Rongmwehu ma insingdi jang ipen
Mark
Oarlap
Rongmwehu in Mark, ioar “Rongmwehu doahr Jesus Christ ma Nihn Koahs.” Puk oauwe kajalehioang kisai doahr Jesus, armaj men ma kin mwoakmwoakidki sihkei apel manman. Ah manman dehde mwehu jang in Ah padahk, jang in Ah manman pohn ngen jaussok, apel jang in Ah manmanin lapwadda dipen armaj kan. Jesus pel sikoa doahr pein Ih Nihn‑Armaj ma indoahng sohnmeseikihla Ah mour pwa en kajaldekihla armaj jang nehn diparai kan.
Mark kin sikoa doahr en Jesus sikesik apel padahk kan, a ih kin sikoa koalik doahr Ah wihwia kan in sikesik sihkei apel dehde. Mark sapda insingehdi sikesik mwosmwos doahr John jounpoapdaij apel doahr en Jesus poapdaijla apel oaloa jongjong pehn Jehsen; a mwerin, ih sikoahda doahr en Jesus doadoahk in kemwehuwihla johmwehu kan apel padpadahk. Nehn nihn Jesus sohnpadahkkok ahr kin rongrongrong apel kapkapang Ih, irai ken koalikla ahr woahwoahki apel dehdehki; Ah imwinsihsi kan kin koalikla arai lioassoang Ih. Iroa koalik kan ma kaimwjekla puk oauwe, ioar sikesikin wihwia kan ma pwoaida nehn kaimwjeklahn wihk ma Jesus mour pohn jampah, a mehlel a mehdi pohn lohpwuhwo apel iejda.
Insingin imwin Rongmwehu oauwe joaloangdi nehn insing dehnnok. Dapwa pwili sapin joaloangla. Insingin mwuhrrok ioar kisai kapang imwla riau ma mine nehn kilel doahre […]. Mine kadehde ma pwa imwin roairoai ioar uhdahn wa, a kisai johpwa uhdahn kamehlele unjek.
Audoapoa in Oarlap
1. Sapin Rongmwehu 1.1-13
2. En Jesus doadoahk nehn Galilee 1.14—9.50
3. Jesus injang Galilee inla Jerusalem 10.1-52
4. Kaimwjeklahn wihk nehn Jerusalem apel ipoa 11.1—15.47
5. Iejdahn Jesus 16.1-8
6. Koaun Jesus ma iejda pel pwokkoang nah sohnpadahkkok apel indahla nehnloannge 16.9-20
1
En John Jounpoapdaij Kapahrak
1 Me ioar sapin Rongmwehu doahr Jesus Christ, Nihn Koahs, 2 doahr lallo ma ne insingdi ipen joukohp Isaiah:
“Koahs pwa, ‘Ngoahi pirin kadarwe Noai jounpakairro mwohn Koawoa,
ma pirin koaunopda Oamw allo.’
3 Mine ngilloau ma kin poangpoangpoang nehn japwsoahn:
‘Kamwai koaunopda al kan ohroj oang Koaunno,
kamwai kainenehla Ah al kan ma Ih pirin alu loaloa!’ ”
4 John ken pwokda nehn japwsoahn, poapdaiji armaj kan, padahkki oang irai, “Kamwai koaluhla, wiliakapwla apel poapdaijla, Koahs pirin mahkoahng kamwai dipamwai kan.” 5 Armaj dir jang koujapw ohroj nehn wein Judea apel jang Jerusalem inla pwa en rong en John ah kapahrak. Irai kin woahkda diparai kan, a ih poapdaijihla irai nehn Pillap Jordan.
6 John kin kol likkoau oau ma wiawihda jang in winen kamel, apel kin piroahki lopkoa kangir kilin kahu; a da ih kin kangkangkang: padda apel jukehn loanglap in nehn woallo. 7 Doar me ioar Ah padahk: “Mine woal men ma pirin indoa mwerin ngoahi, ma laplapjang ngoahi dauluhl; ma ngoahi johpwa warroang rukdi mwohn Ih pwa ngoahi en lapwadda joalin Ah juhwo. 8 Ngoahi kin poapdaijihki kamwai pil, Ih pirin poapdaijihki kamwai Ngen Joarwi.”
Jesus Poapdaijla apel Oaloa Jongjong pehn Jehsen
9 Mwerin en Jesus indoa jang Nazareth, kahnihmw siksik oau nehn wein Galilee, poapdaijla ipen John nehn Pillap Jordan. 10 Nehn anjoauwo ma Jesus doauda jang nehn pillo, Ih kapang nehnloannge rispijoang a Ngen Joarwi indihdo doahr dinin mwurei men mine pohn Ih. 11 Ih pel rongda ngilloau indihdo jang nehnloannge pwa, “Koawoa ioar Noai jermwein kahpwil wa, ma Ngoahi kin malauki.”
12 Doari, nehn anjoauwohr Ngen Joarwi ken kahlwahlahng Jesus nehn japwsoahn. 13 Jesus ken mine wijahu rehn pahijek, Jehsen ken kajongjongi Ih. Mahn ingkel kan kin pel pwili Jesus wijahu; a sohnloang kan pel kin indoa pel jeuweje.
Jesus Pangin Sohnloakjid Pahmen
14 Mwerin John peidekkoang nehn kalpwuhj, Jesus inla Galilee lohkihjili Rongmwehu jang ipen Koahs, pwa, 15 “Ne lel anjoauwo, Wein Koahs ne koaroando! Kamwai koaluhla apel wiliakapwla apel kamehlelehla Rongmwehu!”
16 Rehn oau Jesus allaluhla pohn poahrinjedin Lehn Galilee; Ih kapangda sohnloakjid roahmen, Simon apel riah Andrew, loakjidki nihra ukko nehn lehu. 17 Jesus pwehng ara, “Kamwa indoa pwilihla Ngoahi; a Ngoahi pirin wiahkihla kamwa sohnloakjidi armaj.” 18 Anjoauwohr, ara kihdi nihra ukko pwilihla Ih.
19 Ih injang wijahu, pel kapangda riarihoau, James apel John, nihn Zebedee. Ara minmine pohn pohs pas winwina nihra ukkok. 20 Nehn en Jesus kapangda ara, Ih pangin ara. Ara ken kihdi jamarahu ma pwili mine pohn pohs siksik pas ipen sohndoadoahk pwi, ara ken pwilihla Jesus.
Woalmen ma Ngen Jaus Dilingla
21 Irai inla Capernaum a Sabbath Jesus dilda nehn jinakokehu sapda Ah padahk. 22 Armaj ohroj ma pwili rong ken pwuriamweikihla doahr Ah kin kihwe Ah padahk; pwa manman in Ah padahk johpwa doahroar en jounpadahk in Kojonneddok arai padahk.
23 Woal men ma ngen jaus dilingla inla nehn jinakokehu rahrahuki pwa, 24 “Jesus mihn Nazareth, da Koawoa nimen wiahng kamai? Koawoa indoahng koauwehla kamai! Ngoahi kidal inje Koawoa, Koawoa ma Nihn Koahs jounpakair joarwihwa!”
25 Jesus pwehng ngen jausso, “Nennenla, koawoa diljang nehn armaj menen!”
26 Ngen jausso ken isikda woallo oaroh ken roarda, rahrahu diljang ih. 27 Armaj ohroj pwuriamweikihla, peipeidekpene nehn pwungarai pwahpwahpwa, “Dahkij me? Joangoan padahk kapw dahioau me? Woalmene inenin manman. Ih pwen lalloar, pel ngen jaus kan pel peikkoang!”
28 Rongin Jesus ken pispis lohkjili wija ohroj nehn wein Galilee.
Jesus Kemwehuwihla Armaj Dir
29 Doari, Jesus apel Nah sohnpadahkkok, pwilihki James apel John injang nehn jinakokehu inla umwen Simon apel Andrew. 30 Inen pahien Simon‑o onohn nehn ummwo johmwehu karkar, nehn en Jesus lel wijahu arai pwehng Ih doahr iren liho. 31 Ih ken inla kolda poahn liho jeuwejehda pwa en uhda. Nehn anjoauwohr, karkarro injang ipen liho; ih ken sapda apwali irai.
32 Injoausikdi, nehn en joauwo pirin ken duhla, armaj kan wahpenehng Jesus min johmwehu apel min ngen jaus kan dilingla irai. 33 Sohn kahnihmmwo ohroj pwili pokonpene mijen ummwo 34 Jesus kemwehuwihla armaj dir ma anki joangoan johmwehu dir apel kaujjang ngen jaus dir ipen armaj kan. Ih ken kauhdi ngen jaussok arai en joah lallal, pwa irai kidal Ih.
Jesus Lohkihjili Rongmwehu nehn Galilee
35 Pwohrdahng rehnno, injohrehn, Jesus pwohrda inlahjang in ummwo, inla likin kahnihmmwo wijahkij pwa en kalahpwukla kapkap. 36 Simon apel pwilihoahk rapahkihla Ih; 37 nehn irai kapangda, irai pwehng, “Maing, armaj ohroj raprapahki koawoa.”
38 A Ih japoang irai, “Kisai dauluhlwehng nehn koaujoan koaroan kan, pwa Ngoahi en pel lohkihjili Rongmwehu wijahk, pwa ioar Ngoahi indoahki.”
39 Ih ken allaluhjili nehn Galilee pwon, kapkapahrakjili nehn jinakoke kan apel kahkaujjang ngen jaus ipen armaj kan.
Jesus Kemwehuwihla Woal Lepahmen
40 Woal lepahmen pel indoa ipen Jesus, poadpwomwla mwohn Ih, jarda pwehng en jeuweje, pwehng Ih, “Maing, ma koawoa nimen, koawoa kak kamwkelehda*kamwkelehda: Johmwehu oauwe kin kajaminihla armaj oang kaudek. ngoahi.”
41 Doari Jesus ipwilkihda, kailla poah pukkoang woallo, Ih pwa, “Ngoahi nimen. Ken mwakelkelda!” 42 Anjoauwohr lepahu ken jarjang ipen woallo; doari ih ken mwakelkella. 43-44 Jesus kainoapwihdi, pwehng Ih, “Rong, pwa koawoa en johpwa pwehng emen. Inla kajalehioang jamwrou a koawoa wia oamw meiroang joanngo ma Moses koajoanehdi, en wia oamw mihn kadehde oang irai.” Doari Ih ken kadarla woallo.
45 Woallo inlahr lohkihjili wija ohroj ah ne mwakelkelda; ma kahrehda Jesus johla kak aluhjili nehn pokon janjal nehn kahnihmmwok, Ih kin kalkalahpwukjili likin kahnihmmwo. A joah, pwa armaj dir kin pokondo Ipoa jang wija ohroj.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.