1 Ni̱ yaꞌa̱ ña̱ ja̱a̱nꞌ, te̱ ni̱ sa̱tuví xiinꞌ miiꞌ tukuuꞌ Jesús nuu̱ꞌ te̱ nda̱ꞌaꞌ xaꞌa̱ꞌ a̱ yu̱ꞌuꞌ mi̱ni̱ Tiberias. So̱ꞌo̱ ni̱ xa̱a̱ a̱. 2 Ñuꞌuꞌ ingaꞌ te̱ nda̱ꞌaꞌ xaꞌa̱ꞌ a̱, te̱ nduuꞌ Simón Pedro, xiinꞌ Tomás, te̱ na̱niꞌ tu̱ te̱ kuate, xiinꞌ Natanael, te̱ ni̱ ki̱e̱e̱ ñu̱u̱ Caná, ña̱ naá nuu̱ꞌ ñu̱ꞌuꞌ Galilea, xiinꞌ uvi̱ ta̱ꞌan tiaa̱ siꞌe̱ Zebedeo, xiinꞌ i̱nga̱ uvi̱ ta̱ꞌan ka̱ te̱ nda̱ꞌaꞌ xaꞌa̱ꞌ a̱. 3 Sa̱kanꞌ te̱ ni̱ kaꞌa̱n Simón Pedro xiinꞌ te̱ ja̱a̱nꞌ ndii:

―Kuꞌu̱n ta̱va̱ꞌ i̱ ―ni̱ kachi̱ ra̱.

Te̱ ni̱ kaꞌa̱n te̱ ja̱a̱nꞌ xiinꞌ ra̱ ndii:

―Kuꞌu̱n tu̱ nduꞌu̱ xiinꞌ u̱nꞌ ―ni̱ kachi̱ ra̱.

Te̱ ni̱ ki̱e̱e̱ ra̱ kuaꞌa̱n ra̱, te̱ ni̱ ko̱ꞌni̱ ra̱ ti̱xi̱n i̱i̱n tundo̱oꞌ, ndisu̱ niiꞌ ñu̱u ja̱a̱nꞌ kö̱o̱ꞌ xa̱chiꞌ ti̱a̱kaꞌ ni̱ ta̱va̱ꞌ ra̱. 4 Te̱ kii̱ꞌ xa̱ kitúꞌ ndii, ni̱ xi̱ni̱ ra̱ iinꞌ Jesús yu̱ꞌuꞌ mi̱ni̱ ja̱a̱nꞌ, ndisu̱ nï̱ na̱ku̱ni̱ ña̱ꞌaꞌ ra̱. 5 Te̱ ni̱ kaꞌa̱n Jesús xiinꞌ ra̱ ndii:

―Pi̱a̱ꞌun, ¿ñáá xa̱ ni̱ ta̱va̱ꞌ ndo̱ꞌ ti̱a̱kaꞌ ku̱xi̱ ndo̱ꞌ? ―ni̱ kachi̱ a̱.

Te̱ ni̱ kaꞌa̱n ra̱ xiinꞌ a̱ ndii:

―Kö̱o̱ꞌ riꞌ ―ni̱ kachi̱ ra̱.

6 Te̱ ni̱ kaꞌa̱n a̱ xiinꞌ ra̱ ndii:

―Sko̱ꞌniꞌ ndo̱ꞌ ñu̱nu̱ꞌ ndo̱ꞌ xi̱i̱nꞌ kua̱ꞌa̱ tundo̱oꞌ ñaa̱ꞌ te̱ ta̱va̱ꞌ ndo̱ꞌ riꞌ ―ni̱ kachi̱ a̱.

Sa̱kanꞌ te̱ ni̱ sko̱ꞌniꞌ ra̱ a̱ i̱kanꞌ, te̱ ni̱ se̱kun ra̱ kuaꞌa̱ꞌ kooꞌ chukuuꞌ riꞌ nde̱e̱ kü̱vi̱ ka̱ xta̱ꞌniꞌ ra̱ ñu̱nu̱ꞌ ja̱a̱nꞌ ti̱kui. 7 Te̱ te̱ nda̱ꞌaꞌ xaꞌa̱ꞌ a̱, te̱ ndani̱ a̱, ni̱ kaꞌa̱n xiinꞌ Pedro ndii:

―Xto̱ꞌo̱ e̱ꞌ Jesús nduuꞌ ña̱ iinꞌ kaa̱ꞌ ―ni̱ kachi̱ ra̱.

Kii̱ꞌ ni̱ xi̱ni̱ so̱ꞌo̱ Simón Pedro ña̱ xto̱ꞌo̱ e̱ꞌ Jesús nduuꞌ ña̱ ja̱a̱nꞌ ndii, xa̱kaꞌán e̱ꞌ, te̱ ni̱ na̱kuiꞌnu̱ ra̱ toto̱ ra̱, sa̱kanꞌ ña̱ xa̱ ni̱ ta̱va̱ꞌ ra̱ a̱, te̱ ni̱ sko̱ꞌnuꞌ kiꞌi̱ꞌ va̱ ra̱ mi̱ni̱ ja̱a̱nꞌ te̱ xaa̱ ra̱ miiꞌ iinꞌ a̱. 8 Te̱ i̱nga̱ te̱ nda̱ꞌaꞌ xaꞌa̱ꞌ a̱ ndii, ni̱ ki̱xi̱n mi̱iꞌ ra̱ xiinꞌ tundo̱oꞌ ja̱a̱nꞌ kañuuꞌ ra̱ ñu̱nu̱ꞌ ti̱a̱kaꞌ, sa̱kanꞌ ña̱ xa̱ku̱ꞌ xikaꞌ ñuꞌuꞌ ra̱ yu̱ꞌuꞌ mi̱ni̱, yatinꞌ ciento metro kui̱ti̱ꞌ xikaꞌ. 9 Kii̱ꞌ ni̱ nu̱u̱ ra̱ ñu̱ꞌuꞌ ndii, ni̱ xi̱ni̱ ra̱ ñuꞌu̱ ti̱keí, te̱ kanuꞌ i̱i̱n ti̱a̱kaꞌ yatanꞌ riꞌ, te̱ ni̱ xi̱ni̱ tu̱ ra̱ i̱i̱n xita̱ꞌ va̱ꞌa̱. 10 Te̱ ni̱ kaꞌa̱n Jesús xiinꞌ ra̱ ndii:

―Ta̱xi̱ ndo̱ꞌ sa̱va̱ ti̱a̱kaꞌ, tiꞌ sa̱kanꞌ ni̱ ta̱va̱ꞌ ndo̱ꞌ ñaa̱ꞌ ―ni̱ kachi̱ a̱.

11 Sa̱kanꞌ na ni̱ sko̱ꞌnuꞌ Simón Pedro ti̱xi̱n tundo̱oꞌ, te̱ ni̱ xi̱ta̱ꞌ ra̱ ñu̱nu̱ꞌ ja̱a̱nꞌ nde̱e̱ yu̱ꞌuꞌ mi̱ni̱ miiꞌ i̱chi kaaꞌ, te̱ chituꞌ vi̱ꞌ a̱ ñuꞌuꞌ ti̱a̱kaꞌ naꞌnuꞌ. Ciento uvi̱ xi̱ko̱ uxi̱ uni̱ kuuꞌ riꞌ, tee̱ꞌ ndee kuaꞌa̱ꞌ yaꞌa̱ riꞌ ndii, nï̱ tiaꞌndiá ñu̱nu̱ꞌ ja̱a̱nꞌ. 12 Te̱ ni̱ kaꞌa̱n Jesús xiinꞌ ra̱ ndii:

―Ni̱a̱ꞌa̱ ndo̱ꞌ, te̱ ku̱xi̱ ndo̱ꞌ ―ni̱ kachi̱ a̱.

Te̱ nde̱e̱ i̱i̱n te̱ nda̱ꞌaꞌ xaꞌa̱ꞌ a̱ ja̱a̱nꞌ nï̱ ku̱ndi̱e̱ni nda̱tuꞌu̱nꞌ ña̱ꞌaꞌ yo̱o̱ nduuꞌ a̱, sa̱kanꞌ ña̱ xa̱ xiní ra̱ ña̱ xto̱ꞌo̱ e̱ꞌ nduuꞌ a̱. 13 Sa̱kanꞌ te̱ ni̱ ku̱ya̱ti̱n Jesús, te̱ ni̱ na̱ꞌi̱n a̱ xita̱ꞌ va̱ꞌa̱, te̱ ni̱ ta̱xi̱ ña̱ꞌaꞌ a̱ nda̱ꞌaꞌ ra̱, te̱ sa̱kanꞌ tu̱ ni̱ xa̱a̱ a̱ xiinꞌ ti̱a̱kaꞌ. 14 Ña̱ yo̱ꞌo̱ꞌ nduuꞌ i̱chiꞌ ña̱ uni̱ ña̱ ni̱ tuvi̱ Jesús nuu̱ꞌ te̱ nda̱ꞌaꞌ xaꞌa̱ꞌ a̱ nde̱e̱ kii̱ꞌ ni̱ na̱ti̱a̱ku̱ a̱.

15 Kii̱ꞌ ndi̱ꞌi̱ ni̱ xi̱xi̱ ra̱, te̱ ni̱ nda̱tuꞌu̱nꞌ Jesús Simón Pedro ndii:

―Simón, siꞌe̱ Jonás, ¿ñáá ndani̱ kuaꞌa̱ꞌ ka̱ u̱nꞌ yuꞌu̱ te̱ sa̱kanꞌ ña̱ ndani̱ u̱nꞌ te̱ yoꞌoꞌ? ―ni̱ kachi̱ a̱.

Te̱ ni̱ kaꞌa̱n ra̱ xiinꞌ a̱ ndii:

―U̱u̱n ndo̱ꞌ, tákuiꞌe, xiní u̱nꞌ ña̱ ndani̱ i̱ yoꞌó ―ni̱ kachi̱ ra̱.

Te̱ ni̱ kaꞌa̱n a̱ xiinꞌ ra̱ ndii:

―Ko̱to̱ ne̱ nduuꞌ kuenta i̱ nde̱e̱ naa xitoꞌ i̱i̱n te̱ yivi̱ꞌ mbe̱e̱ sana̱ ra̱ ―ni̱ kachi̱ a̱.

16 Te̱ ni̱ nda̱tuꞌu̱nꞌ tukuuꞌ ña̱ꞌaꞌ a̱ i̱chiꞌ ña̱ uvi̱ ndii:

―Simón, siꞌe̱ Jonás, ¿ñáá ndani̱ va̱ u̱nꞌ yuꞌu̱? ―ni̱ kachi̱ a̱.

Te̱ ni̱ kaꞌa̱n ra̱ xiinꞌ a̱ ndii:

―U̱u̱n ndo̱ꞌ, tákuiꞌe, xiní u̱nꞌ ña̱ ndani̱ i̱ yoꞌó ―ni̱ kachi̱ ra̱.

Te̱ ni̱ kaꞌa̱n a̱ xiinꞌ ra̱ ndii:

―Ko̱to̱ u̱nꞌ ne̱ nduuꞌ kuenta i̱ nde̱e̱ naa xaaꞌ i̱i̱n te̱ xitoꞌ mbe̱e̱ sana̱ ra̱ ―ni̱ kachi̱ a̱.

17 Te̱ ni̱ kaꞌa̱n ni̱ tu̱ku̱u̱ a̱ xiinꞌ ra̱ i̱chiꞌ ña̱ uni̱ ndii:

―Simón, siꞌe̱ Jonás, ¿ñáá ndani̱ u̱nꞌ yuꞌu̱? ―ni̱ kachi̱ a̱.

Te̱ ni̱ ku̱suchiꞌ va̱ i̱ni̱ ra̱ xaꞌa̱ꞌ a̱ ka̱ xa̱ uni̱ i̱chiꞌ ni̱ nda̱tuꞌu̱nꞌ ña̱ꞌaꞌ a̱ naaꞌ ndani̱ ña̱ꞌaꞌ ra̱. Sa̱kanꞌ na ni̱ kaꞌa̱n ra̱ xiinꞌ a̱ ndii:

―Tákuiꞌe, sa̱kuuꞌ ña̱ yoo xiní yoꞌó, sa̱kanꞌ na kuiiꞌ xiní u̱nꞌ ña̱ ndani̱ yuꞌu̱ yoꞌó ―ni̱ kachi̱ ra̱.

Te̱ ni̱ kaꞌa̱n Jesús xiinꞌ ra̱ ndii:

―Ko̱to̱ u̱nꞌ ne̱ nduuꞌ kuenta i̱ nde̱e̱ naa xaaꞌ i̱i̱n te̱ xitoꞌ mbe̱e̱ sana̱ ra̱. 18 Ña̱ nda̱ku kaꞌán i̱ xiinꞌ u̱nꞌ ña̱ kii̱ꞌ ni̱ nduu̱ u̱nꞌ te̱ sa̱va̱ ndii, ni̱ na̱kuiꞌnu̱ mi̱iꞌ u̱nꞌ toto̱ u̱nꞌ, te̱ ni̱ xaꞌa̱n u̱nꞌ miiꞌ ka̱ ni̱ kuni̱ nimá u̱nꞌ, ndisu̱ kii̱ꞌ kui̱xa̱ u̱nꞌ ndii, ka̱ta̱ni̱ u̱nꞌ nda̱ꞌaꞌ u̱nꞌ, te̱ i̱nga̱ ne̱ yivi̱ꞌ sa̱na̱kuiꞌnú yoꞌó toto̱ u̱nꞌ, te̱ kuꞌu̱n ni̱a̱ xiinꞌ u̱nꞌ miiꞌ küní kuꞌu̱n u̱nꞌ ―ni̱ kachi̱ a̱.

19 Ni̱ kaꞌa̱n Jesús ña̱ ja̱a̱nꞌ, te̱ niaꞌa̱ a̱ sa̱a̱ ku̱ndo̱ꞌo̱ ra̱ kii̱ꞌ ku̱vi̱ ra̱, te̱ xiinꞌ ña̱ ja̱a̱nꞌ na̱ti̱i̱n Ndiosí ña̱ tiinꞌ kaꞌnuꞌ. Te̱ ni̱ kaꞌa̱n ka̱ a̱ xiinꞌ ra̱ ndii:

―Ku̱ndiku̱n i̱chiꞌ i̱ ―ni̱ kachi̱ a̱.

20 Sa̱kanꞌ te̱ ni̱ na̱ko̱to̱ xata̱ꞌ Pedro, te̱ ni̱ xi̱ni̱ ra̱ i̱nga̱ te̱ nda̱ꞌaꞌ xaꞌa̱ꞌ Jesús, te̱ ndani̱ ka̱ a̱, ndikún ra̱ xata̱ꞌ kua̱xi̱ ra̱. Te̱ ja̱a̱nꞌ nduuꞌ te̱ ni̱ ku̱ya̱ti̱n nuu̱ꞌ Jesús, te̱ ni̱ nda̱tuꞌu̱nꞌ ña̱ꞌaꞌ ra̱ kii̱ꞌ ndieeꞌ ra̱ xixiꞌ ra̱ ndii: “¿Yo̱o̱ nduuꞌ te̱ sa̱na̱kuaꞌa yoꞌó nda̱ꞌaꞌ te̱ kuuꞌ kaꞌnuꞌ tákuiꞌe?”, ni̱ kachi̱ ra̱. 21 Te̱ ni̱ nda̱tuꞌu̱nꞌ Pedro Jesús kii̱ꞌ ni̱ xi̱ni̱ ra̱ te̱ ja̱a̱nꞌ ndii:

―Tákuiꞌe, te̱ te̱ kaa̱ꞌ, ¿ndee ña̱ ku̱ndo̱ꞌo̱ ra̱? ―ni̱ kachi̱ ra̱.

22 Te̱ ni̱ kaꞌa̱n Jesús xiinꞌ ra̱ ndii:

―Naaꞌ kuní i̱ ña̱ tiaku ra̱ nde̱e̱ kii̱ꞌ na̱ndi̱koꞌ i̱ i̱i̱n yivi̱ꞌ yoꞌoꞌ ndii, ¿yo̱o̱ nduuꞌ a̱ ndiꞌni̱ yoꞌó? Yoꞌó ndii, ku̱ndiku̱n i̱chiꞌ i̱ ―ni̱ kachi̱ a̱.

23 Xaꞌa̱ꞌ a̱ ja̱a̱nꞌ na ni̱ kiku̱ kuento te̱i̱n ña̱ni̱ taꞌanꞌ e̱ꞌ ña̱ kü̱vi̱ te̱ nda̱ꞌaꞌ xaꞌa̱ꞌ a̱ ja̱a̱nꞌ, ndisu̱ nï̱ kaꞌa̱n Jesús ña̱ kü̱vi̱ ra̱, süu̱ꞌ ja̱a̱nꞌ ndii ni̱ kaꞌa̱n a̱ ndii: “Naaꞌ kuní i̱ ña̱ tiaku ra̱ nde̱e̱ kii̱ꞌ na̱ndi̱koꞌ i̱ i̱i̱n yivi̱ꞌ yoꞌoꞌ ndii, ¿yo̱o̱ nduuꞌ a̱ ndiꞌni̱ yoꞌó?”, ni̱ kachi̱ a̱.

24 Te̱ nda̱ꞌaꞌ xaꞌa̱ꞌ a̱ ja̱a̱nꞌ nduuꞌ te̱ ndieeꞌ yu̱ꞌuꞌ xaꞌa̱ꞌ sa̱kuuꞌ ña̱ ja̱a̱nꞌ, te̱ ni̱ ke̱ꞌi̱ ra̱ a̱, te̱ xiní e̱ꞌ ña̱ ña̱ ndi̱xa̱ ndieeꞌ yu̱ꞌuꞌ ra̱. 25 Te̱ yoo kuaꞌa̱ꞌ ka̱ ña̱ ni̱ xa̱a̱ Jesús. Sa̱kanꞌ na kuiiꞌ naaꞌ ni̱ xikoso̱ꞌ i̱ꞌi̱n ña̱ ja̱a̱nꞌ nuu̱ꞌ tu̱tu̱ ndii, tuu yuꞌu̱ ña̱ nï̱a̱ni̱ nuu̱ꞌ ñu̱ꞌuꞌ i̱i̱n yivi̱ꞌ ku̱ndi̱e̱e̱ tu̱tu̱ ña̱ kaꞌán xaꞌa̱ꞌ a̱ naaꞌ sa̱kanꞌ te̱ ni̱ keꞌi̱ a̱. Sa̱kanꞌ na ku̱ndu̱u̱ a̱.