2
Wohaahawulaniha atthu
Asunnaka, nakupaliki Apwiya ehu Yesu Kirisitu aneene uttitthima, nihaahiyaniheke atthu ayo. Phimaana, awaaka ntthu mapuro anthukumanenyu, oonwara nnela owooru mmakokhoni mmo, nawaracile ikuwo comaana, wahoolo phikelaka tho ntthu nkina oohuva ni oothaaleliya, vano phaahawulanihaka wowaakhelela vaa, ni phimwiirelaka oowaraca ikuwo comaana uyo: Nyu vaa, mmweke mowunkomeke va nipuro noolemela nuuphwanenleeni. Vano oohuva uyo phimwiirelaka: We, weemeleke vaa, atthuna uweke wawonkomeke waryaka va. Mwapankaka ciicammo nheehawulaniha ayaayoru ni nheepanka mayahukhumu owuupuwela coonanara. Nkiiwe, asunnaka oofentiya: Nluku haathanla atthu owooninya uhuva mwilaponi wiira akhale athaaciri muukupalini ni akhale mayoophwanya umwene wo wirimu waalupelenlyawe ale anonfenta. Nanso, nyu akina vaa, nnawannyohola mayoohuva. Khaanakhala athaaciri phinootulumuni? Khaanakhala yaayo phinoorwanani upwaroni onoolumiya milattu? Khaanakhala yaayo phinnyohola ncina nomaana ninromoleliyeenyu?
Nyu mweettela malamulo o omwene wa Nluku, mwanapanka toko cinhimyaya cowantikhiya:
Unfente nkhwaa toko cineefentaa umwaneene* Lv 19.18,
unapanka yooreera. Nanso, mwaahiyanihaka atthu nnopanka itaampi, ni nnaahala uhukhumwinya ni malamulo toko mayootthekaca. 10 Ule noorya weettela malamulo othene, nanso phivonyanihaka nipuro nimoca, nalikeleliya ukosera othene. 11 Phimaana, ule eenre: Nheette uluva, ciicammo holamula eeraka: Nhiive.* Ukhuma 20.13-14 Vano, waheetteke uluva, nanso unawiiva, unkhala ntthu oovonyiha nlamulo. 12 Toko cineerenyu ni cinoolumacenyu, mpankeke ciicammo ncuwelaka wiira nnohala uhukhumwinya ni nlamulo nowiithawala. 13 Kontha ule hirina ikiriri naahala uhukhumwinya wohi ikiriri. Ikiriri cinatthema ihukhumu.
Nroromelo nohikhalana coopankiya ninkhala nookhwa
14 Asunnaka, nohala uphurani ntthu neera: Mi kihaana nroromelo nanso woohivarela nteko? Unoona wiira nenno nroromelo nno khaninoopola. 15 Akhala wiira mwamunninyu atthuna mwanrokorinyu hothaaleliya atthuna hovoliya itala yo khula nihuku, 16 ni mmoca wa nyu phimwiirelaka: Urweke ni mpuha, wawareke ni walyeke womaana, wohinvaha imphavelawe; mpankileni yooreera? 17 Ciicammo, nroromeloru paahi, noohivareliya nteko, ninkhala nookhwa.
18 Vano haawo nohala wiira: We uhaana nroromelo, ni mi kihaana miteko. Ukithoonyere nroromelo naa noohimiteko ni mi kinawuthonyera nroromelo naka ni miteko caka. 19 We unakupali wiira ri Nluku mmoca paahi. Wahoreera! Ciicammo asotwani anakupali ni anattettemela! 20 We, oomphuku! Khuncuwela wiira nroromelo noohivareliya nteko khanirina icaayira? 21 Aparahamu athumwanihu ookhalayii, khayaavahiye isariya nlattu wo miteko waanvaherenraaya mwanaya Isaki wanipuroni noosataka* Mphattuwelo 22.1-14. 22 Vano wooneke wiira nroromelo ni miteko cineetta wamoca, ni nroromelo nimaliheriya ni miteko. 23 Coo phitthariheleliyaya yowantikhiya yiiraka: Aparahamu honkupali Nluku ni hoheeliya ukhala nasariya, ni uyo heehaninya mpwanawe Nluku. 24 Mooneke wiira ntthu novahiya isariya nlattu wo miteko, woohikhala nroromeloru. 25 Wanlikana toko puuta Rahapi; waavahiyawe isariya nlattu wopanka yooreera, aavahaka nipuro atthu oohottela ni wathonyera iphiro ikina. 26 Ciicammo irutthu yohiroho inkhala yookhwa, philikanaya nroromelo nohikhalana coopankiya ninkhala nookhwa.

*2:8 Lv 19.18

*2:11 Ukhuma 20.13-14

*2:21 Mphattuwelo 22.1-14