Rongmwehu in Matthew
Rongmwehu ma ne insingdi jang Matthew
Matthew
Oarlap in Puk oauwe
Rongmwehu in Matthew sikoa doahroar Jounkoamoaur ma inoaupoa ne wihwiawi nen Kadehde Mering; doari, doahroar Koahs ih kapwaihahda ah inoau oang nah armaj kan, jaudihoar oang mihn Jew kan nen anjoauwo ma Jesus minmine ipasai, apel oang sohn jampah ohroj.
Sikesikin Rongmwehu in Matthew ma inenin joanmwehu. Ih sapkihda sikesik in noaisikdihn Jesus, a doaula sikoahda doahroar Jesus ah poapdaijla apel oaloa jongjong ipen Jehsen, apel doahroar ah doadoahk nehn Galilee; doari, doadoahk in kapahrakki Rongmwehu, apel kihda padahk oang armaj ohroj, apel kemwehuwihla johmwehu kan. Mwerin mehpwiai Matthew ken doaula siksikoa doahroar en Jesus injang Galilee pwa en jeiloaklahng Jerusalem, apel doahroar wihwia kan ma pwoaida in kadoarieklahn wihk ma ih mohmohmourki pohn jampah. In imwla ih ken kadoarihkihla loklok, mehdi apel iejdahn Jounkoamoaur.
Oau irair ma janjal mehlel nehn Rongmwehu in Matthew, ioar kajanjaldahn Jesus doahroar jounpadahk laplap men, ma anki manman en kawoahwoahda Kojonned in Koahs, apel ma kin padahkihwe doahroar Wein Koahs. Nehn pukkoauwe ah padahk kin nehnehpijoang wiahda irair limoau in doahroar me: (1) kapahrak pohn dollo, ma kajalehda mourin arai kan ma uhdahn sohn Wein Koahs, pel irai pwukoa kan, kapai kan, apel kahrpoan irai mour (iroa koalik 5-7); (2) kaweidpen sohn doadoahk eijek roahmenno oang in poaroan ma ih kioang irai (iroa koalik 10); (3) karajraj doahroar Wein nehnloannge (iroa koalik 13); (4) padahk doahroar woahwoahn wiahla sohn padahk in Jesus (iroa koalik 18); (5) padahk doahroar imwlahn irair in anjoauwoauwe apel doahroar pwurdohn Wein Koahs (iroa koalik 24-25).
Audoapoa in Oarlap
Doahroar iroakdihn kadaudok apel noaisikdihn Jesus Christ 1.2—2.23
Doahroar en John jounpoapdaij ah kapahrak kan. 3.1-12
Jesus poapdaijla ipen John apel oaloa jongjong pehn Jehsen 3.13—4.11
En Jesus doadoahk nen Galilee 4.12—18.35
Jesus injang Galilee inlahng Jerusalem 19.1—20.34
Kadoarieklahn wihk ma ih mohmohmourki nehn Jerusalem apel ipen Jerusalem 21.1—27.66
Koaunno iejda apel pwokkoang nah sohnpadahkkok 28.1-20
1
Iroakdihn dihkan ma lel Jesus
Iroakdihn dihkan ma lel Jesus Christ nihn David, nihn Abraham:
Abraham ioar jemen Isaac, Isaac jemen Jacob, Jacob jemen Judah pel riahkan. Judah ioar jemen Perez apel Zerah, ma inanki Tamar, Perez ioar jemen Hezron, Hezron jemen Ram, Ram jemen Amminadab; Amminadab jemen Nahshon; Nahshon jemen Salmon; Salmon jemen Boaz (ma inanki Rahab); Boaz jemen Obed (ma inanki Ruth); Obed jemen Jesse; Jesse ioar jemen Nahmwarki David.
David ioar jemen Solomon, ma inanki pahien Uriah. Solomon jemen Rehoboam, Rehoboam ma jemen Abijah, Abijah jemen Asa, Asa jemen Jehoshaphat, Jehoshaphat jemen Jehoram, Jehoram jemen Uzziah Uzziah jemen Jotham, Jotham jemen Ahaz, Ahaz jemen Hezekiah, 10 Hezekiah jemen Manasseh, Manasseh jemen Amon, Amon jemen Josiah, 11 Josiah jemen Jechoniah pel riahkan nehn anjoauwo irai kaliplipla Babylon.
12 Mwerin kaliplipla Babylon: Jechoniah ioar jemen Shealtiel, Shealtiel jemen Zerubbabel, 13 Zerubbabel jemen Abiud, Abiud jemen Eliakim, Eliakim jemen Azor, 14 Azor jemen Zadok, Zadok jemen Achim, Achim jemen Eliud, 15 Eliud jemen Eleazar, Eleazar jemen Matthan, Matthan jemen Jacob, 16 Jacob jemen Joseph, pahien Mary, ma noaisikihdi Jesus, ma adanki Christ.
17 Ohroj ma insingdi me ioar di eijek pahu jang Abraham lel David, di eijek pahu jang David lel kalipliplahng Babylon, di eijek pahu jang kalipliplahng Babylon lel Christ.
Doahr Noaisikdihn Jesus Christ
18 Me ioar mwomwen en Jesus Christ noaisikdi: Ah nohno Mary inoauwen pwoapwoaud oang Joseph, a mwohn ara paspene, diarekda pwa ih lijaian jang Ngen Joarwi. 19 A Joseph nehn ah wia woal lelpoak apel pwung men johpwa nimen koauwehla oadoan Mary mwohn armaj kan, lemehda pwa ih en mweijang ih in rir. 20 A mwerin ah lemehda me, Sohnloang in Koaunno men pwokkoang ih nehn ah oarmoan pwehng ih, “Joseph nihn David, joah mijik in oaloa Mary wiahkihla pahioamw, pwa dahkij ih lijaiankihda jang Ngen Joarwi. 21 Ih pirin noaisikihdi jermwein men, koawoa en kioang oadoa Jesus* Addoauwe Jesus woahwoahki “Koaunno koamoaurla”., pwa Ih pirin doaroahla Nah armaj jang nehn diparaihok.”
22 Mehpwiai ohroj wiawi pwa en pwoaida da ma Koaunno pwa jang ipen joukohppo, 23 “Meipwonno pirin lijaianda, noaisikihdi jermwein men, ma irai pirin kioang oadoa Emmanuel,” (woahwoahki “Koahs pwilpwili kisai”).
24 Nehn en Joseph pwohrda ih wia da sohnloang in Koaunno pwehng ih. Ih ken oaloa Mary painkihla. 25 Joseph johpwa suhwoang Mary in palwahr oaroh liho noaisikihdi nah jermweinno. Ih kioang oadoa Jesus.

*1:21 Addoauwe Jesus woahwoahki “Koaunno koamoaurla”.