1 Rehnin Sabbath oau Jesus alu nehn mwoaswel in wihd oau. Nah sohnpadahkkok dolihdi wehn wihd pwi irij nehn poahrai, kangkangkang allaluhla. 2 Pharisee pwi pwehng irai, “Da kamwai wihwiahki mehkij ma asai kojonneddo inoapwihdi en joah wiawi nehn rehnin Sabbath?”

3 Jesus japoang, “Kamwai johkin wadek da ma David wiahdahu anjoau ma ih apel pwilihoahk mwakohkohla? 4 Doahroar ah dilda nehn Umwen Koahsso, oaloa lopwon in pilahwa joarwi pwi, kangla apel kioang pwilihoahk en pel pwili kang. A asai kojonneddo kainoapwi armaj en jehpwili kang pilahwa joarwihok pwa jamwrou kan oar doari en kang?”

5 Jesus pel pwa, “Nihn‑Armaj ioar ma pel Koaun in Sabbath.”

6 Pel rehnin Sabbath oau Jesus dildahng nehn jinakoke oau pwa Ih en padahk. A woal men pel pwili minmine wijahu ma loap kidalin poah mwoasor. 7 Jounpadahk in Kojonneddo apel Pharisee pwi kin nimen kapangda mehkij japwung ipen Jesus pwa irai en kadpoahki Ih. Irai kin mwajmwajahn oar ma Jesus nen joah kemwehuwihla woallo ma mwoasor poah rehnin Sabbath. 8 A nehn en Jesus Ah woahwoahki arai lamlam, Ih pwehnglahng woal mwoasor poahu, “Koawoa, uhda indahdo in mijoahi.” Woallo indahla uhda inenda mwohrai. 9 Jesus pwehnglahng jounpadahk in Kojonneddo apel Pharisee‑ok, “Ngoahi nimen idoak mehkij ipamwai; dahioau asai kojonneddo mweidoahng kisai en wia rehnin Sabbath? Kisai en wia mehkij ma mwehu ke nauna? Kisai en jeuweje mourin armaj ke koauwehla?” 10 Ih jipwoaljili pohrai ohroj; a Ih pwehnglahng woal mwoasor poahu, “Kailwe poahmmwen.” Woallo kailla poah ken mwehula.

11 Jounpadahk in Kojonneddo apel Pharisee‑ok ken inenin lioasla apel sapda siksikoahpene nehn pwungarai da ma irai kak wiahng Jesus.

12 Anjoauwohr Jesus indahla pohn dol oau pwa en kapkap. Ih kapkap oang Koahs oaroh rehn. 13 Inminjoang in rehnno Ih panginpene Nah sohnpadahkkok apel pilda jang iparai eijek roahmenno, ma Ih kahdanki Woaroak. 14 Simon ma ih kahdanki Peter, apel Andrew rien Simon, pel James apel John, Philip apel Bartholomew; 15 Matthew apel Thomas, James nihn Alphaeus apel Simon (sohn pwihnin Zealot), 16 Judas nihn James, apel Judas Iscariot ma pirin pangla Jesus.

17 Jesus doaudihjang pohn dollo a wahnpoaroannok pel pwili: Ih uhda wija paspas kij pwilihki Nah sohnpadahk dir. Armaj inenin dir pwili pokondo wijahu jang wija ohroj nehn Judea, jang Jerusalem, jang kahnihmw in oaroahr kan in Tyre apel Sidon. 18 Ihr indoahng pwili rong Ih apel Ih en kemwehuwihla ahr johmwehuwok. Pel iraihok ma ngen jaus ne dilingla pwili mine wijahu, pwa Jesus en kemwehuwihla irai. 19 Armaj ohroj kin nimen pukkoang Jesus, pwa manman injang Ipoa apel kin kasihkeida ahr johmwehu kan ohroj.

20 Jesus kapkapangjili pohn Nah sohnpadahkkok, Ih pwa,

22 “Meid pai kamwai nehn en armaj kan ahr pirin lioassoang, kajohwe, kajarohdi apel koauwehla oadoamwai kan ki Nihn‑Armaj. 23 Kamwai perenda apel rahrahuki amwai malau anjoauwo, pwa dupkoamwai nehnloannge inenin koalik. Pwa ioar doahroar en jamaraihok wiahng joukohppok.

26 “Meid nauna oang kamwai ma armaj ohroj pirin kapnga kamwai; pwa ioar doahroar ma jamaraihok wiahng joukohp likammwok.

27 “A, Ngoahi pirin pwehng kamwai ohroj ma rongrong Ngoahi: kamwai ipwilki amwai imwinsihsi kan; kamwai wia mwehu oang ihr kan ma kin lioassoang kamwai; 28 kapaida ihr ma kin kariahla kamwai; kamwai kapkapki ihr ma kin wia naunahng kamwai. 29 Ma emen poki oaloap joapoamwen, mweidoahng oaloap. A ma emen kihjang oamw joakid, mweidoahng en pel oaloa oamw jehs. 30 Kioang armaj ohroj mehkij ma irai poaki ipoamw; apel ma emen kihjang mehkij ma uhdahn oamw, johpwa pwehng ih en kajpahlihdo. 31 En doahroar ma kamwai nimen armaj en wiahng kamwai, a ioar en doahroar amwai en wiahng irai.

32 “Ma kamwai pirin ipwilki iraihok oar ma ipwilki kamwai; joangoan pai da ma kamwai koapwoarpwoarki kamwai nen oaloa? Pwa armaj dipan kan pel kin ipwilki iraihok ma kin ipwilki irai. 33 Apel ma kamwai pirin wia me mwehu oang oar ma kin wia mwehu oang kamwai, joangoan pai da ma kamwai koapwoarpwoarki kamwai nen oaloa? Pwa armaj dipan kan kin pel wia joanngohr. 34 Apel ma kamwai pirin kioang mehkij oang irai kan oar ma kamwai kajik mehkij jang iparai, joangoan pai da ma kamwai joujowi kamwai nen oaloa? Pwa irai ma dipannok pel kin kioang ihr ma dipan kan pwa irai en pel oaloa dupkoa! 35 A joah! Kamwai en limpoak oang amwai imwinsihsi kan apel wia mwehu oang irai; kamwai kioang irai mehkij a joah kahjik kajpahlin jang iparai. Pwa dupkoamwai pirin koalik apel kamwai pirin wiahla nihn Koahs, Wija Laplap. Pwa Ih kin kalahngan oang ihr ma johkin kalahngan apel oang armaj nauna kan. 36 Kamwai en kin mahk doahroar Jamamwai ma kin pel mahk.

37 “Joah kadeik irai kan pwa kamwai en joah kadeikda ipen Koahs; Kamwai joah kariahla irai kan pwa kamwai en joah oaloa amwai karia ipen Koahs; kamwai mahkoahng irai kan pwa Koahs en pel mahkoahng kamwai. 38 Kamwai kihwe pwa kamwai en oaloa dupkoa jang ipen Koahs; kamwai wia kijakij japan, a Ih pirin kajpahlihdohng kamwai in woahioau ma isar, ma koalikjang, ma jikjang mehlel. Pwa mihn jonngohr ma kamwai pirin jongki irai kan, ioar ma Koahs pirin pel jongki kamwai.”

39 Jesus pel pwehng irai karajraj pase, “Joh armaj majkun men kak kahlwa emen majkun. Pwa ma ih pirin wia me, ira pirin kipdihoang nehn warwar. 40 Joh sohnpadahk men kin laplap jang ah jounpadahkko; a sohnpadahk ohroj, nehn ahr pirin koahiokla mehlel, irai pirin kin doahroarla ahr jounpadahk kan.

41 “Amwda koawoa ke soahk dipoar siksik kij nehn mijen rioammwo a koawoa joah injinohki pwilein suhkoahn nehn mijoammwen? 42 Ia mwomwen oamw kak pwehng rioammwo, ‘Menlau jowi mijkoalkoal, ngoahi en kihjang dipoar siksik kij in nehn pwoaroan mijoammwen’; nehn oamw johkak pein poahmda pwilein suhkoa nehn pwoaroan mijoammwen? Mwalaun men koawoa! Kihjang mijkoalkoal pwilein suhkoa nehn pwoaroan mijoammwen, koawoa kapwa kak kapang imdoahr oamw pirin kihjang dipoar siksik kij nehn mijen rioammwo.

43 “Suhkoa mwehu pas wah joh kin nauna; pel suhkoa nauna pas wah joh kin mwehu. 44 Kisai kin kidalki suhkoa ohroj jang in wahrai. Joh armaj kak dolihdi wehn fig jang in wehn suhkoa soaksoak, ke dolihdi jang wain in suhkoa mwahl. 45 Armaj mwehu men kin kajalehda mehkan ma mwehu pwa nehn ah mohngiong dirkihla me mwehu; doahroar armaj nauna men kin kajalehda me nauna pwa nehn ah mohngiong dirkihla me nauna. Pwa oawoan armaj kin kajalehda dahkij mine nehn mohngiongin.

46 “A, da kaspoan amwai pangpanginki Ngoahi ‘Koaun, Koaun,’ a kamwai joah wia dahkij ma Ngoahi kin pwehng kamwai? 47 Ngoahi pirin kajalehioang kamwai armaj joah lipilpil men ma kin indoahng rong Oai Mahjan pwiai apel kapwaihahda. 48 Ih pirin doahroar armaj ma kin kouda umwah: ih kin jaripda pwirej oaroh lel paip, ih kin poahjoanihdi umwahu pohn paippo. A nehn en lapake kin koardo lel ummwo, ih johkak kamwoakidda, pwa ih kokouda pohn paip. 49 A, ih ma kin rong Oai padahk kan, a johkin kapwaihahda, ih doahroar armaj ma kin kouda umwah pohn pwirej apel joh poahjoan in. Nehn anjoauwo ma lapake kin koardo lel ummwo ih kin kipdi apel mwoarpijoang. Ia pirin woahr ohla oauwe!”