33
Moyize sakumunaka bifumba kumi na zole ya Isayeli
1 Yayi ni mambu ya lusakumunu yina Moyize, muntu ya Nzambi, zonzaka samu na kusakumuna bana ya Isayeli tekila lufwa ya yandi.
2 Yandi tubaka:
«Yave me kwiza, katuka kuna na mongo ya Sinayi.
Yandi me katuka kuna na mongo ya Seyile samu na bawu.
Katuka mongo ya Palane, yandi me talana na kulezima nyonso.
Yandi me basika na makumi ya mafunda ya balongo.
Na diboko ya yandi ya lubakala, yandi me fidisa bawu tiya ya Musiku.
3 Yave, nge yina zola makanda ya Isayeli,
balongo nyonso kele na maboko ya nge.
Bawu yayi na makulu ya nge,
bawu ke na kuwaka mambu ya nge.
4 Moyize me pesa beto Musiku,
mvwilu ya mukangu ya Yakobi.
5 Ba ndimaka yandi mutindu ntinu na YesuluneMus 32.15,
ntangu bakuluntu ya mukangu yonzamaka
kintwadi na bifumba nyonso ya Isayeli.»
6 Moyize tubaka dyaka:
«Bika ti Lubene kuzinga, bika ti yandi kufwa ve.
Ata ti bawu kele na lutangu ya fyoti!»
7 Na yina me tadila Yuda, Moyize tubaka mutindu yayi:
«Yave, kuwa ndinga ya Yuda.
Vutula bantu ya Yuda na kintwadi na bampangi ya bawu.
Bika ti maboko ya bawu kunwanina bawu.
Bika ti nge mosi nge sadisa bawu samu na kukuula bawu na maboko ya mitantu ya bawu!»
8 Na yina me tadila Levi, Moyize tubaka:
«Yave, ba pesaka TumimeTumime Kbk 28.30 ya nge na Levi.
Ba pesaka Ulime ya nge na muntu ya nge yina ke ya kukwikama na nge.
Yandi yina nge mekaka kuna na Masa,
yandi yina sombolaka nge kuna na maza ya MelibaMaza ya Meliba Kbk 17.1-7.
9 Yandi yina tubaka samu na tata na mama ya yandi ti:
“Mu me tala bawu ve”.
Yandi yina mangaka na kutala ti yayi ni bampangi ya munu mosi.
Yandi yina mangaka na kutuba ti yayi kele bana ya munu mosi.
Samu ti bawu landaka kaka mambu ya nge.
Bawu kebaka ngwisani ya ngeKbk 32.25-29.
10 Bika ti bawu kulongisa bansalulu ya misiku ya nge na Yakobi!
Bika ti bawu kulongisa Musiku ya nge na Isayeli!
Bika ti bawu kutula maaka ya nsunga ya mbote na mantwala ya bambombo ya nge!
Bika ti bawu kutula Munkayulu ya Kuyoka na kiyokolo ya nge ya minkayulu!
11 Yave, pesa bawu ngolo!
Sakumuna mambu nyonso yina bawu ke sala!
Mwangisa bambanzi ya bayina ke tediminaka bawu,
mpe ya bayina ke yinaka bawu: bawu fwana kutelama ata fyoti ve!»
12 Na yina me tadila Bezame, Moyize tubaka mutindu yayi:
«Yandi kele kifumba ya kuzolakana na Yave.
Yandi ke vwandaka na yisi ya lukengolo na sika ya Yave.
Yave ke kebaka yandi ntangu nyonso.
Yandi ke vwandaka na magembo ya Yave.»
13 Na yina me tadila Yosefi, Moyize tubaka mutindu yayi:
«Yave sakumunaka ntoto ya bawu
na kupesaka bawu makabu ya zulu, kinoko.
Yave sakumunaka bawu
na kupesaka bawu maza yina ke basikaka na yisi ya ntoto,
14 bambuma ya kulutila kitoko yina ntangu ke pesaka,
na bima ya kulutila kitoko yina ke yelaka konso ngonda,
15 na bambuma ya kulutila kitoko ya myongo ya ntangu ya ntama,
na makabu ya myongo ya ntangu ya ntama,
16 na makabu ya kulutila kitoko yina ntoto ke pesaka, mpe nyonso ya kulutila kitoko yina kele kuna.
Bika ti bumbote ya Nzambi yina ke vwandaka na divunda kuvwanda na zulu ya yintu ya Yosefi.
Yawu kuvwanda na zulu ya yintu ya yandi yina ba byekaka na kati ya bampangi ya yandi mutindu mu-nazile!
17 Yandi kele mwana ya ntete ya mbakala ya ngombe ya yandi.
Buzitu kuvwanda ya yandi!
Mampoka ya yandi kele mampoka ya mpakasa.
Yandi ke sadila yawu na kununga makanda ya bantu,
na balweka nyonso ya ntoto.
Ni mutindu yina kele makumi ya mafunda ya Efalayime.
Ni mutindu yina kele mafunda ya Manase.»
18 Na yina me tadila Zabulone, Moyize tubaka mutindu yayi:
«Nge Zabulone, yangalala ntangu nge ke kwendaka na mumbungu!
Nge Isakale, yangalala samu na kizunu na bayinzo ya nge!
19 Bawu ke bokila bantu na mongo.
Ba ke pesa kuna minkayulu ya ludedomo.
Samu ti bawu ke yukuta kimvwama ya mubu,
mpe bima ya ntalu ya kubumbama na munyenge.»
20 Na yina me tadila Ngade, Moyize tubaka mutindu yayi:
«Nkembo na Yave, yina me pesa kizunga ya nene na Ngade!
Ngade ke lalaka mutindu nkosi ya nkento.
Yandi ke pasulaka maboko mpe yintu.
21 Ngade me soola kikunku ya ntete ya yinsi.
Samu ti kuna kele ya kubumbama kikunku ya mfumu.
Yandi me luta na mantwala ya bantu.
Yandi me sadila mutindu kele ludedomo ya Yave.
Yandi me sadila mutindu kele luve ya Yave samu na Isayeli.»
22 Na yina me tadila Dane, Moyize tubaka mutindu yayi:
«Dane kele nkosi ya ntwenya.
Yandi ke dumukaka katuka kuna na Basane.»
23 Na yina me tadila Nafetali, Moyize tubaka mutindu yayi:
«Nafetali ke ya kufuluka na bumbote ya Yave.
Yandi ke ya kufuluka na lusakumunu ya Yave.
Bika ti yandi kubaka wesete na sude mutindu mvwilu ya yandi!»
24 Na yina me tadila Asele, Moyize tubaka mutindu yayi:
«Bika ti Asele kuvwanda ya kusakumunwa na kati ya bana ya Yakobi!
Bika ti yandi kuzwa bumbote ya bampangi ya yandi!
Bika ti makulu ya yandi kudyama na kati ya mafuta!
25 Bika ti bikangulu ya myelo ya nge kuvwanda ya bisengo mpe ya bisengo ya mbwaki.
Bika ti ntomosono ya nge kuzingila mutindu ke zingila luzingu ya nge!»
26 Moyize tubaka dyaka mutindu yayi:
«YesuluneYesulune Mus 32.15, ya kele ve na nzambi ya nkaka yina kele mutindu Nzambi ya nge!
Yandi ke sabuka mazulu na zulu ya mpunda samu na kwiza sadisa nge.
Yandi ke sabuka matuti na zulu ya mpunda na bunene ya yandi nyonso.
27 Nzambi ya bantangu nyonso kele kiswamunu.
Kubanda seko, yandi kele Muvuukisi awa na ntoto.
Na mantwala ya nge, yandi me bingisa bambeni.
Yandi tubaka: “Manisa na kufwa bawu!”»
28 «Isayeli ke na kuzinga na kati ya lukengolo.
Yinto ya Yakobi kele na lweka,
na kati ya yinsi ya bambuma ya faline mpe vinu ya malu-malu.
Dizulu ya yawu ke basisaka kinoko.»
29 «Kyese na nge, Isayeli! Nani kele mutindu nge?
Nge kele dikanda yina Yave me vuukisa.
Yave kele kinwanunu yina ke kebaka ntulu ya nge,
yawu ke sadisaka nge.
Yandi kele mbele ya nge ya mvita yina ke nungisaka nge.
Bambeni ya nge ke kwiza leba nge.
Kasi nge, nge ke dyata bisika ya bawu ya lusambulu yina kele na zulu ya myongo.»