1 Ti̱kuiin ka̱ ni̱a̱ꞌa̱ va̱ kivi̱ꞌ nu̱uꞌ xaꞌa̱ꞌ xi̱mana, te̱ ni̱ xaꞌa̱n María Magdalena yavi̱ ndi̱i̱ miiꞌ naá ñu̱ꞌuꞌ ndeꞌi̱ Jesús. Te̱ ni̱ xi̱ni̱ aꞌ ña̱ xa̱ ni̱ nu̱ndiaꞌa̱ yuu̱ꞌ ña̱ ndasi yu̱ꞌuꞌ yavi̱ ja̱a̱nꞌ. 2 Sa̱kanꞌ te̱ ni̱ nda̱va̱ aꞌ kuaꞌa̱n aꞌ miiꞌ nduꞌu̱ꞌ Simón Pedro xiinꞌ i̱nga̱ te̱ ndikún i̱chiꞌ Jesús, te̱ kundani̱ va̱ a̱. Te̱ ni̱ kaꞌa̱n aꞌ xiinꞌ ra̱ ndii:

―Ni̱ na̱ꞌi̱n te̱ yivi̱ꞌ ñu̱ꞌuꞌ ndeꞌi̱ xto̱ꞌo̱ e̱ꞌ ti̱xi̱n yavi̱ ndi̱i̱, te̱ xïní e̱ꞌ miiꞌ ni̱ chi̱ka̱nduꞌu̱ꞌ ra̱ a̱ ―ni̱ kachi̱ aꞌ.

3 I̱kanꞌ te̱ ni̱ nda̱va̱ Pedro xiinꞌ i̱nga̱ te̱ ndikún i̱chiꞌ Jesús ja̱a̱nꞌ kuaꞌa̱n ko̱to̱ ra̱ yavi̱ ja̱a̱nꞌ. 4 I̱i̱n kachi ni̱ ta̱xtaꞌanꞌ uvi̱ sa̱aꞌ ra̱, ndisu̱ ndi̱e̱eꞌ ka̱ ni̱ nda̱va̱ i̱nga̱ ra̱ te̱ sa̱kanꞌ Pedro, te̱ xi̱ꞌna̱ ka̱ ra̱ ni̱ xaa̱ yavi̱ ja̱a̱nꞌ. 5 Te̱ ni̱ na̱ku̱tandi̱e̱ ra̱ xtoꞌniꞌ ra̱ ti̱xi̱n yavi̱ ja̱a̱nꞌ, te̱ ni̱ xi̱ni̱ ra̱ ndieeꞌ toto̱ ña̱ ni̱ ndi̱suku̱ꞌ ñu̱ꞌuꞌ ndeꞌi̱ Jesús, ndisu̱ nï̱ ndiꞌvi̱ ra̱. 6 Sa̱kanꞌ te̱ ndikún Simón Pedro xata̱ꞌ te̱ ja̱a̱nꞌ ni̱ xa̱a̱ ra̱, te̱ ni̱ nda̱ꞌni̱ ra̱ ti̱xi̱n yavi̱ ja̱a̱nꞌ, te̱ ni̱ xi̱ni̱ ra̱ ndieeꞌ toto̱ ña̱ ni̱ ndi̱suku̱ꞌ ñu̱ꞌuꞌ ndeꞌi̱ Jesús. 7 Te̱ ni̱ xi̱ni̱ tu̱ ra̱ nduꞌu̱ꞌ toto̱ ña̱ ni̱ ndi̱suku̱ꞌ xíniꞌ Jesús. Ndisu̱ iinꞌ taꞌnú a̱ te̱ nduꞌu̱ꞌ siinꞌ mi̱iꞌ a̱. 8 Sa̱kanꞌ te̱ ni̱ nda̱ꞌni̱ tu̱ te̱ nda̱ꞌaꞌ xaꞌa̱ꞌ a̱, te̱ ni̱ xa̱a̱ nu̱uꞌ yavi̱ ja̱a̱nꞌ, te̱ ni̱ xi̱ni̱ ra̱ ña̱ ni̱ yoo̱ ja̱a̱nꞌ, te̱ ni̱ ka̱ndi̱xaꞌ ra̱ a̱. 9 Kua̱chi̱ ndii tïa̱ꞌan ku̱nda̱ni̱ ra̱ kii̱ꞌ sa̱kanꞌ miiꞌ yoso̱ꞌ a̱ nuu̱ꞌ tu̱tu̱ Ndiosí ña̱ kaꞌán ña̱ ni̱ kuni̱ a̱ na̱ti̱a̱ku̱ a̱. 10 Te̱ ni̱ na̱ndi̱koꞌ te̱ nda̱ꞌaꞌ xaꞌa̱ꞌ a̱ ja̱a̱nꞌ miiꞌ ndieeꞌ ra̱.

11 Te̱ María ja̱a̱nꞌ ndii, ni̱ ndoo̱ aꞌ iinꞌ aꞌ xakuꞌ aꞌ ya̱ti̱n yu̱ꞌuꞌ yavi̱ ja̱a̱nꞌ. Te̱ kii̱ꞌ iinꞌ aꞌ xakuꞌ aꞌ ja̱a̱nꞌ, te̱ ni̱ na̱ku̱tandi̱e̱ aꞌ, te̱ ko̱to̱ꞌni̱ aꞌ ti̱xi̱n yavi̱ ja̱a̱nꞌ ndii, 12 ni̱ xi̱ni̱ aꞌ uvi̱ taꞌan ángele niꞌnuꞌ a̱ toto̱ ya̱a̱, te̱ ndieeꞌ a̱ miiꞌ ni̱ ka̱nduꞌu̱ꞌ ñu̱ꞌuꞌ ndeꞌi̱ Jesús. I̱i̱n a̱ miiꞌ ni̱ yoo̱ xíniꞌ a̱, te̱ i̱nga̱ a̱ miiꞌ ni̱ yoo̱ xaꞌa̱ꞌ a̱. 13 Te̱ ni̱ kaꞌa̱n a̱ xiinꞌ aꞌ ndii:

―¿Ndichun na xakuꞌ u̱nꞌ, pi̱a̱ꞌun? ―ni̱ kachi̱ a̱.

Te̱ ni̱ na̱kui̱i̱n ñaꞌ ja̱a̱nꞌ ndii:

―Xakuꞌ i̱ sa̱kanꞌ ña̱ ni̱ na̱ꞌi̱n te̱ yivi̱ꞌ ñu̱ꞌuꞌ ndeꞌi̱ xto̱ꞌo̱ i̱, te̱ xïní i̱ miiꞌ ni̱ chi̱ka̱nduꞌu̱ꞌ ra̱ a̱ ―ni̱ kachi̱ aꞌ.

14 Kii̱ꞌ ndi̱ꞌi̱ ni̱ kaꞌa̱n aꞌ ña̱ ja̱a̱nꞌ, te̱ ni̱ na̱ko̱to̱ xata̱ꞌ aꞌ ndii, ni̱ xi̱ni̱ aꞌ iinꞌ Jesús i̱kanꞌ, ndisu̱ nï̱ na̱ku̱ni̱ ña̱ꞌaꞌ aꞌ. 15 Te̱ ni̱ nda̱tuꞌu̱nꞌ ña̱ꞌaꞌ Jesús ndii:

―¿Ndichun na xakuꞌ u̱nꞌ, pi̱a̱ꞌun? ¿Yo̱o̱ nandukuꞌ u̱nꞌ? ―ni̱ kachi̱ a̱.

Te̱ ni̱ xa̱ni̱ni̱ ñaꞌ ja̱a̱nꞌ ña̱ tee̱ꞌ te̱ xitoꞌ ña̱ ta̱ta̱ ja̱a̱nꞌ nduuꞌ ra̱, sa̱kanꞌ na ni̱ kaꞌa̱n aꞌ xiinꞌ ra̱ ndii:

―Tákuiꞌe, naaꞌ yoꞌó ni̱ na̱ꞌi̱n a̱ ndii, kaꞌa̱n u̱nꞌ xiinꞌ i̱ miiꞌ ni̱ chi̱ka̱nduꞌu̱ꞌ u̱nꞌ a̱, te̱ kuꞌu̱n na̱ꞌi̱n e̱ ―ni̱ kachi̱ aꞌ.

16 Te̱ ni̱ kaꞌa̱n Jesús xiinꞌ aꞌ ndii:

―María ―ni̱ kachi̱ a̱.

I̱kanꞌ te̱ ni̱ na̱ndi̱koꞌ kuiín aꞌ, te̱ ni̱ kaꞌa̱n aꞌ tu̱ꞌu̱n hebreo xiinꞌ a̱ ndii:

―Raboni ―ni̱ kachi̱ aꞌ. Te̱ ña̱ ja̱a̱nꞌ kuni kachi̱ a̱ maestro.

17 I̱kanꞌ te̱ ni̱ kaꞌa̱n Jesús xiinꞌ aꞌ ndii:

―Töndi̱a̱ u̱nꞌ yuꞌu̱, sa̱kanꞌ ña̱ tïa̱ꞌan ka̱a̱ i̱ nuu̱ꞌ yu̱vaꞌ i̱. Ndisu̱ kuaꞌan miiꞌ ndieeꞌ ña̱ni̱ i̱, te̱ kaꞌa̱n u̱nꞌ xiinꞌ ra̱ ndii: “Xa̱ kuaꞌa̱n ka̱a̱ i̱ nuu̱ꞌ yu̱vaꞌ i̱, ña̱ nduuꞌ tu̱ yu̱vaꞌ ndoꞌó, nuu̱ꞌ Ndiosí i̱, ña̱ nduuꞌ tu̱ Ndiosí ndoꞌó” ―ni̱ kachi̱ a̱.

18 Sa̱kanꞌ te̱ kuaꞌa̱n María Magdalena miiꞌ ndieeꞌ te̱ nda̱ꞌaꞌ xaꞌa̱ꞌ a̱ te̱ kaꞌa̱n aꞌ xiinꞌ ra̱ ña̱ ni̱ xi̱ni̱ aꞌ xto̱ꞌo̱ e̱ꞌ, te̱ nda̱tuꞌunꞌ tu̱ aꞌ nuu̱ꞌ ra̱ sa̱kuuꞌ ña̱ ni̱ kaꞌa̱n ña̱ ja̱a̱nꞌ xiinꞌ aꞌ.

19 Kii̱ꞌ ni̱ xa̱ꞌaꞌ kuñu̱u xa̱kuaa̱ꞌ kivi̱ꞌ nu̱uꞌ xaꞌa̱ꞌ xi̱mana ja̱a̱nꞌ ndii, ndasi kutu̱ꞌ yiꞌeꞌ vi̱ꞌe̱ miiꞌ ndieeꞌ te̱ nda̱ꞌaꞌ xaꞌa̱ꞌ Jesús xaꞌa̱ꞌ a̱ ña̱ yiꞌvi ra̱ te̱ judío kuuꞌ nu̱uꞌ. Sa̱kanꞌ te̱ ni̱ nda̱ꞌni̱ Jesús vi̱ꞌe̱ ja̱a̱nꞌ, te̱ ni̱ xi̱kuii̱n a̱ ma̱ꞌinꞌ ra̱, te̱ ni̱ kaꞌa̱n a̱ xiinꞌ ra̱ ndii:

―Na ko̱o̱ na ña̱ mani̱ꞌ xiinꞌ nimá ndo̱ꞌ ―ni̱ kachi̱ a̱.

20 Ndi̱ꞌi̱ so̱ꞌo̱ ni̱ kaꞌa̱n a̱ ña̱ ja̱a̱nꞌ, te̱ ni̱ niaꞌa̱ a̱ nda̱ꞌaꞌ a̱ xiinꞌ to̱koꞌ a̱ nuu̱ꞌ ra̱. Te̱ ni̱ na̱kua̱tiaꞌ va̱ ra̱ kii̱ꞌ ni̱ xi̱ni̱ ra̱ xto̱ꞌo̱ e̱ꞌ. 21 Te̱ ni̱ kaꞌa̱n tu̱ku̱u̱ Jesús xiinꞌ ra̱ ndii:

―Na ko̱o̱ na ña̱ mani̱ꞌ xiinꞌ nimá ndo̱ꞌ. Sa̱a̱ niiꞌ ni̱ ti̱ꞌviꞌ yu̱vaꞌ e̱ꞌ Ndiosí yuꞌu̱ te̱ kaꞌa̱n ndo̱so̱ꞌ i̱ xaꞌa̱ꞌ a̱ ndii, niiꞌ sa̱kanꞌ tiꞌviꞌ tu̱ yuꞌu̱ ndoꞌó te̱ kaꞌa̱n ndo̱so̱ꞌ ndo̱ꞌ xaꞌa̱ꞌ i̱ ―ni̱ kachi̱ a̱.

22 Te̱ kii̱ꞌ ndi̱ꞌi̱ ni̱ kaꞌa̱n a̱ ña̱ ja̱a̱nꞌ ndii, ni̱ ko̱ndi̱a̱ tachi̱ꞌ yu̱ꞌuꞌ ña̱ꞌaꞌ a̱, te̱ ni̱ kaꞌa̱n a̱ xiinꞌ ra̱ ndii:

―Na̱ti̱i̱n ndo̱ꞌ Espíritu Santo. 23 Yo̱o̱ ka̱ ko̱o̱ kaꞌnuꞌ i̱ni̱ ndo̱ꞌ xaꞌa̱ꞌ kua̱chi̱ ndii, ko̱o̱ kaꞌnuꞌ tu̱ i̱ni̱ Ndiosí xaꞌa̱ꞌ kua̱chi̱ ni̱a̱, te̱ yo̱o̱ ka̱ kö̱o̱ꞌ kaꞌnuꞌ i̱ni̱ ndo̱ꞌ xaꞌa̱ꞌ kua̱chi̱ ndii, kö̱o̱ꞌ kaꞌnuꞌ tu̱ i̱ni̱ Ndiosí xaꞌa̱ꞌ kua̱chi̱ ni̱a̱ ―ni̱ kachi̱ a̱.

24 I̱i̱n te̱ uxi̱ uvi̱ te̱ nda̱ꞌaꞌ xaꞌa̱ꞌ Jesús, te̱ naniꞌ Tomás, te̱ na̱niꞌ tu̱ te̱ kuate ndii, kö̱o̱ꞌ ra̱ nduꞌu̱ꞌ xiinꞌ i̱nga̱ te̱ nda̱ꞌaꞌ xaꞌaꞌ a̱ ja̱a̱nꞌ kii̱ꞌ ni̱ ki̱xi̱n a̱ nuu̱ꞌ te̱ ja̱a̱nꞌ. 25 Sa̱kanꞌ na ni̱ kaꞌa̱n i̱nga̱ te̱ nda̱ꞌaꞌ xaꞌa̱ꞌ a̱ ja̱a̱nꞌ xiinꞌ ra̱ ndii:

―Ni̱ xi̱ni̱ ndu̱ xto̱ꞌo̱ e̱ꞌ ―ni̱ kachi̱ ra̱.

Ndisu̱ ni̱ kaꞌa̱n Tomás xiinꞌ ra̱ ndii:

―Naaꞌ kü̱ni̱ i̱ miiꞌ niaꞌá ni̱ ku̱xi̱ ra̱ clavo nda̱ꞌaꞌ a̱, te̱ tu̱vi̱ i̱ nuu̱ꞌ nda̱ꞌaꞌ i̱ i̱kanꞌ, te̱ se̱ꞌvi tu̱ i̱ nda̱ꞌaꞌ i̱ to̱koꞌ a̱ miiꞌ ni̱ tu̱xuꞌví a̱ ndii, kä̱ndi̱xaꞌ xa̱chiꞌ i̱ ―ni̱ kachi̱ ra̱.

26 Kii̱ꞌ ni̱ yaꞌa̱ uni̱a̱ kivi̱ꞌ, te̱ ndieeꞌ tukuuꞌ te̱ nda̱ꞌaꞌ xaꞌa̱ꞌ a̱ ja̱a̱nꞌ ti̱xi̱n vi̱ꞌe̱ ja̱a̱nꞌ, te̱ nduꞌu̱ꞌ tu̱ Tomás xiinꞌ ra̱ kii̱ꞌ sa̱kanꞌ. Tee̱ꞌ ndee ni̱ nda̱si̱ kutu̱ꞌ yiꞌeꞌ vi̱ꞌe̱ ja̱a̱nꞌ ndii, ni̱ xa̱a̱ Jesús, te̱ ni̱ xi̱kuii̱n a̱ ma̱ꞌinꞌ ra̱ ti̱xi̱n vi̱ꞌe̱ ja̱a̱nꞌ, te̱ ni̱ na̱kua̱tu̱ ña̱ꞌaꞌ a̱ kaꞌán a̱ ndii:

―Na ko̱o̱ na ña̱ mani̱ꞌ xiinꞌ nimá ndo̱ꞌ ―ni̱ kachi̱ a̱.

27 Sa̱kanꞌ te̱ ni̱ kaꞌa̱n a̱ xiinꞌ Tomás ndii:

―Tu̱vi̱ nuu̱ꞌ nda̱ꞌaꞌ u̱nꞌ yoꞌoꞌ, te̱ ko̱to̱ u̱nꞌ nda̱ꞌaꞌ i̱, sa̱na̱kaá u̱nꞌ nda̱ꞌaꞌ u̱nꞌ, te̱ tu̱vi̱ u̱nꞌ u̱n to̱koꞌ i̱ miiꞌ ni̱ tu̱xuꞌví i̱. Te̱ kü̱ndu̱u̱ ka̱ u̱nꞌ te̱ kändixaꞌ, süu̱ꞌ ja̱a̱nꞌ ndii ku̱ndu̱u̱ u̱nꞌ i̱i̱n te̱ ka̱ndi̱xaꞌ ―ni̱ kachi̱ a̱.

28 I̱kanꞌ te̱ ni̱ kaꞌa̱n Tomás xiinꞌ a̱ ndii:

―Xto̱ꞌo̱ mi̱iꞌ i̱ nduuꞌ yoꞌó, te̱ Ndiosí mi̱iꞌ tu̱ i̱ nduuꞌ u̱nꞌ ―ni̱ kachi̱ ra̱.

29 Te̱ ni̱ kaꞌa̱n Jesús xiinꞌ ra̱ ndii:

―Kandixaꞌ u̱nꞌ vi̱ti̱n xaꞌa̱ꞌ a̱ ña̱ ni̱ xi̱ni̱ ndu̱chiꞌ nuu̱ꞌ u̱nꞌ yuꞌu̱, ndisu̱ sañuꞌuꞌ va̱ Ndiosí ne̱ kandixaꞌ tee̱ꞌ ndee nï̱ xi̱ni̱ ni̱a̱ yuꞌu̱ ―ni̱ kachi̱ a̱.

30 Ni̱ xa̱a̱ tu̱ Jesús kuaꞌa̱ꞌ ka̱ chu̱u̱n kaꞌnuꞌ nuu̱ꞌ te̱ nda̱ꞌaꞌ xaꞌa̱ꞌ a̱, te̱ nï̱ keꞌi̱ sa̱kuuꞌ a̱ nuu̱ꞌ tu̱tu̱ yo̱ꞌo̱. 31 Ndisu̱ ni̱ keꞌi̱ ña̱ yo̱ꞌo̱ꞌ te̱ ka̱ndi̱xaꞌ ndoꞌó ña̱ Jesús nduuꞌ Cristo, ña̱ sakakú yooꞌ, te̱ su̱vi̱ tu̱ a̱ nduuꞌ siꞌe̱ Ndiosí. Te̱ naaꞌ kandixaꞌ ña̱ꞌaꞌ ndo̱ꞌ ndii, na̱ti̱i̱n ndo̱ꞌ kivi̱ꞌ ñu̱u̱ ña̱ kö̱o̱ꞌ kivi̱ꞌ ndiꞌiꞌ xiinꞌ ña̱ ndi̱e̱eꞌ a̱.