1 Anjoau in Joarwihn Pilahwa Joah Doal Ihs, ma adanki Passover, ne koaroan. 2 A jamwrou laplappok apel jounpadahk in Kojonned o raprapahki da irai en kak kojukkihdi Jesus; pwa irai inenin mijik armaj kan.

3 Jehsen ken dilloang nehn Judas, ma adanki Iscariot, emen in irai eijek roahmenno. 4 Judas inlahng ipen jamwrou laplap apel koaun in Umw Joarwihok pwehng irai doahroar ah pirin panglahng Jesus irai. 5 Irai inenin malaukihda apel pwungkihpene irai en dupukki ih mwani. 6 Judas pwungkihla apel sapda joujowi anjoau mwehu ma en kak panngoang Jesus irai nehn en armaj kan ahr pirin jehjoa.

7 Joarwihn Pilahwa Joah Doal Ihs ne leldo, anjoau ma jihpw pwulopwul oang kamdipw in Passover kin kojkojdi. 8 Jesus kadarla Peter apel John, pwehng ira, “Kamwa alwe koaunopda asai sehpil in Passover.”

9 A ira pwehng Ih, “Ia wija koawoa mwehuki kama en koaunopda?”

10 A Ih japoang, “Kamwa kapang nehn amwa pirin dilda nehn kahnihmmwo, kamwa pirin suhwoang woal men ma wa poakis in pil oau. Kamwa kauj ih oaroh in dilda nehn umw oau. 11 Kamwa pwehng koaun in ummwo, ‘Jounpadahkko kadardo kama ipoamw, pwa: Ia pere ma Ngoahi apel Noai sohnpadahk kan pirin kang kamdipw in Passover loaloa?’ 12 Ih pirin kajalehioang kamwa pere koalik oau puwoa ma ne koajoanjoandi, ioar wijahwa ma kamwa pirin koaunopda joang ohroj.”

13 Ira inla kapangda joang ohroj doahr en Jesus pwehng ira. Ira ken koaunopda kamdipw in Passover.

14 Nehn anjoauwo ne lel, Jesus apel Nah wahnpoaroannok mwindihoang nehn dohiarai in sehpillo. 15 Ih pwehng irai, “Ngoahi ngoangkihla mehlel pwili kamwai wia kamdipw in Passover oauwe mwohn Oai pirin loklok! 16 Kamwai en kidal pwa Ngoahi ne johla pirin pwuroahng pwili kang Passover oauwe oaroh janjalda woahwoa in unjek nehn Wein Koahs.”

17 Jesus pwoakda mwoak oau, kaping kalahngan oang Koahs, pwa, “Kamwai oaloa mwoak oauwe kamwai ohroj nim. 18 Kamwai en kidal pwa Ngoahi ne johla pirin pwuroahng nim wain oauwe jang me inla oaroh lel anjoauwo ma Wein Koahs pirin lel.”

19 Ih pel pwoakda pilahwahu, kaping kalahngan oang Koahs, Ih sipwangdi kioang irai, pwa, “Ioar palwoaroaioahwa me ma liklikkoang kamwai. Wia me oang mihn kasmanda Ngoahi.” 20 Pel doahroar, mwerin mwinge Ih kioang irai mwoak oau, pwa, “Mwoak oauwe ioar en Koahs inoau kapw ma wiawihkihda insahihoa ma ne widekla ki kamwai.

21 “A, kapang! Ih ma pirin pangla Ngoahi pwili mine in sehpil oauwe. 22 Nihn‑Armaj pirin mehdi doahroar en Koahs ne koajoanehdi; ia woahr nen naunahng armajjo ma pirin pangla Ih!”

23 Irai sapda peidek pene nehn pwungarai, inje in irai ma pirin kak wia joang oauwe.

24 Sohnpadahkkok akmaikihda inje ma pirin keiou laplap nehn pwungarai. 25 Jesus pwehng irai, “Nahmwarki in armaj rosros kan in jampah anki manman in koaunda nihrai armaj kan. Koaun in armaj kan pwa ihr ioar ‘En Armaj Pirien.’ 26 A ih jehpirin doahroar me ipamwai; pwa ih ma keiou laplap ipamwai pirin doahroar ih ma keiou siksik; a ih ma koaun pirin doahroarla lidu. 27 Pwa inje ma laplap ipen ihr ma kin mwindi oang mwinge ke ih ma kin sahpis? Jaudi ih ma kin mwindi oang in sehpil? A Ngoahi mine nehn pwungamwai kan wia sohn sahpis men.

28 “Kamwai kin minminehr Ipoai anjoau ohroj nehn Oai apwal kan. 29 Apel nehn en joamoaiho kioang Ngoahi manman in koaun, Ngoahi pel pirin kioang kamwai joangoan manmannohr. 30 Kamwai pirin pwili ngoahi mwinge in oai sehpil nehn oai Wei, kamwai pirin pwili mwindi pohn mwoal pwa en wia koaun kadaudok eijek riau in Israel.”

31 Jesus pwa, “Simon, Simon! Kapang pwa Jehsen ne oaloa mweimwei pwa en jong kamwai ohroj doahroar jounmwoaswel men ah kin pohkjang kilin wehn wihd. 32 A Ngoahi kapkapki koawoa, Simon, pwa oamw pwojon en joah ohla. Apel nehn oamw pirin japahldo Ipoai, koawoa pirin kasihkeida pwojon in rioamw kan.”

33 Peter japoang, “Maing oai Koaun, ngoahi ne onopda en pwilihla koawoa nehn kalpwuhj apel pwili koawoa mehdi.”

34 A Jesus japoang, “Peter, koawoa en kidal pwa rehn oauwe, mwohn joang jummwa koawoa pirin kahmahmkihla Ngoahi pehn jiluh pwa koawoa kidal Ngoahi.”

35 Jesus idoakkoang Nah sohnpadahkkok, “Anjoauwo ma Ngoahi kadarwe kamwai, joah wa pwuko, pehk ke ju, a mine mehkij kamwai apwalkihda?”

Irai japoang, “Joh mehkij.”

36 Jesus pwehng irai, “A apkas, ma mine emen nah pwuko apel pehk, a ih en wahda, a emen ma joh nah kodlaij a ih en noaskihla ah joakiddo dupukkihda apas kodlaijjo. 37 Pwa kamwai kidal pwa Puk Joarwi pwa, ‘Ih pwili wadwad oang armaj nauna kan,’ uhdahn en pwoaida. Pwa me ma ne insingdi oang Ngoahi, kin pwoaida.”

38 Sohnpadahkkok pwa, “Kapang, Maing amai koaun, kodlaij rahpas me!”

A Jesus japoang, “Ne isar!”

39 Jesus injang nehn kahnihmmwo, inlahng in Dolin Olip, doahroar ma Ih kin kalap wia; Nah sohnpadahkkok pel pwilihla. 40 Anjoauwo Ih lel wijahu, Ih pwehng irai, “Kapkap pwa kamwai en joah lel nehn jongjong.”

41 Ih ken sohrohrla jang irai, dohinoar armaj kin kasoahla sakai oau; Ih ken poadpwomwla kapkap, 42 Ih pwa, “Joamoai, ma koawoa mwehuki, a Koawoa kihwe jang Ngoahi dal en loklok oauwe. A joah, jaudi injenoai, pwa kupwuroamwen ioar en pwoaida.” 43 Sohnloang men jang nehnloannge pwokdohng Ih, kasihkeida Ih. 44 Nehn Ah ne inenin pwunod koalikda, Ih kasihkeila Ah kapkap; pwudohn Ih koardihoang pohn pwirej doahroar insa.

45 Ih uhda jang Ah kapkap japahllahng ipen Nah sohnpadahkkok kapang irai pwen moair pwa johla engirai ki arai injinjuwed. 46 Ih pwehng irai, “Da kamwai moahmoahmoairki? Kamwai pwohrda kapkap pwa kamwai en joah lelloang nehn jongjong.”

47 Nehn anjoauwo ma Ih pe lallal, pokon oau leldo wijahu; Judas, emen ma sohnpadahk eijek roahmenno, ma uk irai. Ih sohlahng oar ipen Jesus kiski Ih. 48 A Jesus pwa, “Judas, kis oau ma koawoa pangkihla Nihn‑Armaj?”

49 Nehn en sohnpadahkkok ma pwili Jesus kapangda dahkij ma pirin wiawi, irai pwehnglahng Jesus, “Maing amai Koaun, kamai en doadoahkki nihmai kodlaij kai?” 50 Emen irai ken poaloa nihn Jamwrou Laplap nah lidu men, poaloahjang sioa loap moaun.

51 Jesus pwa, “Ne isar, doari!” Ih ken pukkoang oar sien woallo ken mohdi.

52 Jesus pwehnglahng jamwrou laplappok apel koaun in Umw Joarwiho apel joun kaweid kan ma pwili indoahng oaloa Ih, “Kamwai indoa wa kodlaij apel mihn pok, doahroar ma Ngoahi pwen lollap men? 53 Ngoahi kin minminehr ipamwai rehn ohroj nehn Umw Joarwiho, a kamwai johpwa jong in koldi Ngoahi. A apkas ioar amwai anjoau, apel anjoauwa ma in manman in rosros pirin koaunda.”

54 Irai joalihdi Jesus uklahng in umwen Jamwrou Laplappo; a Peter pwilpwilihla irai a ekij dohjang irai. 55 Nehn pwungen kello, oai kij jaunekda. Peter pwili mwindi ipen ihrrok ma mwindi pidekihpene oaiho. 56 Emen liduhwok kapangda ih pwili mwindi ipen oaiho, ih kakilihdi, ih pwa, “Woal mene pel pwili Jesus.”

57 Peter kahmahmki, pwehnglahng, “Li, ngoahi pwanah jehjoa ih!”

58 Mwerin anjoau kij, woal men kapangda Peter, ih pel pwehnglahng, “Koawoa pel emen irai!”

A Peter japoang, “Woal, jaudi ngoahi!”

59 Oaroh mwerin awa oau pel emen woal engdehnki sihkei pwa, “Mehlel pwa woal mene uhdahn pwili Jesus pwa ih pel mihn Galilee men!”

60 Peter japoang, “Woal, ngoahi jehjoa pwa da koawoa siksikoahn!” Nehn anjoauwohr ih lallallal, a ne joang jummwa. 61 Koaunno jipwoallahng Peter kakildi ih; doar Peter samanda pwa Koaunno ne pwen pwehng ih, “Mwohn joang jummwa pwongoauwe koawoa pirin pwa pehn jiluh pwa koawoa jehjoa Ngoahi.” 62 Peter inlahjang, dilla likin injinjuwedkihla ken joang.

63 Armajjok ma jiljiloa Jesus kapiski apel poki Ih. 64 Irai kin poaroahla mijoa apel idoak, “Inje ma poki koawoa? Kajawihda!” 65 Irai kin pwehng Ih joang nauna dir.

66 Nehn ah rehnpijoang, koaun in mihn Jew‑ok, jamwrou laplap, apel jounpadahk in Kojonneddok pokonpene, a Jesus ukkukdohng mwohn Sohn Mwoalen Koapwunngo. 67 Irai idoak ipoa, “Pwehng kamai, koawoa ioar Messiah?”

Ih japoang, “Ma Ngoahi pwehng kamwai, kamwai nen johpwa kamehlele Ngoahi. 68 A ma Ngoahi idoak oang kamwai mehkij, kamwai nen johpwa japoang. 69 A kamwai en kidal pwa jang apkas inla Nihn‑Armaj pirin mwindi in loap moaunin Koahs Wija Laplap.”

70 Irai ohroj idoak, “Doari, Koawoa ioar nihn Koahs?”

Ih japoang irai, “Kamwai ma pwa Ngoahi ioar Ih.”

71 Irai pwahla, “Doari, kisai johpwa anahne jounkadehde, pwa pein kisai ne rong da Ih pwa!”