1 Ngoah pirin juwei, mihnda ma joh kaspoa. A apkas ngoah pirin kajalehda en Koaunno kaudiahl apel kajanjal pwi. 2 Ngoah kidal woal joauloang sohrohr men, johnpar eijek pahu ma ne doarihla mwohn ah poukdahla lel nehn *kajiluh in nehnloannge lal kan oauwe woahwoahki wija ma Koahs koaujoankajiluh in nehnloannge — ngoah jehjoa ma me uhdahn wiawi ke ma kaudiahl oau ma ih kapang — Koahs oar ma kidal. 3 Ngoah kidal joauloang mene — a ngoah jehjoa pwa ma uhdahn wiawi ke ma pwen kaudiahl oau ma ih kapang, Koahs oar ma kidal — 4 ah poukdahlahng nehn Paradise. Ih rongda joang pwi ma inenin joaroawi, ma joh mweimwei oang armaj en kak sikoa. 5 Ngoah pirin juweiki armaj mene, a ngoah johpwa pirin juweiki pein ngoahi, a oai jasihkei kan ioar ngoahi en juweiki. 6 Ma ngoah nimen juwei, a ngoah johpwa pirin mwomwen pweipwei, pwa ngoah pirin sikesik mehlel. A ngoah johpwa pirin juwei, pwa ngoah johpwa mwehuki emen pwa apel lemleme pwa ngoah laplap jang in dahkij ma kamwai ne kapang ke rong jang ipoai.

7 A pwa ngoah en joah aklaplapkihla kaudiahl kapwuriamwei pwiai, ma ngoah ne kapang, dok kamoadoak kij aluhwoang in palwoaroaioa, doahr ma pwen en Jehsen ah pakair in koalkoa apel kaskuhli oai aklaplap. 8 Pehn jiluh ngoah kapkapkihoang Koaunno apel poaki en kihjang ngoahi dok kamoadoak kije. 9 A Ih japoang ngoahi, “Oai kalahngan isar oang koawoa; pwa Oai manman kin janjalda mehlel ipen armaj jasihkei kan.” Ioar mehwa ngoah kin perenki apel juweiki oai jasihkei kan, pwa ngoah en kin poahm manman in Christ ipoai. 10 Doari, ioar mehwa ngoah kin perenkihda nehn oai kin johmwehu, nehn oai kin mwamwahlla, nehn oai kin lel apwal apel pokpok apel loklok ki pwa Christ. Pwa nehn oai kin jasihkei, a ioar anjoauwa ma ngoah kin sihkei.

11 Ngoah mwomwen pweipweila, a kamwai ma kahrehda. Kamwai ma pirin uhdahn kajalehda amwai pwungki ngoahi. Mihndahr ma joh mehkij ngoahi, a ngoah johpwa mine pehnangin amwai “wahnpoaroan kajampwal” kan. 12 Joangoan manman apel kapwuriamwei dir wiawi oang kamwai in kanangmah pwa en kajalehioang kamwai pwa ngoah wahnpoaroan men. 13 Ia mwomwen oai apwali amwai mwomwohdjo oaujoang jang mwomwohdjo sohrohr kan, ioarroar oai johpwa kin kasoausoauwihki kamwai loapin mwani? Kamwai menlau mahkoahng ngoahi ki japwung oauwe.

14 Ioar me kajiluh in anjoau ma ngoah onopdahng en lelwe ipamwai, a ngoah johpwa pirin alwehng kasoausoauwihla kamwai. Pwa jaudi nihmwai mwani ma ngoah pirin alwehki, a kamwai ma kahrehda. Pwa jaudi jerihkan ma pirin apwali nihrai pahpa kan, pwen pahpa kan apwali nihrai jerihkan. 15 Ngoah perenki noaskihla me ohroj ma ngoah anki, pwilihkihla ngoahi, pwa ngoah en jeuwejehki kamwai. A ia mwomwe, amwai ipwilki ngoahi pirin siksikkihla pwa oai limpoak oang kamwai koalik?

16 Kamwai pirin pwungki ma ngoah johpwa kapwunodihda kamwai. A dapwa emen pirin kahrehioang ngoahi oai mwoarjuwed apel ngoah kapweipweidi kamwai. 17 A ia mwomwen oai kapweipwei jang kamwai mehkij ipen jounpakairrok ma ngoah kadarwe? 18 Titus ma ngoah ngidngidki oang en lelwe, a ngoah pel poaki ipen emen riasai joauloanngok en pwili. Doari da? Kamwai kak pwa Titus kapweipwei jang kamwai mehkij? Titus apel ngoahi, kama kin joangoan lamlam oauwoar apel joangoan wihwia oauwoar!

19 Dapwa kamwai lemleme pwa kamai mwomwen akpwungki pein kamai mwohmwaikan. Joah! Pwa kamai siksikesik mwohn Koahs in doahroar kupwuren Christ; apel meohroj ma kamai kin wia, oai pirien kajampwal kan, joang ohroj ne doari pwa en jeuweje kamwai. 20 A ioar mehwa ngoah perki men, nehn oai pirin lel ipamwai, a pwadoar ngoahi johpwa kapang ipamwai dahkij ma ngoah anahne, apel kamwai nehn johpwa kapang da kamwai anahne ipoai. Ngoah perki pwa doar ngoahi kapangda ipamwai pei, pihrin, akmai, jaminmin, lipahned, lallal dir, aklaplap, apel loakloakoa. 21 Ngoah perki pwa nehn oai pirin pwuroahng lelwe ipamwai, a pwa doahr Koahs kamehkihda ngoahi mwohmwai; a pwadoar ngoahi joangkihda armaj dir ma ne wiahda dihp mehjwa, irai kahjikkoar koaluhkihla arai siahk jamin kan, siahk in nenek apel ahr kamwahl kan.