka Aparahamu ni Isaki. Wahoolo ilapo eyo kinavaha ucuulu aa. 13 Vaavale, wuulumaca wawe Yakopi, Nluku ahowela. 14 Vano aheesa nivatta no nluku nipuro noolumaninyawe ni Nluku, ni aheetthela yoowuriya ni makhura waculu waya nivatta. 15 Phimaana Yakopi ahovaha ncina no Peteli nipuro namuulumanyawe Nluku.* Mphattuwelo 28.18-19

16 Wakhumilyaya uPeteli, unahanle ncoko vakani wiira aphiye ilapo yo Efarata, Rakeli ahonnyara mwana, nanso uyara wawe waari wookukuryaca. 17 Nari mmekho, mayoyariha ahomwiirela: Uhoove, kontha uhaana tho mwana mwanlopwana. 18 Vano wakhumaya nnepa awe, kontha hokhwa, ahonvaha mwana ule ncina na Penoni* manaaya wiira: Mwanawe Ucukula , nanso athumwane yahonvaha ncina na Pencamii* manaaya wiira: Mwanawe Moono Nlopwana . 19 Ni ala mananna ala pheeracilyawe wookhwa Rakeli ni ahovithiya ni iphiro yorwaa o Farata uneehaniya uPetelehemu. 20 Waculu waya mahiye, Yakopi aheemesa nivatta no nluku. Mpaka nihuku noleelo, nenne nivatta nne ninathonyera mahiye a Rakeli. 21 Vano Isirayeli ahokhuma arwaka unkhurutula heema awe withela Miktal-Eteri. 22 Anowiira Isirayeli athamelaka yeeyo ilapo eyo, Rupeni ahorwaa unthukumanana Piila, amwaara athumwane oohitteeliheraninya, ni Isirayeli ahocuwela.

Yakopi ahaana asaana khumi nuuwa eeli: 23 Rupeni, ntthara na Yakopi, Simeyoni, Levi, Yutta, Isakari ni Sepuloni, ala yari asaana a Leya; 24 Yusufu ni Pencamii asaana a Rakeli; 25 Taani ni Nafitali asaana a Piila, ipottha ya Rakeli; 26 Kaate ni Aseri yaari asaana a Silipa ipottha ya Leya. Ala phaasaana yayarelyawe o Patan-Arami.

27 Yakopi ahorwaa unthotola Isaki, athumwane, o Manree yo Kiriyate-Arapa o Heporoni wakhalawe Aparahamu ni Isaki. 28 Mahuku ookumi a Isaki yari myakha iminya imoca ni myakha nuwa thamanini (180) ceyarelo. 29 Isaki ahomumula nuukhwa nooluvanle ni ahaatthara mayathumwane. Isawu ni Yakopi, asaanawe, yahonvitha.