1 Oau rehn Jesus minmine in oaroahr in Lehn Gennesaret, a armaj dir pokondohng Ipoa pwa irai en pwili rong mahjan in Koahs. 2 Ih kapangda pohs rahpas ma nihdekda poahrinjeddo; a sohnloakjid pwi ne kerdihjang puwoa pwa irai en inla duhpla nihrai nehk kan. 3 Jesus doaudahng pohn apas pohssok, woaroan Simon, pwehng ih en ekij woaroahjang in oaroahrro. Jesus ken mwindihoang pohn pohsso padahk oang pokonno.

4 Nehn Ah kadoarihla Ah padahk, a Ih pwehng Simon, “Simon, kasohdihwe ekij pohssen nehn wija loalen, pwa kamwai en kak kadarpijoang nihmwai nehk kan.”

5 Simon japoang, “Maing, kamai ne loakjid oaroh rehnpijoang a pwen joh koanoahmai. A ma koawoa ma pwa, ngoahi pirin kadardi nihmai nehk kai.” 6 Irai kadardi nihrai nehkkok; irai koldi dirin mwumw, nimwennoar soahrdi nihrai nehkkok. 7 Irai ken jeioahlihdo ioangoaraiok ma kijouki apas pohs, pwa irai en jeido jeuweje irai, irai ken jeido. Irai ken audohkihda mwummwok pohs rahpasso oaroh dir nimwennoar mwoidi. 8 Nehn en Simon Peter kapang dahkij ma ne wihwiawi, ih poadpwomwla mwohn Jesus, pwehng Ih, “Alwehjang ipoai Maing! Pwa armaj dipan men ngoahi!”

9 Ih apel pwilihoahk ohroj inenin pwuriamweikihla dirin koanoarai in loakjid oauwe ma irai ne koldi. 10 Apel doahroar ioange kan; James apel John, nihn Zebedee‑ok. Jesus pwehnglahng Simon, “Simon koawoa en joah majpwehk, pwa jang apkas inla koawoa pirin loakjidi armaj.”

11 Irai ken nihdda wararai pohssok nehn japw, kihdi arai me ohroj ken pwilihla Jesus.

12 Pehn oau Jesus minmine nehn kahnihmw oau ma woal men johmwehuki lepa mine. Nehn en woallo kapangda Jesus, ih rukdioaroh lel pwirej mwohn ih poaki, “Maing, ma koawoa nimen, a koawoa kak kamwkelehda ngoahi!”

13 Jesus kailla poah pukkoang woallo, Ih pwa, “Ngoahi nimen. Ken mwakelkelda!” Nehn anjoauwohr lepahu johla mine ipen woallo. 14 Jesus ruwoj ih, “Koawoa en johpwa pwehng emen. Inla ipen jamwrouwo en kajawi koawoa; pwa en kamehlelehng armaj ohroj pwa koawoa ne mwehula, a koawoa wia meiroanngo ma Moses koajoandi.”

15 Rongin Jesus ne kalohkla nehn wija dihrdir, apel armaj dir kin pokondo ipoa pwa ihr en rong Ih apel kemwehuwihla arai johmwehu kan. 16 A Ih kin inla kalahpwukla nehn japwsoahn kan, wija ma Ih kin kapkap.

17 Oau rehn nehn en Jesus wihwia Ah padahk, a Pharisee pwi apel jounkawoahwoa kojonneddo pwi pwili mine ipoa pidekihpene Ih; irai indoahjang nehn kahnihmw ohroj in Galilee apel Judea apel jang Jerusalem. Manman in Koaunno mine ipen Jesus pwa Ih en kemwehuwihla armaj johmwehu kan. 18 A, woal pwi pel leldo wah woal mwoasor men nehn rohp oau. Irai engdehn in dilkihda woal mwoasorro nehn ummwo kihdi mwohn mijen Jesus. 19 Nehn irai johkak dilkihda pwa jakahpaj in pokonno. Irai doaukihda pohn ummwo pwukulpijoang kadardi woal johmwehuwo nehn pwungen armajjok mwohn Jesus. 20 Nehn en Jesus kapang arai pwojon, Ih pwehng woallo, “Koampoakpoai! Dipoamw kan ne lapwda.”

21 Jounpadahk in Kojonneddok apel Pharisee‑ok sapda peidek oang pein irai, “Inje woal mene ma lahlahwe Koahs? Inje ma kak lapwadda dihp? Jaudi Koahs kalahpwuk kak mahkoahng dihp?”

22 Jesus ne kidal arai lamlam, ioar mehwa Ih pwehngkihoang irai, “Amwda amwai lamlam doahrenki nehn mohngiongimwai kan? 23 Ia mehwa moangoai in pwa, ‘Dipoamw kan ne lapwda,’ ke pwa, ‘Uhda alu’? 24 A Ngoahi en kamehlele oang kamwai en kidal pwa Nihn‑Armaj anki manmanin mahkoahng dihp pohn jampah.” Ih pwehng woal mwoasorro, “Uhda oaloa kioammwen koawoa inla in umwoammwo!”

25 A nehn anjoauwohr woallo mwoasorro ken uhda mwohrai ohroj, oaloa kiahu ma ih kin mine loaloa, inla in umwahu kapkapnga Koahs. 26 Ihr ohroj ken pwuriamweikihla mehlel! Nehn ahr majpwehk, irai kin kapnga Koahs pwahpwahpwa, “Ia woahr joangoan kapwuriamwei kan ma kamwai ne kapang rehnnoauwe!”

27 Mwerin mehpwiai, Jesus inlahjang wijahu, Ih kapangda jounrik daksis men oadoa Levi, ma mine nehn ah oahpisso. Jesus pwehng ih, “Pwilihla Ngoahi.” 28 Levi uhdahr kihdi me ohroj ma ih anki ken pwilihla Jesus.

29 Levi ken wiahda kamdipw koalik oau nehn umwahu oang Jesus; jounrik daksis dir apel armaj pwi pel pwili mwindihoang in sehpillo. 30 Pharisee pwi apel arai jounpadahk in Kojonneddo pwi lipahnedkihda apel pwehng nihn Jesus sohnpadahkkok, “Amwda kamwai ke kin pwili mwinge ipen jounrik daksis apel armaj dipan kan?”

31 Jesus japoang irai, “Jaudi armaj sihkei ioar anahne jounwini, a armaj johmwehu. 32 Ngoahi joah indoahng pangin armaj pwung kan en wiliakapwla, a pwen armaj dipan kan.”

33 Epwi armaj pwehng Jesus, “Nihn John jounpoapdaij sohnpadahk kan kalap kaijihjol apel kapkap, apel doahroar sohnpadahk in Pharisee kan kin wia, a nihmw kan kin mwinge apel nim.”

34 A Jesus japoangla irai, “Imdoahr, kamwai lemleme pwa kamwai kak kaijihjoli sohnkapar in kamdipw in koapwoapwoaud nehn en woal kamwohddo ah minmine iparai? Kamwai johkak! 35 A oau anjoau ma pirin indoa ma woal kamwohddo pirin wijik jang irai; doari, ioar anjoauwo irai pirin kaijihjol.”

36 Jesus pwehng irai karajraj pase: “Joh armaj kin soahr jang kijehn joakid kapw apel kioang in joakid dehn, pwa likkoau dehnno pirin koauwehla likkoau kappwo, a kijehn likkoau kappwo johpwa pirin pahrekkoang likkoau dehnno. 37 Pel doahroar, joh armaj kin widekihoang wain kapw nehn pehk in kilin mahn mering, pwa ma ih pirin wia me, wain kappwo pirin kahrehioang pehk merinngo ah pirin pwohngek pijoang apel soahroak pijoang, wain kappwo pirin widekla apel pehkko pirin ohla. 38 A, armaj kin widekihoang wain kapw nehn pehk kapw. 39 Apel joh armaj men nimen nim wain kapw mwerin ah ne nimla wain dehn. Ih pirin pwa, ‘Wain dehnno ioar mum.’ ”