Rongmwehu ma Insingdi jang ipen
John
Oarlap en Puk oauwe
Rongmwehu in John kajalehda doahroar Jesus ma ioar Mahjan in Koahs joahsuk, ma “ken wiahla armaj apel minmine ipasai.” Ma doahroar puk oauwe ah pwa, pukin Rongmwehu oauwe insingdi pwa irai kan ma pirin wadek, irai en pwojon pwa Jesus, ioar Ih Jounkoamoaurwa ma inoaupoa ne wiawi, ioar ih Nihn Koahs, ma irai pwojon Ih, irai en ankihla mour (20.31).
Mwerin iroa siksik kan ma kajalehda in sapin puk oauwe doahroar Mahjan in Koahs joahsuk ioar Jesus, loap keiouin Rongmwehu oauwe sikoahda doahroar kilel (ke manman pwi) ma kadehdehda pwa Jesus, ioar Ih Nihn Koahs, Jounkoamoaurwa ma inoaupoa ne wiawi mehjwa. A doar mwuhr, kapahrak pwi ma ne wiawi ma kawoahwoahda mourin kilellok. Loapin puk oauwe pel kajalehda doahroar armaj pwi ahr pwojonla Jesus apel wiahla nah sohnpadahk, a epwi uhwoang Jesus apel joah kamehlele. Iroa koalik 13-17 sikoa doahroar en Jesus apel nah sohnpadahkkok arai minminpene mehlel inpwonngo ma mihn Jew‑ok pirin joalihdi Ih, apel doahroar Ah lal en koaunop apel kangoange irai mwohn Ah pirin mehdi in lohpwuhwo. A iroa koalik kan ma kadoariheklahn puk oauwe, ioar sikesik in Jesus Ah joaldi apel koapwung mwohn Mwoalen koapwunngo, apel kalohpwuhla apel iejda, apel Ah pwokkoang Nah sohnpadahkkok mwerin Ah iejda.
Rongmwehu in John kin kawoahwoahda in mehlel kijakij ke kalahngan en mour joahsuk ma Christ kin kahrehioang kisai, kalahngan ma kin sapda anjoau oauwe apel kin aluhwoang irai kan ma kin wiahki Jesus arai al, ahr mehlel, apel ahr mour. Ma kin dehde mehlel doahroar Rongmwehu in John, ioar doahroar ah kin wiahki joang moangoai dir ma armaj ahnla anjoau ohroj kilelin padahk doahroar mehkan in pali ngen, doahroar pil, pilahwa, marain, jilepen jihpw apel nah pwihnin jihpw, apel suhkoahn wain apel wah kan.
Audoapoa in Oarlap
Sapin puk oauwe 1.1-18
John jounpoapdaij apel sapin sohnpadahk en Jesus 1.19-51
En Jesus doadoahk in pokon janjal 2.1—12.50
Koarjoahklahn rehn kan en mourin Jesus nehn Jerusalem apel wija kan ma koaroani 13.1—19.42
En Koaun Jesus Ah iejda apel pwokkoang Nahk 20.1-31
Koarjoahklahn puk oauwe: Jesus pel pwokkoang Nah ok nehn Galilee 21.1-25
1
Mahjanno in Mour
1 Mahjanno minmine ipen Koahs mwohn sapin kawa; pwa Mahjanno, ioar ma Koahs. 2 Ioar Ih ma minmine ipen Koahs mwohn sapin kawa. 3 Koahs wiahda meohroj ki Mahjanno: a joh mehkij mine ma Mahjanno joah wiahda. 4 Mahjanno ioar ma poahjoan in mour; a mour oauwe, ioar ma kin kamaramihda armaj kan. 5 Maram oauwe ioar kin dakarda nehn ros, a rosso kin koauwehla.
6 Mine armaj men ma koadoaddoardo jang ipen Koahs, adanki John, 7 ma indoa pwa en kadehde Marammo, pwa ohroj en rong pakairro apel pwojonla. 8 Jaudi ih ma Maramma, a ih indoa pwa en kadehdehda doahroar Marammo. 9 Ih ioar Maram mehlelwa ma indoahng jampah pwa en kamaramihda armaj ohroj.
10 Mahjanno ne mine nehn jampah, mihndahr ma Koahs wiahda jampah ki Ih, jampah jehjoa Ih. 11 Ih indihdohng Ah wija, a sohn Ah wijahu johpwa kajamwo Ih. 12 A pwen joah, epwi ne kajamwo apel pwojonla. Doari, Ih ken kioang arai pwung in wiahla nihn Koahs. 13 Irai pwiai joah wiahla nihn Koahs jang in alin kanoaisikdihn armaj, pwa pein Koahs, ioar ma nainkihla irai.
14 Mahjanno ken wiahla armaj dirki kalahngan apel mehlel minmine ipasai. Kisai kapang Ah ling, linngo ma Ih oaloa, nehn Ah wia Nihn Jamahu Iehroj men, Nihn Jamahu.
15 John kadehdehda doahroar Ih in ngil koalik, “Ioar Woalwa me ma ngoahi siksikoa, ‘Ih indoa mwerin ngoahi, a Ih laplap jang ngoahi, pwa Ih ne mine oh mwohn oai noaisikdi.’ ”
16 Jang in dirin Ah kalahngan, Ih kapaiahki kisai joangoan kapai ohroj, oau mwerin oau, johkin uhdi. 17 Koahs kihdihdohng Moses audoapoan Kojonneddo, a kalahngan apel mehlel jang ipen Jesus Christ. 18 Joh armaj ne kapang Koahs. Nah Iehrojjo, ma doahroar Koahs, ma kin minmine ipen Jahmmo, Ih ioar kajalehioang armaj doahroar Koahs.
Padahk in John jounpoapdaij
19 Laplap in Jew‑ok nehn Jerusalem kadarla jamwrou pwi apel mihn Levi pwi pwa irai en idoak oang John, “Inje koawoa?”
20 John joah kia japoang, Ih sikoahda in janjal, “Jaudi ngoahi Messiah.”
21 Irai pel kalelpoak, “A da? Koawoa ma Elijah?”
John japoang irai, “Joah. Jaudi ngoahi ih.”
Irai pel kalelpoak, “Doar da? Koawoa Joukohppo?”*Joukohppo: Ma emen ma armaj kan kin kajkajik ma pirin indoa pwa en kalohkihdo indoahn Messiah‑o.
A Ih japoang, “Joah.”
22 Irai pwa, “Padahkihoang kamai inje koawoa, pwa kamai en kak japoangki iraihok ma kadardo kamai. Da koawoa pwahki pein koawoa?”
23 John japoang,
“Ngoahi ‘ngilloau ma poangpoangjili nehn japwsoahn:
Kamwai kainenehla alin Koaunno pwa ih en alu loaloa!’ ”
Doahr en joukohp Isaiah ne pwahla.
24 Sohnpakair pwiai ma koadoaddoardo jang ipen Pharisee‑ok, 25 idoak oang John, “A da kahrehda koawoa wihwiahki poapdaij, ma jaudi koawoa Messiah‑wa, ke Elijah, ke Joukohppo?”
26 John pel japoangki irai, “Ngoahi kin poapdaijki pil, a mine Emen ma minmine nehn pwungamwai kan, ma kamwai jehjoa, 27 Ih ma pirin indoa mwerin ngoahi a ngoahi joah warroang lapwadda joalin Ah juhwo.”
28 Mehpwiai ohroj ne wiawi nehn Bethany, palimese in Pillap Jordan, wijahu ma John kin wihwia ah poapdaij.
Simpwul in Koahs
29 Pwohrdahng rehnno, John kapangda Jesus ah allaluhdohng ipoa, Ih ken pwahla, “Kapang! Simpwul in Koahswa ma kin kihjang dipen jampah ohroj. 30 Ioar Ih woallo ma ngoahi siksikoa doahr nehn oai pwahla, ‘Woal men pirin indoa mwerin, ma laplapjang ngoahi, pwa Ih ne mine oh mwohn oai noaisikdi.’ 31 Pein ngoahi johpwa kidal Ih. A pwen ioar kahrpoan oai indoa apel poapdaijki pil, pwa en kajalehda Ih oang mihn Israel.”
32 Me ioar kadehde ma John pel kajalehda: “Ngoahi ne kapang Ngen Joarwiho Ah indihdo jang nehnloannge, in mwomwen mwurei men; ken minehla Ipoa. 33 Pein ngoahi jehjoa Ih, a Koahs, ma kadardo ngoahi pwa ngoahi en kin poapdaijki pil, Ih pel pwehng ngoahi, ‘Ma Emen ma koawoa pirin kapang Ngenno jokdi puwoa, ioar Ih ma pirin poapdaijki Ngen Joarwi.’ 34 Ngoahi ne kapang apel ngoahi ne pel kadehde pwa Ih ioar Nihn Koahs.”
Sapin Sohnpadahk in Jesus kan
35 Rehnno mwerin, John pwili mine wijahu, pwilihki nah sohnpadahk roahmen. 36 Nehn ah kapangda Jesus allaluhla ih pwa, “Ioar Simpwul in Koahs wa men.”
37 Sohnpadahk roahmenno rongda ah pwa me, ira ken kaujla Jesus 38 Jesus kapangda ira kahkahkaujla Ih, Ih idoaklahng ira, “dahkij kamwa raprapahki?” ira japoang, “Rabbi” (lalloauwe woahwoahki Jounpadahk), “ia wija Koawoa kin minmine?”
39 Ih japoang ira, “Kamwa indoa kapang.” Ira ken pwilihda ih kapangda wijahu ih kin minmine, ira ken minmine ipoa rehnno. (Pwa ne enken kiloak pahu mwerin‑jauwaj).
40 Andrew, rien Simon Peter ioar emen woal roahmenno ma rongda da John pwa ih ken pwilihla Jesus. 41 Andrew ken pispisinnoar rapahkihda riahu Simon, pel pwehng ih “Kamai ne kapangda Messiah‑wa!” (Woahwoahn Messiah ioar Christ) 42 Ih ken ukla ih ipen Jesus.
Nehn en Jesus kapangda ih, Ih pwehnglahng, “Koawoa ioar Simon nihn John. Koawoa wud adankihla Cephas.” (Ad oauwe woahwoahki Peter, ma pel ioar woahwoahki paiplap.)
Jesus pangin Philip apel Nathanael
43 Pwohrdahn rehnno, Jesus lemehda en inlahng Galilee, Ih kapangda Philip, pwehng ih, “Kaujdo ngoahi!” 44 Philip mihn Bethsaida, ioar nehn koaujoan oauwe ma Andrew apel Peter kin mine loaloa. 45 Philip ken suhwoang Nathanael pwehng, “Kamai ne kapangda Armajjo, ma Moses insingehdi nehn Pukin Kojonneddo, apel da joukohppok insingehdi. Ioar ih Jesus nihn Joseph, jang Nazareth.”
46 Nathanael idoak ipoa, “Kak mehkij mwehu pwokda jang Nazareth?”
Philip japoangki, “Indoa kapang.”
47 Nehn en Jesus Ah kapangda Nathanael allaluhdo, Ih pwa, “Me ioar uhdahn woal mehlel in mihn Israel men, ma joh kin widing!”
48 Nathanael idoakkoang, “Koawoa kidal ngoahi jang ia?”
Jesus japoang, “Ngoahi kapangda koawoa mwohn Philip ah pangindo koawoa, nehn oamw mine pehn suhkoa fig‑o.”
49 Nathanael japoang, “Maing Jounpadahk, Koawoa ioar uhdahn Nihn Koahs. Koawoa ioar Nahmwarkihn Israel!”
50 Jesus japoang, “Koawoa kamehlele pwa oai pwehng koawoa pwa Ngoahi kapangda koawoa nehn anjoauwo ma koawoa mine pehn suhkoa fig‑o? Koawoa pirin kapang joang pwi ma koalikjang mehpwiai!” 51 Ih pel pwehng ih “Ngoahi pwehng kamwai in mehlel, kamwai pirin kapang nehnloannge risda, a sohnloang in Koahs kan doaudoauda apel doaudoaudi pohnangin Nihn‑Armaj.”
*1:21 Joukohppo: Ma emen ma armaj kan kin kajkajik ma pirin indoa pwa en kalohkihdo indoahn Messiah‑o.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.