1 Jesus jipwjipwoaljili nehn Umw Joarwiho, Ih kapangda doahroar epwi armaj koapwoahpwoa ahr peiddi ahr meiroang kan nehn dohn meiroanngo. 2 Ih pel kapangda liohdi joamwoahmwoa men ma peiddi sen soal riau. 3 Ih pwehnglahng sohnpadahkkok, “In mehlel kamwai en kidal pwa dahkij liohdi mene kihdi koalik jang en ohroj. 4 Pwa irai ohroj meiroangkihoang Koahs mehkij jang nehn ahr pai kan. A lihmene jang nehn ah joamwoahmwoa ih meiroang kihla meohroj ma ih nainki apel kin mourki.”

5 Epwi Nah sohnpadahkkok siksikoa doahroar Umw Joarwiho, doahroar mwehuwin koajkoajin sakaihok ma wiahda ummwo apel doahroar ling in kapwas ma armaj kan kin meiroang kioang Koahs. Jesus pwa, 6 “Kamwai kapang pwa rehnnoau pirin indoa ma mehpwiai ohroj ma kamwai widwidahli pirin johla mine, johpwa sakai oau pirin luhwoahdi pohn oau; ohroj pirin mwoardi.”

7 Irai kalelpoak ipoa, pwa, “Maing Jounpadahk, ngehd joang pwiai pirin pwoaida? Kilel da ma pirin kajalehda pwa anjoau in joang pwiai ne koaroando?”

8 A Jesus pwa, “Kamwai mwajahn pwa armaj doar kapweipweidi kamwai. Pwa armaj dir pirin pwokdo in oadoaioa, pwa, ‘Ngoahi ioar Ih! Anjoauwa me!’ A kamwai johpwa rong irai. 9 Kamwai johpwa majpwehkda nehn amwai pirin rong rongin mahwin apel mwei apwal kan; pwa joang pwiai uhdahn pirin wiawi mwowoa, a imwin anjoau kahjik pirin lel.”

10 Ih pel pwa, “Pei pirin wiawi nehn pwungen japw kan, mahwin pirin pwoaida nehn pwungen wei kan. 11 Roarroarin japw kamajpwehk, lehk, johmwehu nauna pirin wiawi wija ohroj; joang kamajpwehk apel kilel kapwuriamwei pwi pirin pwokda pehnloannge. 12 A mwohn mehpwiai ohroj pirin wiawi; kamwai pirin joaldi apel koaloklok, kamwai pirin panngekla nehn jinakoke kan apel wijiklahng nehn kalpwuhj kan, kamwai pirin wijikoang mwohn nahmwarki apel mwohn koaun in wei kan ki oadoaioa. 13 A ioar anjoauwa ma kamwai pirin kadehdehda Ngoahi. 14 Koajoanehdi nehn amwai lamlam kan mwohn anjoau, kamwai en joah pwunodki imdoahr amwai en japoang irai; 15 pwa Ngoahi pirin kioang kamwai joangoan japoangek pwi apel marain pwi ma joh emen ipen amwai imwinsihsi kan kak pallanda apel kajohwe. 16 Jamamwai apel inamwai kan, riamwai kan, kijehmwai kan apel amwai pirien kan, ioar irai ma pirin pangla kamwai, pel pirin kojukdi epwi kamwai. 17 Armaj ohroj pirin lioassoangda kamwai ki Ngoahi. 18 A, johpwa pisen moangoamwai pas pirin mwoarjang. 19 Kasihkei kamwai pwa kamwai en pein doaroahla kamwai.

20 “Nehn amwai pirin kapang karej in jounpeihok ma ne pidekihpene Jerusalem, kamwai pirin kidal ki pwa anjoau in ah ohla ne koaroando. 21 A nehn anjoauwo irai kan ma minmine nehn Judea, irai en uhdahn kaulahng pohn dol kan; irai kan ma minmine nehn kahnihmmwo; irai en uhdahn injang loaloa; irai ma minmine nehn japw, irai en johpwa pwurdo nehn kahnihmmwo. 22 Pwa rehn pwiok ioar ‘Rehnin koaloklok,’ anjoau in meohroj ma insingdi nehn Puk Joarwi pirin pwoaida. 23 Ia wen nauna oang li lijaian kan apel nohno kan ma kadihdi nehn rehnnok! Pwa apwal koalik pirin lel japw oauwe, apel en Koahs lioas koalik pirin lel sowoahkan. 24 Irai pirin mehkihdi kodlaij apel epwi pirin joallahng nehn wein likin ohroj, apel Jerusalem pirin siakekpijoang pehn ehn ihr ma rosros kan, oaroh ahr anjoau en doarihla.

25 “Kilel kapwuriamwei pwi pirin pwokda in joauwo, in johnpwonngo, apel in ujuhkan. Nehn jampah wija ohroj nehn wei kan, armaj kan pirin mijikda ngirngir koalik in nehn madauwo apel ngilen no koalik kan. 26 Irai pirin mwehlehlkihla arai mijik nehn ahr pirin joujowi mehkan ma pirin wiawi oang jampah pokon; pwa koajoandihn nehn woahwoa pirin isikekda. 27 Ioar anjoauwo ma Nihn‑Armaj pirin pwokda allaluhdo nehn koasoau ki rojon apel ling koalik. 28 Nehn en mehpwiai sapda wiawi, kamwai uhda apel jarda, pwa koamoaurpamwai ne koaroando.”

29 Doari Jesus pel pwehng irai karajraj pase, “Kamwai soahk mwehu doahroar suhkoa fig apel suhkoa sohrohr kan ohroj. 30 Nehn amwai kapang soahn suhkoa pwiai ahr kin sapin pwokda, kamwai en kidal pwa roak ne koaroan. 31 Pel doahroar, nehn amwai pirin kapang mehpwiai pirin wiawi, kamwai en kidal pwa Wein Koahs ne pirin ken lel.

32 “Ngoahi pwehng kamwai in mehlel, pwa mehpwiai ohroj pirin wiawi mwohn armaj in dihoauwe ohroj ahr pirin mehdi. 33 Nehnloannge apel jampah pirin joaloangla, a Oai Mahjan kan pirin johkak joaloangla.

34 “Kamwai kanaihoahng kamwai. Kamwai joah kadroapwoahki kamwai kamkamdipw apel jakjakau, apel pwunod kan in mour oauwe; pwa Rehnno kak oar lidipihdi kamwai. 35 Ih pirin indoa doahroar lidip oau oang armaj ohroj pohn jampah. 36 Kamwai en kapang mwehu apel kapkap anjoau ohroj pwa kamwai en sihkei apel isar oang pisjang mehpwiai ohroj ma pirin wiawi, apel warroang uhda mwohn mijen Nihn‑Armaj.”

37 Jesus kin padahk inrehn kan nehn Umw Joarwiho, a injoausik kan Ih kin injang nehn kahnihmmwo Ih inlahng in Dolin Olip, mine o inpwong. 38 Inminjoang kan armaj ohroj kin inlahng Umw Joarwiho pwa ihr en rong Ih.