Rongmwehu ma ne Insingdi jang ipen
LUKE
Oarlap in Puk Oauwe
Rongmwehu in Luke kajalehda doahroar en Jesus Ah wia jounkoamoaur in Israel apel en armaj ohroj, ma inoaupoa wiawihla kawahu. Luke kajalehda (kilelehdi) doahroar en Ngenin Koaunno Ah ne pangin Jesus pwa en “Kapahrakkihoang armaj joamwoahmwoa kan Rongmwehu;” ioar ma puk oauwe pel kajalehda doahroar Rongmwehu in Jesus ah kin jeuweje armaj kan ma kin minmine nehn joangoan anahn ohroj. Irair en peren ma pel dehde mwehu nehn Luke a mehlel nehn iroa koalik kan in sapdahu, wija ma pakairin indoahn Jesus wihwiawi, apel in imwin, anjoau ma Jesus indahla nehnloannge. Jouninsing in puk oauwe pel insingehdi Wihwiahn Woaroakkok ma sikoa doahroar pwojon Christ ah koairda apel parpijoang mwerin Jesus indahla nehnloannge.
Loap 2 apel 6 (Soahk nehn audoapoa in oarlap ma mine pah) ne audohkihda iroa ngoadoar ma johkin diarek nehn Pukin Rongmwehu sohrohr kan, a ioar oar nehn Rongmwehu oauwe, ma doahroar sikesik in sohnloanngok ahr koaul nehn noaisikdihn Jesus, apel jilepen jihppwok ahr pajlahng ipen Jesus; sikesik in Jesus nehn Ah minmine nehn pwungen jounpadahk in Kojonneddok nehn Umw Joarwiho nehn Jerusalem; apel karajraj in Mihn Samaria Kadekko apel karajraj in Jermweinno ma joaloangla. Puk oauwe kin kajampwalki mehlel padahk doahroar kapkap, doahroar Ngen Joarwi, doahroar en lihkan ahr jauwaj oang Jesus nehn Ah padahk, apel doahroar en Koahs Ah kin mahkoahng dipen armaj kan.
Audoapoa in Oarlap
Sapin jakardahn jouninsing Luk 1.1-4
Noaisikdihn apel sikdahn John jounpoapdaij apel Jesus 1.5—2.52
Doadoahk in John jounpoapdaij 3.1-20
Jesus poapdaijla apel oaloa jongjong pehn Jehsen 3.21—4.13
En Jesus doadoahk nehn Galilee 4.14—9.50
Jesus injang Galilee inlahng Jerusalem 9.51—19.27
Kaimwjeklahn wihk nehn Jerusalem apel kahnihmw ipoa 19.28—23.56
Koaun Jesus iejda, pwokkoang Nah sohnpadahk kan, Ih indahla nehnloannge 24.1-53
1
Sapin Jakardahn Jouninsing Luke
Koampoakpoai Theophilus:
Armaj dir engdehn insingehdi sikesik in mehkan ma ne pwoaida ipamai. Irai insingehdi da ma kamai ne oaloahjang iraihok ma widahlihki mijarai kan apel padahkihoang armaj kan joang pwiai jang in sapdahu indoa. A doar maing Theophilus, nehn oai lemleme mwehu doahroar mengihsik in mehpwiak ohroj jang in sapdahu, ngoahi lemehda pwa pirin mwehu mehlel ma ngoahi wiahda oau pukin poadpoad oang koawoa doahroar mehpwiak. Ngoahi wia me pwa koawoa en woahwoahkihla joang ohroj ma koawoa ne oaloa padahkin.
Pakair in noaisikdihn John jounpoapdaij
Nehn mwein Herod, nahmwarkihn Judea, mine jamwrou men oadoa Zechariah, kijehn loapin jamwrou ma adanki Abijah. Pahioahu oadoa Elizabeth, pel kijehn kadaudok in jamwrou oau. Ira inenin mour poadidi mwohn mijen Koahs, ira kin pel kapwaihahda mwehu mahjan apel kojonned ohroj in Koaunno. A joh nihra jeri pwa Elizabeth johkak noaisik, a ira ne moadohla.
Rehn oau Zechariah wihwia ah doadoahk in jamwrou nehn Umw Joarwiho. In doahroar ma kin wiawi ipen jamwrou kan, ih pilpildahng en wia meiroang in okoj warpwohmwehu nehn Umw Joarwihn Koaunno pohn pei joarwi, doari ih ken dildahng nehn wijahu, 10 a pokon koalik oau minmine likin kapkapkap nehn anjoaun okjekko. 11 Sohnloang in Koaunno men pwokkoang Zechariah uhda loap moaun in mwoal in meiroanngo wija ma warpwohmwehuwo kalkalahs. 12 Nehn Zechariah kapangda sohnloanngo, ih nuhkihla apel majpwehkda. 13 A sohnloanngo pwehnglahng, “Zechariah, koawoa en joah mijik, pwa oamw kapkap ne pwoaida ipen Koahs! Pahioamw Elizabeth pirin noaisikihdi jermwein men ma koawoa pirin kioang oadoa John. 14 Ih pirin kahrehioang koawoa peren apel popohl, apel armaj ngoadoar pirin perenda nehn ah pirin noaisikdi! 15 Pwa ih pirin laplap mwohn mijen Koaunno. Ih jehpirin jair wain ke jakau sihkei. Mwohn ah pirin noaisikdi ih pirin dirkihla Ngen Joarwi. 16 Ih pirin kajpahlihdo mihn Israel ngoadoar ipen Koaunno, asai Koahs. 17 Ih pirin indoa mwohn Koaunno in rojon apel manman doahroar joukohp Elijah. Ih pirin kemwehuwihla nehn pwungen mwahmwa kan apel nihrai jerihkan; Ih pirin pel ukudla armaj japeik kan oang in al pwung kan, apel koaunopda nihn Koaunno armaj oang Ih.”
18 Zechariah pwehnglahng sohnloanngo, “Da ngoahi en kidalki pwa mehkije pirin pwoaida ipoai, pwa ngoahi apel pahioaiho ne moadohla?”
19 A sohnloanngo japoangla, “Ngoahi Gabriel, ma kin ariri Koahs, Ngoahi pwa ngoahi en pakairkihoang koawoa rong mwehu pase. 20 A pwa oamw joah kamehlele oai pakair, ma pirin pwoaida nehn anjoau in, koawoa pirin loahsoangla; koawoa johla pirin kak lallal oaroh lel nehn rehnno ma mehpwiak pirin pwoaida.”
21 Nehn anjoauwo pokonno joujowi Zechariah, pwonpwonkihda pwa dahkij ih woaroaikihla loaloa. 22 Nehn ah dildohjang nehn Umw Joarwiho ih johla kak lalloang irai. Irai kidal da pwa ih widahlihda mehkij kapwuriamwei loaloa. Ih uhda mwohn mijarai, jeioahl pwa ih nimen lallal a johkak pwa ih ne loahsoangla.
23 Nehn en Zechariah ah anjoau in pwukoa doadoahk in nehn Umw Joarwiho doarihla, ih japahllahng nehn umwahu. 24 Mwerin anjoau kij, pahioahu Elizabeth lijaianda, ih minminehki nehn umwahu oaroain johnpwong limoau. 25 Ih kin pwa, “Ioar doahroar en Koaunno jeuwejehda ngoahi me, nehn Ah kihjang ngoahi oai kamehk ipen armaj kan!”
Pakair in Noaisikdihn Jesus
26 Nehn en Elizabeth kawonou in johnpwong, Koahs pel kadardo sohnloang Gabriel nehn kahnihmw in Galilee oau ma oadoa Nazareth, 27 ipen meipwon men ma ne inoau in pwoapwoaud oang woal men ma oadoa Joseph, kijehn kadaudok in Nahmwarki David. A jerpein meipwonno adanki Mary. 28 Sohnloanngo inla ipoa rahnmwahuwi, ih pwa, “Mary, popohl oang koawoa! Koaunno minmine ipoamw apel ne kapaiahda koawoa!”
29 Mary majpwehkkihda sikesik oauwe apel lamlam koalikki ia pirin woahwoahn sikesik pase. 30 Sohnloanngo pwehng, “Mary, koawoa en joah perki mehkij, pwa kalahngan en Koahs uhdahn koalik ipoamw. 31 Koawoa pirin lijaianda, noaisikihdi jermwein men ma koawoa pirin kioang oadoa Jesus. 32 Ih pirin laplap apel adanki Nihn Koahs, Keiou Laplap. Koaunno Koahs pirin kajapwilda en nahmwarki doahroar jamah David. 33 Ih pirin pel nahmwarkihn kadaudok in Jacob kan allaluhla; Ah wei jehpirin doari!”
34 Mary pwehng sohnloanngo, “Imdoahr me en kak wiawi, nehn oai meipwon?”
35 Sohnloanngo japoang, “Ngen Joarwi pirin mine pohmmwen apel rojon in Koahs pirin mine ipoamw, ioar kahrehda jeri joarwiho pirin adanki Nihn Koahs. 36 Koawoa en samsaman kijehmw Elizabeth doahroar en armaj kan ahr wiahki li johkak nainki jeri; a apkas ih ne lijaianda ne mine nehn kawonou in ah johnpwong, mihndahr ma ih ne li moadohla. 37 Pwa joh mehkij ma johkak ipen Koahs.”
38 Mary pwehnglahng sohnloanngo, “Ngoahi lidu in Koaunno en wiawihoang ngoahi dahkij ma koawoa pwahla.” Sohnloanngo ken inlahjang ih.
Mary Paj ipen Elizabeth
39 Mwerin me, Mary koaunopda me ohroj apel pispis inlahng nehn kahnihmw oau mine in japw nahnahn Judea, 40 ih dilda nehn umwen Zechariah pwa en rahnmwahuwi Elizabeth. 41 Nehn en Elizabeth rongda en Mary rahnmwahu, jeriho ken mwoakidda nehn kapehdin. Elizabeth ken dirkihla Ngen Joarwi, 42 ih kakoalikihla ngiloa, pwehng Mary, “Koawoa meid pai ipen lihkan! Meid pai jeri ma koawoa pirin noaisikihdi! 43 Dahkij joang kapwuriamwei oauwe wiawihkihoang ngoahi, ma inen oai Koaun paj ki ipoai? 44 Pwa nehn anjoauwohr ma koawoa rahnmwahuwi ngoahi, jeri siksikko nehn kapehdihoa mwoakidkihda ah malau. 45 Koawoa meid pai pwa oamw pwojon ma kahrehda sikesik in Koaunno pirin pwoaida ipoamw!”
En Mary ah Koaulin Kaping
46 Mary pwa,
“Mohngiongihoa kin kapnga Koaunno;
47 Ngenihoa kin perenki Koahs, oai Jounkoamoaur,
48 pwa Ih lemlemehr Nah lidu siksik mene!
Jang apkas inla di ohroj pirin kapnga ngoahi
49 pwa joang kapwuriamwei kan ma Koahs, Keiou Laplap ne wiahda ipoai.
Oadoaioa ioar ma joarwi;
50 Ah kalahngan kin janjal oang ohroj ma kin woaunki,
jang oau di lel oau di.
51 Ih ne kihwe poah sihkei,
apel kajohla lamlam in ihr aklaplap kan ohroj.
52 Ih jinoakdi nahmwarki laplap jang nehn ahr mwoal kan,
a wud kajapwilda min siksik kan.
53 Ih kamoadihkihla mwinge mwehu ihr ma duhpek kan,
a kadarpijoang ihr ma koapwoahpwoa kan kaip.
54 Ih pwa en kolkolloar Ah inoau oang jamasaihok,
apel indoahng jeuweje Ah lidu Israel;
55 Ih johpwa moalkoahla kalahngan ma Ih wiahng Abraham
apel kadaudokoa kan ohroj allaluhla!”
56 Mary minminehki ipen Elizabeth johnpwong jiluh, mwerin ih japahllahng in umwahu.
Doahroar Noaisikdihn John jounpoapdaij
57 Anjoau in en Elizabeth noaisik ne lel; ih noaisikihdi jermwein kij. 58 Nehn en mihn ipoahk apel peneinei irai rongda doahroar kalahngan en Koaunno ah pwoaida ipoa, irai ohroj pel pwili inenin perenkihda.
59 Nehn kawaluh in rehn mwerin jeriho ah noaisikdi, irai wahla ih en jorkomjaijla apel kioang ih en adankihla oadoan jamahu, Zechariah. 60 Inahu japoang irai, “Joah! Ih pirin adanki John.”
61 Irai pwehng ih, “A imdoahr? Johpwa oamw peneinei men adanki John!” 62 Irai jeioahli jemen jeriho apel kalelpoak ad dahioau ma ih nimen kioang jeriho.
63 Zechariah poakihda puk oau, ih insingehdi puwoa, “Ih pirin adanki John.” Irai ohroj ken inenin pwuriamweikihla! 64 Nehn oar anjoauwo Zechariah pwuroahng lallalda, apel sapda kapkapnga Koahs. 65 Sohn wija ohroj inenin majpwehkda, apel rongin mehpwiak lelpijoang wija ohroj nehn japw nahnahn Judea. 66 Apel ohroj ma pwili rong mehpwiak kin lemleme apel idoak, “Da jeri mene pirin wiahla?” Pwa ne janjal pwa manman in Koaunno mine pohn ih.
En Zechariah ah Kokohp
67 Jemen John, Zechariah, dirkihla Ngen Joarwi ih kohpda in doahroar me:
68 “Kisai kapnga Koaunno, Koahs in Israel!
Pwa Ih ne indoa pwa en jeuweje Nah kan apel koamoaurihla irai.
69 Ih kajapwildahng kisai Jounkoamoaur manman men,
jang nehn kadaudok in David, Nah lidu.
70 Ih ne pwen inoaukihdihoang ipen Nah joukohp joarwihn kawa kan
71 pwa Ih pirin doaroahla kisai jang asai imwinsihsi kan,
apel jang nehn manmanin irai ohroj ma kin lioassoang kisai.
72 Ih pel pwa Ih pirin kalahngan oang jamasaihok,
apel samsaman oar Ah inoau koalik joarwiho.
73 Ih kahukihoang jamasai Abraham,
74 apel inoaukihoang pwa Ih pirin kapisla kisai jang asai imwinsihsi kan,
apel mweidoahng pwa kisai en papah Ih joah perki mehkij;
75 a kisai en kin mwakelkel apel pwung mwohn mijoa rehn ohroj in asai mour.
 
76 A koawoa, noai jeri siksik, koawoa pirin adanki joukohp in Koahs, Wija Laplap.
Koawoa pirin inla mwohn Koaunno,
pwa koawoa en koaunopda Ah al kan oang Ih;
77 pwa koawoa en padahkihoang Nah kan doahroar ahr pirin mourla
nehn ahr pirin oaloa mahk in diparai kan.
78 Pwa asai Koahs ma kupwur kalahngan apel kadek.
Ih pirin kamaramihki kisai maram in koamoaur,
79 apel joaroahki maram jang nehnloannge pohn ohroj ma minmine nehn ros in mehdi,
pwa en kahkahlwahwe kisai nehn alin popohl.”
80 Jeriho koalikla apel koahiokla in pali ngen. Ih kin koaukoaujoan nehn japwsoahn oaroh lel rehnno ma ih pwokda janjal mwohn mihn Israel.