Kijilikoau Keiou jang John
1 JOHN
Oarlap in Kijilikoau oauwe
Nehn Kijilikoau Keiou jang John mine irair kajampwal riau: keiou, kangoange irai kan ma pirin wadek kijilikoau kije nehn mourin minmin oang Koahs apel Nah Iehroj Jesus Christ; kariau, poanoauwihki irai pwa irai en joah idawen padahk likamw pwi ma pirin koauwehla minmin oauwe. Padahk likamw pwiai sapjang nehn padahk ma pwa nauna kin injang ipen armaj ma kin oauwoang jampah, ioar ma kahrehda Jesus, Nihn Koahs, johkak uhdahn wiahla armaj. Jounpadahk pwiok kin sikoa pwa ma armaj emen pirin koamoaurla nen johla anahne injinohki ah mour in jampah oauwe; irai pel kin padahki pwa koamoaurlahn armaj men johpwa kin pid mwomwen ahr siahk pwung ke japwung kan ke limpoak oang mihn iparai kan.
Pwa en pallanda padahk oauwe, jouninsinngo kajalehda in dehde pwa Jesus wiahla uhdahn armaj; ih ken pel sihkeiki pwa armaj ohroj ma kin pwojon Jesus apel limpoak oang Koahs, irai uhdahn pirin pel limpoakpene.
Audoapoa in Oarlap
Sapin kijilikoau 1.1-4
Maram apel ros 1.5—2.29
Nihn Koahs jerihkan apel nihn Jehsen 3.1-24
Mehlel apel likamw 4.1-6
Pwukoahn limpoak 4.7-21
Pwojon ma kin kalwehdi 5.1-21
1
Mahjanin Mour
1 Kamai insingkihwehng kamwai doahr Mahjanin mour ma ne minmine jang in sapin kawahu lel apkas: kamai ne rong, kamai ne pel kapangki mijamaikai; kamai ne kapang, apel ne pel pukkoangki poahmaikai. 2 Nehn mour oauwe ma ne janjalda, kamai ne kapang, kamai ne pel kadehdehda, ne padahkihoang kamwai doahr mour joahsuk ma kin minmine ipen Jahmmo, ma ne pel janjaloang kisai. 3 Dahkij ma kamai ne kapang apel ne rong ioar ma kamai pel padahkihoang kamwai; pwa kamwai en pwili kamai minmin oang Jahmmo apel Nah Iehroj Jesus Christ. 4 Kamai ne insingehdi mehpwiai pwa asai*asai malau en unjekla.
Koahs Ioar Maram
5 Ioar padahk wa me ma kamai ne rongjang Nihn Koahs Iehrojjo, apkas kamai pel padahkihoang kamwai: Koahs ioar maram, apel johpwa ros kij mine ipoa. 6 Doar ma kisai sikoa pwa kisai minmin oang Ih, a kisai pwen mohmohmour nehn ros, kisai pwen likamw nehn asai lallal apel nehn asai wihwia kan. 7 A ma kisai kin mour nehn maram, doahroar ih ma minmine nehn maram, doari kisai kin minminpene, apel insahn Nah Iehrojjo Jesus kin kamwkelehjang kisai nehn dipasai kan ohroj.
8 Ma kisai sikoa pwa joh dipasai, kisai kin pwen kapweipwei pein kisai, apel johpwa mehlel mine ipasai. 9 A ma kisai woahkdahng Koahs dipasai kan, Ih pirin kapwaihahda Ah inoau apel pirin wia me pwung: Ih pirin mahkoahng dipasai kan apel kamwkelehda asai japwung kan ohroj. 10 Ma kisai sikoa pwa kisai johpwa kin wia dihp; kisai kalikamwe Koahs apel Ah Mahjan johpwa mine ipasai.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.