1 Injohrehn in keiouin rehn nehn wihk, lihok ken inlahng in joaujoauwo wahda mihn karahdinnok ma irai ne koaunopda. 2 Irai kapang pwa sakaiho ne kasahpwroahkjang in oawoan joaujoauwo. 3 Irai dilda loaloa, a johpwa kapangda palwoaroan Koaun Jesus. 4 Irai uhda wijahu pwuriamweikihla, a anjoauwohr woal roahmen uhda mwohrai, mine nehn likkoau korohro dak. 5 Nehn irai ne dirkihla majpwehk, irai rukdihoang pohn pwirej, woallok pwehng irai, “Amwda kamwai ke raprapahki armaj mour men nehn pwungen armaj mehdi kan? 6 Ih ne joh me; Ih ne iejda. Samanda da ma Ih ne pwehng kamwai nehn Ah minmine nehn Galilee: 7 ‘Nihn‑Armaj uhdahn pirin panngekla ipen ihr ma dipan kan, kalohpwuhla, a Ih pirin iejda in kajiluh in rehn.’”

8 Lihok ken samanla en Jesus lallok, 9 irai pwurla jang in joaujoauwo, apel pwehng mehpwiai ohroj oang eijek emenno apel ohroj luhwoahk. 10 Lihpwiai ioar: Mary mihn Magdala, Joanna, apel Mary inen James, irai apel epwi li ma pwili irai pakairki doahroar mehpwiai oang wahnpoaroannok. 11 A wahnpoaroannok wiahki rong pwiai joh kaspoa, ioar mehwa irai johpwa kamehlelehki. 12 A Peter uhdahr ken kijouwoang in joaujoauwo; ih rukdi kapangda likkoauwohr ma kidimla Ih. Ih ken pwurla in ummwo pwurpwuriamweiki da ma ne wiawihlahu.

13 Nehn rehnnohr nihn Jesus dohjang Jerusalem dapwa mwail ijuh. 14 Ira siksikoahpene doahroar meohroj ma ne wiawihla. 15 Nehn ara siksikoa, pein Jesus sohla koaroannoang ipara pwili ara allaluhla. 16 Ira kapang Ih, a ira johpwa kidal pwa inje Ih. 17 Jesus idoak ipara, “Da ma kamwa siksikoa allaluhdo?”

Ira ken uhdi mijen injinjuwedla. 18 Emen ira oadoa Cleopas, idoakkoang Jesus, “Koawoahr doari mihn keiru men nehn Jerusalem ma johpwa kidal da ma ne wihwiawi allaluhdo rehn pwiai nehn kahnihmmwo?”

19 A Ih idoak, “Me dahkij?”

Ira japoang, “Doahroar mehkan ma wiawihoang Jesus mihn Nazareth, Joukohp men, ma Koahs apel armaj ohroj kin wiahki ma Ih anki manman in joang ohroj ma Ih pwa apel wia. 20 Amai Jamwrou laplappok apel koaunnok ken pangla Ih pwa en koaloklok in mehdi doar Ih ken kalohpwuhekla. 21 A kamai koapwoarpwoarkihla pwa Ih ma pirin kamaioauda Israel! A likin mehpwiai ohroj, lel rehnnoauwe ne rehn jiluh mwerin mehpwiai ahr wiawi. 22 Lihpwi ma kijehmai ne kapwuriamweihla kamai; pwa irai inlahng in joaujoauwo injohrehn, 23 a johkak rapahkihda palwarro. Irai pwurdo pwa irai kapang kajanjalin sohnloang pwi ma pwehng irai pwa Ih pwen mour. 24 Pel epwi kijehmaihok inlahng in joaujoauwo ne kadehde doahroar da ma lihok ne pakairkihdo, irai pel johpwa kapangda palwoaroan Jesus.”

25 Jesus ken pwehnglahng ira, “Kamwa pwanah pweipwei apel ia woahr kosin amwa en kamehlele joang ohroj ma joukohppok ne pwa! 26 Pwa jaudi koanoahng Messiah en loklokki joang pwiai ohroj mwohn Ah pirin dildahng nehn lingin Ah wei?” 27 Doari, Jesus ken kawoahwoahng ira doahroar sikesikin Ih nehn Puk Joarwi, sapjang pukin Moses apel pukin joukohp ohroj.

28 Nehn irai ne lellahng koujappwo ma irai allaluhlahng. Jesus alu mwomwen pwa Ih pirin daudauluhlla. 29 A ira ken kauhdi Ih, pwa, “Mine ipama, pwa joauwo ne pirin ken duhla apel pirin ken rosdi.” Doari Ih ken dilda mine ipara. 30 Ih mwindi oang pwili ira mwinge; Ih pwoakda pilahwahu kapkap apel kapingkalahnganki oang Koahs. Ih sipwangdi pilahwahu kioang ira. 31 Mijara kan ken poahdpijoang ira kidalda pwa pwen ioar Ih Jesus, a nehn anjoauwohr Jesus joaloang jang ira. 32 Ira ken sikoahpene, “Nehn kapehdisa kai joah kin mwoakmwoakidki peren, doahroar oai, nehn Ah siksikesik apel kahkawoahwoahng kisa Puk Joarwi, allaluhdo nehn allo?”

33 Ira uhdahr pwurlahng Jerusalem ipen sohnpadahk eijek emenno apel iraihok ma pokpokon iparai, 34 pwehng irai, “Mehlel oau pwa Koaunno ne iejda! Ih ne pwokkoang Simon!”

35 Ira wud sikoahda dahkij ma wiawihoang ira nehn allo, doahroar ara kidalda Koaunno nehn Ah sipwangdi pilahwahu.

36 Nehn ira siksikoa mehpwiai, Jesus pwurroar uhda nehn pwungarai pwehng irai, “Popohl oang kamwai!”

37 Nehn irai majpwehkda, irai lemehioang pwa irai kapkapangda eni men. 38 A Ih pwehng irai, “Amwda kamwai ke majpwehkda? Amwda jakoapwoarpwoar ke inda nehn amwai lamlam? 39 Kapang poaihoa kai apel ehihoa kai, apel kapang mwehu pwa pwen ioar Ngoahi me. Pukkoang Ngoahi, doari kamwai nen kidal, pwa eni joh kin mine udukoa ke sihn, doahroar amwai kapkapang ipoai.”

40 Mwerin Ah pwa me, Ih ken kajalehng irai poahk apel ehnnok. 41 Irai pel kahjik oar kamehlele, irai dirki peren apel pwuriamwei; doari Ih idoak iparai, “Mine mwinge ipamwai apkas?” 42 Irai kioang mwumw siksik inihn men, 43 Ih ken mwinge mwohn mijarai.

44 Doari Jesus pwehng irai, “Ioar mehpwiai ma Ngoahi ne padahk kioang kamwai nehn anjoauwo ma Ngoahi minmine ipamwai, doahroar meohroj ma ne insingdi ki Ngoahi nehn Kojonned in Moses, nehn Pukin joukohppok apel nehn Pukin Psalm Kan, uhdahn pirin pwoaida.”

45 Doari Ih ken kamaramihla arai lamlam pwa irai en woahwoahkihla Puk Joarwi, 46 Doari Ih ken pwehng irai, “Me ioar ne insingdi: Messiah uhdahn pirin loklokla apel uhdahn pirin iejda jang mehdi in kajiluh in rehn, 47 Rongmwehu in koaluhla apel lapwdahn dihp kan pirin kalohkjili nehn wei kan ohroj, in oadoa, sapda jang Jerusalem. 48 Kamwai ma pirin kadehde mehpwiai. 49 A pein Ngoahi pirin kadardohng kamwai mehu ma jamamwaiho ne inoaukihda. A kamwai uhdahn pirin joujowihoar nehn kahnihmmwo oaroh manman in puwoa audohda kamwai.”

50 Mwerin, Jesus kahlwa irai jang nehn kahnihmmwo, koaroanlahng Bethany; ioar wijahu Ih pwoakda poah kapaida irai. 51 Nehn Ah kapaiahda irai, Ih ken injang irai pwoakpwoakdahla nehnloannge. 52 Irai ken pwongi Ih, irai pwurlahng Jerusalem dirkihla peren koalik, 53 apel anjoau ohroj irai indoa in Umw Joarwiho, kapkapnga Koahs.