UWukuwi wa Yookhani
Ʉwandɨlo
Ishitaabu ishi shásimbiilwe nu musundikwa uYookhani. Ásimbile kʉbhaavwa aBhakilisiti abha vɨbhanza saba vwe akhɨmɨlɨlaga. Mʉ mʉlyango ʉwa 2-3 áshisimbiiye ɨshɨbhanza sheeka sheeka ɨkalaata. Akʉbhasokha kʉtɨ bhapɨndʉshe mu mbiibhi zyabho. Khabhɨlɨ akʉbhagomwa abhabhombi bha Mʉlʉngʉ kʉtɨ bhabhe mu wugolosu poope ɨnga bhalɨ mʉ mayɨmba. Kwandɨla ʉmʉlyango ʉwa 4 kufikha kʉwʉmalɨlɨshɨlo ʉwa shitaabu ishi, uYookhani akʉpanga izyi njozi ɨzya pamiiso amazelu ɨzya makha ga Mʉlʉngʉ, nu wumwamu waakwe we álolile. Mu njozi ɨzya pamiiso amazelu zɨnɨɨzyo ʉMʉlʉngʉ akugubula ʉmʉlakha waakwe kʉ bhantʉ abhabhiibhi bhonti abha mʉ nsɨ, akʉlolesya she uKilisiti akhayɨnza kʉtola uwubhiibhi. Khabhɨlɨ akhayɨnza kʉbhalonga abhantʉ bhonti bhe bhakʉwʉkhaana uwanalyoli waakwe. ɄMʉlʉngʉ akhayɨnza kʉyazya ɨnsɨ na kʉpela ɨnsɨ impwa. Pe shɨnɨɨsho, abhantʉ bhonti bhe bhakʉmwɨtɨkha ʉMʉlʉngʉ bhakhayɨɨkhala peeka nawo wiila na wiila.
| Zye zɨlɨ mu shitaabu ishi | Ʉmʉlyango |
| Ʉwandɨlo uwi njozi ɨzya pamiiso amazelu zye uYookhani ázilolile | 1:1-20 |
| Amakalaata saba kʉ vɨbhanza saba | 2:1-3:22 |
| Izyi njozi ɨzya pamiiso amazelu ɨzya Mʉlʉngʉ nɨ Nyaana yɨ Ngoole | 4:1-5:14 |
| Amanhuuli saba | 6:1-8:5 |
| Amakakaavu saba | 8:6-11:19 |
| Izyi njozi ɨzya pamiiso amazelu kʉnongwa iyi bho ɨlya mʉ nsɨ zyonti na kʉmwanya | 12:1-14:20 |
| Imbakuuli saba ɨzya wugoji | 15:1-16:21 |
| Kʉlongwa kwa mwantanda ʉmʉlondo ʉwa Babeeli, ɨshɨkhanʉ, umukuwi ʉwɨ lenga nu Seetani | 17:1-20:10 |
| Kʉlongwa ʉkwa kʉmpeleela, na khabhalɨlo akhapwa | 20:11-22:21 |
1
Uwilulanyo ʉwa shitaabu ishi
1 Uwu we wukuwi we wukufuma kwa Yeesu Kilisiti. Uwukuwi wʉnʉʉwo ʉMʉlʉngʉ ámupiiye kʉtɨ abhalanje abhabhombi bhaakwe zye nalyoli zitifumile shiniishi bhʉʉlo. UYeesu akhamʉlanga uYookhani umubhombi waakwe uwukuwi wʉnʉʉwo kʉshɨlɨla kwa khabhɨzya waakwe. 2 Pe uYookhani akhafumwa uwukeeti ʉwa zyonti zye ázilolile, zye lizwi lya Mʉlʉngʉ nu wukeeti kʉ zya Yeesu Kilisiti. 3 Asayiilwe we akʉbhabhaazɨzya abhamwabho amazwi aga wukuwi ge gasimbiilwe umu, khabhɨlɨ bhasayiilwe bhe bhakʉgatejeelezya na kʉgalema. Ɨnkʉlonga shɨnɨɨsho kʉnongwa ye akhabhalɨlo khe gakhayifikha khapalamɨɨye.
Ɨndamʉkho kʉ vɨbhanza saba
4 Ishitaabu ishi insimbile nʉneene nu Yookhani kʉ vɨbhanza saba ɨvwa mʉ nsɨ ɨya mu Asiya. Mʉbhe nu wiila nu wutengaanu we wukufuma kwa Mʉlʉngʉ, ʉweene we álɨɨpo na we alɨɨpo na we akhayɨnza. Khabhɨlɨ mʉbhe nu wiila nu wutengaanu we wukufuma ku Mpepu saba*1:4 IMpepu saba Ili lɨdala ɨlya kʉmʉtekha uMupepu uMufinjile, saba shɨlolesyo ɨsha lusimishizyo ʉlwa wukwilizu mu Wusimbe uWufinjile. Kwe kʉtɨ uMupepu uMufinjile alɨ na makha gonti. zye zɨlɨ pɨlongolela pɨ tengo lyakwe ɨlya shɨmwene, 5 khabhɨlɨ we wukufuma kwa Yeesu Kilisiti. Ʉweene we mukeeti wa nalyoli, we wa kwanda kʉzyʉkha, khabhɨlɨ we akʉtabhaala abhamwene bhonti abha mʉ nsɨ.
UYeesu Kilisiti we atuganile, khabhɨlɨ kwɨ bhanda lyakwe atʉsatʉʉye kufuma mu mbiibhi zyɨtʉ. 6 Ʉweene we atubhiishile kʉbha wʉmwene, na kʉtʉbhɨɨkha tʉbhe twe bhapuutili ɨnga tʉmʉbhombele ʉMʉlʉngʉ, ʉTaata waakwe. Uwumwamu na makha vɨbhe na wʉʉyo wiila na wiila! Zɨbhe shɨnɨɨsho!
7 Yeenyi! Akwɨnza mʉ mabhɨngo!
Abhantʉ bhonti bhakhayɨmʉlola,
peeka na bhe bhámulasile nɨ mpalala.†1:7 Bhe bhámulasile nɨ mpalala bháamɨle bhasikaali abha Shiluumi, ɨleelo bhanaabho bhe shɨkholanyo sha bhalʉgʉ bhonti abha Yeesu. Bhaazya Yookhani 19:34.
Abhantʉ abhɨ nsɨ zyonti bhakhayɨyɨlʉmbʉʉzya
kʉnongwa yaakwe.
Nalyoli! Zɨbhe shɨnɨɨsho.
8 ɄMwene ʉMʉlʉngʉ akʉlonga kʉtɨ, “Ɨne ne wa kwanda, khabhɨlɨ ne wa kʉmpeleela, ʉweene we álɨɨpo na we alɨɨpo na we akhayɨnza, iwinza ʉweene Wa makha gonti.”
UYookhani akʉmʉlola uKilisiti mu njozi ɨzya pamiiso amazelu
9 Ɨne ne Yookhani, ʉnholo wiinyu mʉ lwɨtɨkho. Insangaanile peeka nɨɨmwe mʉ mayɨmba na mʉ wʉmwene na mu wujimbiilizu kʉnongwa ɨya kʉmʉlandata uYeesu Kilisiti. Nákungiilwe mʉ nsɨ inyuumu, ye bhakʉtɨ iPaatimo ye yáamɨle pakaasi pa sʉmbɨ. Nákungiilwe kʉnongwa ɨya kʉlʉmbɨɨlɨla izwi lya Mʉlʉngʉ na kufumwa uwukeeti ʉwa Yeesu Kilisiti. 10 Isiku limo ɨlya Mwene, ɨnhalongolwaga nu Mupepu uMufinjile, ɨnhɨmvwa izi ɨpɨtɨ anzi lyi kakaavu kʉlʉsalo kʉkwanɨ. 11 Izi lɨnɨɨlyo lɨkhambʉʉzya lɨkhatɨ, “Ziniizi zyonti zye ʉkʉzɨlola, uzisimbe mu shitaabu. We wasimba, ʉtwale ishitaabu mʉ vɨbhanza saba ɨvwa mʉ nhaaya ɨzya mʉ Efeeso, mu Siimina, mʉ Pegaamo, mu Siatila, mu Saadi, mu Filadeefiya na mu Laodikiya.”
12 Pe ɨnhashebhela kʉtɨ ɨmʉlole we akʉlonga nɨɨne. We nagalʉnhana, ɨnhalola ɨvɨnaala ivwi zahaabu ɨvwɨ taala saba. 13 Pakaasi pa vɨnaala ɨnhamʉlola weeka we áamɨle ngatɨ Mwana wa Muntu.‡1:13 ɄMwana wa Muntu Bhaazya mu Wilulanyo ʉwa mazwi amajeni. Akwatile ɨnkanzʉ intali, ayipinyile ɨlambɨ ilyi zahaabu pa shifubha. 14 Kwi twe áamɨle ni nsisi inzelu anza masepe amazelu, khabhɨlɨ zyámɨle ngatɨ nganda inzelu nhaani. Amiiso gaakwe gakhalamaga ngatɨ mwoto. 15 Ɨvɨnama vwakwe vɨkhalamaga ngatɨ shɨjela she bhapembile mwɨ syanɨlo. Izi lyakwe lyámɨle ngatɨ minzi aminji ge gakwikha kʉ nsaato. 16 Mʉ nyoobhe yaakwe ɨya kʉndɨɨlo áamɨle nɨ nzota saba, nʉ mʉfwo umwoji kwonti kwonti we wáfumile mwi lomu lyakwe. Kumiiso kʉkhalamaga ngatɨ lɨzʉbha lye lilamile nhaani.
17 We namʉlola, ɨnhagwa pa vɨnama vwakwe ngatɨ muntu we afuuye. Ɨleelo akhandema nɨ nyoobhe yaakwe ɨya kʉndɨɨlo akhatɨ, “Ʉtogopaje! Ɨne ne wa kʉwandɨlo iwinza ne wa kʉwʉmalɨlɨshɨlo. 18 Ɨne ne Mwumi. Ɨne náfuuye, ishi yeenya ne mwumi wiila na wiila! Ɨne ɨndɨ ni mfungulo ɨzya wufwe nɨ zya kwɨlongo.§1:18 Kwɨlongo Bhaazya mu Wilulanyo ʉwa mazwi amajeni.
19 “Ishi, uzisimbe zyonti zye wazɨlola, zye zikufumila ishi na zye zikhayifumila pɨlongolela. 20 Ɨnzota saba zye wazɨlola mʉ nyoobhe yaanɨ ɨya kʉndɨɨlo, wʉ khabhɨzya*1:20 Ʉkhabhɨzya Kwɨ dala ɨlyamwabho izwi liniili lɨkʉtɨ ʉmʉsonteelezwa. ʉwa vɨbhanza vɨnɨɨvwo saba, khabhɨlɨ ɨvɨnaala saba ɨvwɨ taala ivwi zahaabu vɨbhanza saba.”
*1:4 1:4 IMpepu saba Ili lɨdala ɨlya kʉmʉtekha uMupepu uMufinjile, saba shɨlolesyo ɨsha lusimishizyo ʉlwa wukwilizu mu Wusimbe uWufinjile. Kwe kʉtɨ uMupepu uMufinjile alɨ na makha gonti.
†1:7 1:7 Bhe bhámulasile nɨ mpalala bháamɨle bhasikaali abha Shiluumi, ɨleelo bhanaabho bhe shɨkholanyo sha bhalʉgʉ bhonti abha Yeesu. Bhaazya Yookhani 19:34.
‡1:13 1:13 ɄMwana wa Muntu Bhaazya mu Wilulanyo ʉwa mazwi amajeni.
§1:18 1:18 Kwɨlongo Bhaazya mu Wilulanyo ʉwa mazwi amajeni.
*1:20 1:20 Ʉkhabhɨzya Kwɨ dala ɨlyamwabho izwi liniili lɨkʉtɨ ʉmʉsonteelezwa.