1 Jesus dilda apel allaluhla nehn Jericho. 2 Woal koapwoahpwoa men mine wijahu, oadoa Zacchaeus, ma laplap ipen jounrik daksissok. 3 Ih nimen kapang pwa inje Jesus, a jang in ah mwosmwos, ih johkak kapang Jesus nehn pokonno. 4 Ih ken kijoula mwohn pokonno, doaudahng nehn suhkoa sycamore pas, pwa ih en kapang Jesus ma pirin wuddo wijahu. 5 Nehn en Jesus lel wijahu Ih jarda pwehng Zacchaeus, “Zacchaeus pispis doaudi pwa rehn oauwe Ngoahi pirin lel ipoamw nehn umwoammwo.”

6 Zacchaeus ken pispis doaudi, peren koalik kajamwo Jesus oang nehn umwahu. 7 Armaj ohroj ma ne pwili kapang me, irai sapda lipahnedki, pwa, “Woal mene ne pwili inla jang in Ah luk oang nehn umwen woal dipan men!”

8 Zacchaeus uhda mwohn Koaunno, pwehng, “Maing, ngoahi pirin kijkijoahki oaloap in oai koapwoa joamwoahmwoa kan, a ma mine emen ma ngoahi kapweipweidi, ngoahi pirin koapwung oang pak pahu koalikjang.”

9 Jesus japoang, “Rehn oauwe koamoaur ne lelloang in umw oauwe, pwa pel nihn Abraham armaj mene. 10 Pwa Nihn‑Armaj indoahng rapahki apel koamoaurla irai kan ma ne joaloangla.”

11 Nehn en armajjok ahr rongrong mehpwiai, Jesus pel kapsahng apas karajraj. Ih ne koaroanlahng Jerusalem, armajjok kin lemleme pwa Wein Koahs ne pirin oar janjalda. 12 Ih pwa, “Woal laplap men mine ma jeiloaklahng nehn japw dohioau pwa en kajapwildahng nahmwarki; a ih pirin pel japahldohng nehn uhdahn ah wija. 13 A mwohn ah pirin kijoula, ih panginpene nah lidu eijek, kioang emenemen mwani kohl oau, ih pwehng irai, ‘Kamwai kapang da ma kamwai kak wihn kihda jang in mwani pwiai, oaroh ngoahi pwurdo.’ 14 A armaj in jappwo kin lioassoang mehlel woallo, ioar mehwa irai kadarkihla jounpakair pwi mwerin ih en pwa, ‘Kamai joah mwehuki woal mene en wia amai nahmwarki.’

15 “Woallo ne wiahla nahmwarki ih japahldo. Ih pispis ruwoj nah liduhwok en indoa ipoa, pwa ih en kapang ia woahr mwani irai wiahda. 16 Lidu keiouwo indoa, pwa, ‘Maing, me ioar mwani kohl eijek ma ngoahi wihnki jang in mwaniho ma koawoa kioang ngoahi.’ 17 Woallo pwehng ih, ‘Inenin mwehu! Lidu lelpoak men koawoa. A pwa jang in oamw loalpwoas in mehkij ma siksik, ngoahi pirin kioang koawoa en koaun kahnihmw eijek.’ 18 Karoahmen in liduhwo pel leldo pwehng ih, ‘Maing, me ioar mwani kohl limoau ma ngoahi wihnki jang in mwaniho ma koawoa kioang ngoahi.’ 19 A ih pwehnglahng, ‘Ngoahi pirin kioang koawoa en koaun kahnihmw limoau.’ 20 Pel emen lidu indoa pwehng ih, ‘Maing, kapang nihmw mwanihwa me, ngoahi nekidla nehn dipwin likkoau kij. 21 Ngoahi mijik koawoa pwa koawoa woal jakon men. Koawoa kin oaloa mehkij ma jaudi oamw apel dolihdi mehkij ma koawoa joah poadokdi.’ 22 Woallo pwehng ih, ‘Lidu naunahmen koawoa! Ngoahi pirin doadoahkki pein oamw lal kan pwa en kadeikda koawoa. Koawoa kidal pwa ngoahi woal jakon men, ma kin oaloa mehkij ma jaudi oai apel doli mehkij ma jaudi ngoahi poadokdi. 23 A amwda koawoa joah nekidla noai mwanien nehn pangk? Pwa nehn oai pwurdo ngoahi en pwuroahng oaloa pwilihkihla wihnin.’ 24 Ih pwehng irai ma pwili mine wijahu, ‘Kamwai kihjang mwani kohl en jang ih, kioang ih ma nainki mwani kohl eijekko.’ 25 A irai pwehng, ‘Maing, ne mine nah mwani kohl eijek!’ 26 A ih japoang irai, ‘Kamwai en kidal pwa emen ma anki mehkij, a mehkij koalikjang pirin liklikoang, a irai ma joh arai mehkij mihndahr ma siksik pirin liklikjang. 27 Doari, iraihok ma oai imwinsihsi ma joah mwehuki ngoahi en wia arai nahmwarki, wahdo kojukdi irai mwohn ngoahi.’ ”

28 Mwerin en Jesus pwahla mehpwiai, Ih wudla mwohrai inlahng Jerusalem. 29 Nehn Ah ne koaroanlahng Bethphage apel Bethany ipen Dolin Olip, Ih kadarla Nah sohnpadahk roahmen mwohrai, 30 “Kamwa alwe nehn koujappwen mwohmwa. Nehn amwa pirin dilda, kamwa pirin kapangda ejel pwulopwul men ma pirapir, ma pe kahjik armaj men dakoa. Kamwa lapwadda, ukdo. 31 A ma emen idoak ipamwa, mihndahng kamwa ejellen, kamwa japoangki, ‘Koaunno anahne.’ ”

32 Ira inla diarda joang ohroj doahroar en Jesus pwehng ira. 33 Nehn ara lapwlapwad ejel pwulopwullo, armajjok ma nainki idoak ipara, “Amwda kamwa ke lapwadda?”

34 Ira japoang, “Koaunno ma anahne.” 35 Ira ken ukdohng ipen Jesus. Irai piroakihoang likkoau puwoa apel jeuweje Jesus en doaudahng puwoa. 36 Nehn Ah allaluhwe armajjok piroakihdi arai likkoauwok pohn allo.

37 Nehn Ah koaroannoang Jerusalem, wija ma allo kijoudihlahng Dolin Olip, pokon koalikko ma pwilpwilihwe Ih siakda koaul in kapingkalahngan oang Koahs in ngil koalik ki kapkapnga Ih ki joang ohroj ma irai ne kapang, 38 “Koahs en kapaiahda nahmwarki ma allalu indoa in oadoan Koaunno! Popohl in nehnloannge apel lingin aluhwoang Koahs!”

39 Pharisee pwi ma pwili pokonno pwehnglahng Jesus, “Jounpadahk, pwehng nihmw sohnpadahk kan en nennenla!”

40 Jesus japoang, “Kamwai en kidal pwa ma irai nennenla, a sakai pwiai pirin sapda rahrahu.”

41 Nehn Ah ne koaroanlahng kahnihmmwo, Ih ne kapangda, Ih jangidla. 42 Ih pwa, “Ma koawoa pwen kidal oar rehnnoauwe da ma uhdahn pirin kioang oamw popohl! A apkas koawoa johkak kapang! 43 Pwa anjoau kij pirin leldo, ma oamw imwinsihsi kan pirin kelihpene koawoa, pidekihpene koawoa, sohpenehng koawoa jang loap ohroj. 44 Irai pirin koauwehla koawoa pwilihki nihmw armaj kan dauluhl. Johpwa sakai oau pirin luhwoahdi nehn dohiah, pwa koawoa johpwa woahwoahki anjoau ma Koahs indoahng koamoaurla koawoa.”

45 Jesus dilda nehn Umw Joarwiho sapda kajroahjang jounnoasnoassok, 46 pwehng irai, “Ne insingdi nehn Puk Joarwi ma Koahs pwa, ‘Umwoaie pirin adanki umwen kapkap.’ A kamwai ne wiahkihla dohn jounpirap pwi!”

47 Ih kin padpadahk nehn Umw Joarwiho rehn ohroj. Jamwrou laplappok, jounpadahk in Kojonneddok apel koaun in armaj kan nimen kojukdi Jesus. 48 Irai johkak en diarda imdoahr irai en wia me, pwa armaj ohroj kin nimen rongrongoar Jesus, joah nimen luhj jang oau Ah padahk kan.