1 Mwerin Sabbath, injohrehn in Rehn Joarwi, Mary mihn Magdala apel emen Mary inlahng kapang joaujoauwo. 2 A nehn anjoauwohr jampah roarda; sohnloang en Koaunno men indihdo jang nehnloannge kasahpwroahjang sakaiho, ih mwindihoang puwoa. 3 Mwomwe inenin ling, doahroar lingin joarom, ah likkoauwo korohro doahroar sinoh. 4 Jiloapoahk inenin jalohda dauluhl apel roarroarkihda irai majpwehkda, irai ken kipdihoang nehn pwirej doahroar armaj mehdihpwi.

5 A sohnloanngo pwehng lihok, “Kamwa joah mijik, pwa ngoahi kidal pwa kamwa raprapahki Jesus ma kalohpwuhla. 6 Ih joh me! Ih ne iejda, doahroar Ah pwehng kamwaiho. Kamwa indoa, kadehde wijahu ma Ih neknekid. 7 A apkas, kamwa pispis alwe pwehng Nah sohnpadahkkok pwa ‘Ih ne iejda jang mehdi, Ih pirin inla Galilee mijen kamwai. Ioar wijahwa ma kamwai pirin kapang Ih.’ Kamwa samsaman da ma ngoahi pwehng kamwa.”

8 Ira ken pispis pwurla jang in joaujoauwo, ira inenin majpwehk apel peren, ira kijkijoulahng pakair kioang sohnpadahkkok irair oauwe.

9 A anjoauwohr Jesus uhda mijara pwehng ira “Popohl.” Ara sohla ipoa rukdi mwowoa koldi ehnnok pwongi Ih. 10 A Jesus pwehng ira, “Kamwa joah mijik, kamwa alwe pwehng rioaihok arai en inla Galilee, pwa ioar wijahwa ma kamai pirin suhpene.”

11 Nehn en lihok ara kijkijoula ipen sohnpadahkkok, epwi jounpeihok ma jiljiloa joaujoauwo lelloang nehn kahnihmmwo pwa irai en pwehng jamwrou laplappok me ohroj ma wiawi. 12 Jamwrou laplap apel koaunnok pokonpene pwa irai en wia lamlamki da ma pirin wiawi. Irai en kioang jounpeihok uhwen mwani koalik oau. 13 Irai pwehng jounpeihok, “Kamwai pirin pwa, ‘Nihn Jesus sohnpadahkkok indoa inpwonngo nehn amai moair pirapoahla palwarro.’ 14 A ma koapina rongda, kamai pirin kadehde, a kamwai jehpirin perki mehkij.”

15 Jiloapoahk oaloa nihrai mwanihok, irai wiahda doahroar ma jamwrouwok padahkihoang irai. Sikesik pase lohkjili ipen mihn Jew jang rehnno indoa lel rehnnoauwe.

16 Sohnpadahk eijek emenno injang pohn dolin Galilee, wijahu Jesus pwehng irai en inlahng. 17 Nehn irai kapangda Jesus wijahu, irai rukdi pwongi Ih; a epwi irai pwen kahjikkoar kamehlele! 18 Jesus sohdo iparai pwehng irai, “Manman ohroj nehnloannge apel jampah ne liklikkoang Ngoahi. 19 Doari, kamwai alwe wija ohroj padahkihoang sohn wei kan ohroj; pwa irai en wiahla Noai sohnpadahk: poapdaijihla irai in oadoan Koahs Jahm apel Nah apel Ngen Joarwi. 20 Apel padahkihoang irai, ahr en peikkoang me ohroj ma Ngoahi ne koajoanehdihoang kamwai. Doari, kamwai en kidal pwa Ngoahi pirin pwilpwili kamwai anjoau ohroj lel in imwin kawa.”