1 Ngoah nimen kamwai en mahkoahng ngoahi ma ngoah ekij mwomwen pweipweila. Eh, kamwai menlau mahkoahng ngoahi apel kanangmahioang! 2 Ngoah luwakkihda kamwai doahr en Koahs Ah kin luwakki kamwai; pwa kamwai doahr jerpein meipwon mwakelkel men ma ngoah ne inoau in pwoapwoaud kioang woalmennoar, ioar Christ. 3 Gen 3:1-5,13Ngoah perki ma amwai lamlam kan pirin japwungla apel kamwai ken kerpwihla amwai oauwoang Christ in poaspoas apel mehlel, doahroar Eve ah lohdihoang pehn widing in sinekko. 4 Pwa kamwai kin perenki mweidoahng emen ma kin indoa ipamwai en padahkihoang kamwai doahr emen Jesus ma sohrohr jang da ma kamai ne padahkihoang kamwai; apel kamwai kin oaloa oau ngen apel oau rongmwehu ma wikjang dauluhl Ngenno apel Rongmwehuwo ma kamwai oaloahjang ipamai!

5 Ngoah lemleme pwa ngoah johpwa mine pehnangin iraihok ma kin wiahki pein irai amwai “wahnpoaroan kajampwal!” 6 Dapwa ngoah joakoahiok in sikesik, a jaudi joaloalkoang, pwa kamai ne kajalehioang kamwai in janjal doahr anjoau ohroj apel in joang ohroj.

7 Ngoah ne kapahrakki oang kamwai doar Rongmwehu in Koahs in joh dupukkoa; ngoah kasiksikihla pein ngoahi pwa en wud pwoakda kamwai, a dahkij japwung ipoai? 8 Nehn oai kin doadoahk ipamwai a mwomwohdjo sohrohr kan likin kin dupuk ngoahi. Mwomwen oar ngoahi jerkihjang nihrai mwani pwa en jeuwejehki kamwai. 9 Phil 4:15-18A nehn anjoauwo ma ngoah kin mine ipamwai, ngoah johpwa kin jongin kadroapwoahki kamwai jauwaj in mwani nehn oai kin anahne, pwa riasaihok ma indoa jang Macedonia, irai wahdohng ngoahi joang ohroj ma ngoah uhdahn anahne. Doahr oai johpwa kasoausoauwi kamwai, jang mehj indoa, ngoah johpwa pirin pel kasoausoauwi kamwai jang apkas inla. 10 Pwa mehlel in Christ mine ipoai, ngoah inoaukihoang kamwai pwa johpwa emen nehn wein Achaia pwon pirin kauhdi jang ngoahi kaping oauwe. 11 Pwa da? Pwa oai johpwa ipwilki kamwai? Koahs kidal doahr oai ipwilki kamwai!

12 Ngoah pirin uhjehlahr wihwia doadoahk kan ma ngoah ken wihwia apkas, pwa irai “wahnpoaroannok” en kin joah wiahki pwa dapwa arai doadoahk doahroar amai. 13 Irai pwiai audi wahnpoaroan mehlel pwi, irai wahnpoaroan likamw pwi ma kin kinehda arai doadoahk apel kin kawikkoang pein irai wahnpoaroan in Christ. 14 Pwa jaudi mehkij kapwuriamwei me. Pwa Jehsen pel kak kawikla pein ih apel mwomwehda sohnloang in maram! 15 Ioar pwa jaudi mehkij kapwuriamwei pwa nah papah kan pel kak kawikla pein ihr pwa en mwomwehda papah in me pwung. A in imwla irai pirin oaloa pwoaijoarai in doahr arai wihwia kan.

16 Ngoah en pwuroahng pwa, joh emen kamwai en lemleme pwa ngoah pweipwei men. A ma mine a kamwai wiahki ngoahi pweipwei men, kamwai kajamwo ngoahi, pwa en mine me sikesik kij ma ngoah en kak juweiki. 17 Mehkan ma ngoah pwahpwa apkas audi ioar mehwa Koaunno mwehuki ngoahi en pwa; pwa nehn mwoakid in juwei oauwe pein ngoahi lallalki siahk in pweipwei. 18 A pwa mine armaj dir ma kin juweiki pein irai doahroar siahk in jampah, ngoah pirin pel wia doahroar. 19 Nehn amwai loalkoang kamwai kin perenki kanangmahioang irai ma pweipwei. 20 Pwa kamwai kin kanangmahioang irai ma kin wiahki kamwai lidu, ke irai kin engmwehukihla wiahng kamwai me nauna, ke pirapoa jang amwai koapwoa, ke kin mwamwahlki kamwai, ke kin poki likin joapoamwai kan! 21 Ngoah kin mehkki sikoa pwa kamwai johpwa wia joang pwiai ki pwa kamwai kin aksiksik!

A ma emen pirin eimah apel akjuweiki mehkij — ngoah siksikesik in armaj pweipwei men — ngoah pel pirin pwili eimah! 22 Ia mwomwe? Mihn Hebrew pwi irai? Ngoah pel mihn Hebrew men. Mihn Israel pwi irai? Ngoah pel mihn Israel men. Kijehn kadaudok in Abraham irai? Pel ngoah kadaudok in Abraham. 23 Wih 16:23Jounpapah in Christ pwi irai? Mwomwen armaj iahk men ngoahi — a ngoah wia jounpapah mwehu men jang irai! Pwa oai doadoahk koalikjang arai doadoahk, ngoah joaldi dirjang irai, ngoah pokpok koalikjang irai, apel ngoah koaroannoang mehdi dirjang irai. 24 Deut 25:3Pehn limoau mihn Jew kan wiahng ngoahi pokpok jilihjek duwoau (39). 25 Wih 16:22; Wih 14:19A pehn jiluh mihn Rome poki ngoahi apel kasoahki ngoahi sakai pehn oau. Pehn jiluh ngoah pwili jip mweidi ohla; apel pehn oau ngoah peipeiki nehn madauwo pwong oau apel rehn oau. 26 Wih 9:23; Wih 14:5Ngoah lel apwal nehn jeiloak dir nehn lapake kan, ipen armaj mwoarjuwed kan; apwal ipen kijehi mihn Jew kan apel ipen mihn likin kan; apwal wija ohroj, nehn kahnihmw kan nehn mal kan, nehn madauwo, apel ipen oai pirien likammwok. 27 A kin mine oai doadoahk koalik apwal pwi; ngoah kin poahd inpwong; ngoah kin duhpekla apel nimen nimpilda; pehn dir kin joh koanoai mwinge, ngoah kin kopou apel joh oai likkoau. 28 Apel likin mehpwiai ma kin lelloang ngoahi, rehn ohroj pwunod in apwali mwomwohdjo kan ohroj kin mine ipoai. 29 Nehn emen ah kin jasihkeila, ngoah kin pel jasihkeikihla; nehn emen ah kin japwungla wiahda dihp, ngoah kin pel injinjuwedkihla.

30 Ma ngoah uhdahn pirin juweiki mehkij; a oai jasihkei kan ma ngoah pirin juweiki. 31 Koahs jemen asai Koaunno Jesus, ma kin kaping anjoau ohroj, Ih ma kin kidal doahr oai johkin likamw. 32 Wih 9:23-25Nehn oai minmine Damascus, nihn nahmwarki Aretas koapina men jiloahdi wanihmw in kahnihmmwo pwa en joalihdi. 33 A ngoah koadoaddoardi nehn pwuko oau jang nehn wanihmw in kello ngoah ken pisla.