1 Math 7:1; Luke 6:37Imdoahr koah, koampoakpoai, kin kadeikda epwi armaj? Doari, joah lipilpil inje koah, joh oamw pwung oau koawoa en doaroa pein koah; pwa nehn oamw kin kadeikda emen sohrohr apel wia joanngok ma irai kin wia, koah kin pein kadeikda koawoa. 2 Kisai kidal pwa Koahs ma pwung anjoau in Ah kin kadeikda armaj kan ma kin wia joang pwiai. 3 Koampoakpoai, pein koah kin wia joang pwiai ma koah kin kadeikkihda emen sohrohr! Imdoahr, koah lemleme pwa koah pirin pisjang kadeik in Koahs? 4 Ke dapwa koah kin pwen kajohwe Ah kalahngan laplap, kadek, apel kanangmah. Imdoahr? Koah johpwa woahwoahki kahrpoan Ah mohngiong kadek, pwa Ih kanangmah joujowi koawoa en koaluhla apel wiliakapwla? 5 A mohngiongimmwen ne koapsakaila apel masakla, ioar kahrehda koawoa pein kakkakoalikihla oamw koaloklok nehn Rehnno en Koahs lioas apel kadeik pwung pirin janjalda. 6 Psa 62:12; LP 24:12Pwa Koahs pirin kijkijoa emenemen, in doahr dahkij koanoahng ah wihwia kan. 7 Epwi armaj kin kalap wia me mwehu, apel kin rapahki klohri, apel woaun, apel mour joh imwin; doari, Koahs pirin kioang irai mour joahsuk. 8 Epwi armaj kin noaroak ken kerpwihla me mehlello pwa irai en kauj me nauna: doari, Koahs pirin kihdihoang pohrai Ah lioas koalik. 9 Loklok apel weiroak pirin mine oang armaj ohroj ma kin wihwia me nauna; sapkihda mihn Jew-ok apel oang mihn likin kan. 10 A Koahs pirin kioang armaj ohroj ma kin wihwia me mwehu klohri, woaun, apel moaloailoai; sapkihda mihn Jew-ok apel oang mihn likin kan. 11 Deut 10:17Pwa Koahs johkin lipilpilki armaj.

12 Doari, mihn likin kan jehpwili anki Kojonned in Moses; a irai kin wiahda dihp pel kadeikda mihndahr ma irai jehpwili anki Kojonneddo. Mihn Jew-ok anki Kojonneddo; doari, irai kin wiahda dihp apel kadeikkihda Kojonneddo. 13 Pwa jaudi jang in rongrongoar Kojonneddo ma armaj kin pwungla ipen Koahs, a pwen jang in ahr kin kapwaihahda audoapoan Kojonneddo. 14 Mihn likin kan jehpwili anki Kojonneddo; a nehn anjoau kan ma irai kin kapwaihahda audoapoan Kojonneddo, jang in pein arai poapoahm, en woahwoahki pwa irai ne kajalehda pwa irai kidal Kojonneddo mihnda ma irai jehpwili anki Kojonned in Moses-o. 15 Arai wihwia kan kin kajalehda pwa audoapoan Kojonneddo ne insingdi nehn mohngiongirai. Pein arai lamlam pwung kin kajalehda doahr mehlel in me, pwa epwi anjoau arai lamlam kin kadipoahda irai apel epwi anjoau kin doaroahla irai. 16 Doari, doahr Rongmwehu ma ngoah kin kalohkkihjili, ioar doahr Rehnno ma Koahs pirin kadeikda lamlam rir in armaj kan ki Christ Jesus.

17 Imdoahr koah? Koah pwa koah mihn Jew; koah koapwoarpwoarki Kojonneddo, apel kin juweiki doahroar Koahs; 18 koah kidal dahkij Koahs mwehuki koawoa en wia, a koah ne kidalda jang nehn Kojonneddo pwa koah en pilda dahkij ma pwung; 19 koah kin wiahki koawoa joun kahlwa armaj majkun men apel kamaram in armaj ma minmine nehn ros, 20 apel jounkaweid in armaj pweipwei kan, jounpadahk in armaj jawoahwoa kan. Koah pein lemleme pwa koah anki joangoan loalkoang apel mehlel ohroj jang nehn Kojonneddo. 21 Koah kin padahki armaj, a dahkij koah joah padahkihki pein koawoa? Koah kin padahkki, “Joah pirap,” a imdoahr, koah johkin pirap? 22 Koah kin pel pwa, “Joah kamwahl,” a imdoahr, koah johkin kamwahl? Koah kin saski kohs likamw kan, a imdoahr koah johkin pirapoa umwen joaroawi kan? 23 Koah kin juweiki oamw anki Kojonned in Koahs, a imdoahr, koah johkin kihjang woaun in Koahs nehn oamw kin koauwehla Ah kojonned? 24 Isa 52:5Puk Joaroawi pwa, “Kamwai mihn Jew ioar ma kahrehda mihn likin kan lahlahwe Koahs.”

25 Ma koah kin kapwaihahda Kojonneddo, mine kaspoan oamw jorkomjaij; a ma koah johkin kapwaihahda Kojonneddo, mwehu in oar ma koah pwen johpwa jorkomjaij. 26 Ma mihn likin men ma johpwa jorkomjaij, a ih kapwaihahda audoapoan Kojonneddo, imdoahr, Koahs joah nen wiahki ih armaj jorkomjaij men? 27 Kamwai mihn Jew kan pirin kadeikda ipen mihn likin kan pwa kamwai kin koauwehla Kojonneddo, mihndahr ma ih insingdi oang kamwai ma jorkomjaij; a irai kin kapwaihahda Kojonneddo, mihndahr ma irai johpwa jorkomjaijla in palwoaroarai. 28 Doari, inje ma uhdahn mihn Jew, inje ma uhdahn jorkomjaij? Jaudi ih ma mihn Jew likin oar doari, ma ah jorkomjaij minehr in palwoaroa. 29 Deut 30:6A ih ma uhdahn mihn Jew, ioar ih ma wia mihn Jew loaloa. Me woahwoahki pwa ah mohngiong ne jorkomjaijla — ioar doadoahk in Ngenin Koahs, jaudi doadoahk in Kojonned insingdiho. Doari, joangoan armaj mene kin oaloa kaping jang Koahs, a jaudi jang armaj.