yandi nyonso yina kele na yandi.

Na bunene ya nge, nani kele mutindu nge?

3 Yinsi ya Asili vwandaka mutindu yinti ya sedele ya Libane,

yawu kele na bintala ya mbote, yawu kele na mpewo ya mbote, yawu kele yinti ya yinda,

nsongi ya yawu me kuma tii na matuti.

4 Maza salaka ti yawu kuma nene,

miila yina kele na yinsi ya ntoto,

yawu me sala ti yawu kukula.

Maza fulukaka na myanzi ya yinti yina,

maza yango vwandaka kulumuka na bayinti nyonso ya mfinda.

5 Ni yawu yina yinti yina vwandaka yinda mingi,

kulutila bayinti ya mfinda,

bintala ya yawu vwandaka mingi mpe yinda,

samu na maza ya mingi yina yawu vwandaka kuzwa.

6 Bandeke nyonso ya mazulu,

yawu vwandaka zinga na yinti yina,

bibulu nyonso ya mfinda,

yawu vwandaka buta na yisi ya yinti yina,

bantu ya makanda nyonso vwandaka kwiza pema na mpewo ya yawu.

7 Yinti yango vwandaka kitoko samu na bunene ya yawu,

mpe samu na bintala ya yawu ya mingi,

myanzi ya yawu vwanda kota na kati-kati ya ntoto,

yina kele na maza mingi.

8 Na kati ya bilanga ya Nzambi,

ata yinti mosi ve ya sedele me fwanana na yawu,

ata yinti mosi ve ya sipelese ke na bintala ya kitoko,

ata yinti mosi ve ke pesaka mpewo ya mingi,

ata yinti mosi ve me lutila yawu na kitoko,

na kati ya bilanga ya Nzambi.

9 Mu salaka ti yawu vwanda na bintala ya mbote,

bayinti nyonso ya Edeni,

bilanga ya Nzambi,

bayinti vwandaka sadila yawu kimbanda.

10 Ni yawu yina, munu Yave, Mfumu, ke na kutuba: Samu ti nge me kula, mpe samu ti nsongi ya nge me kwenda tii na zulu yawu me sala ti ntima yandi kuma na lunangu samu na mutela ya yandi. 11 Ni yawu yina mu me yekula yandi na maboko ya muntu yina me lutila lulendo na bayinsi nyonso. Samu ti ba pesa yandi musendo mutindu kele mavanga ya yandi ya yimbi, mu me bingisa yandi. 12 Bantu ya nzenza, bayina ke salaka yimbi ya kulutila, me zenga yandi mpe me bika yandi kuna. Bintala ya yandi ke kubwa na myongo mpe na midimba nyonso. Bintala ya yandi zenganaka na mizumba nyonso ya yinsi. Bantu ya makanda nyonso ya ntoto katuka na yisi ya mpewo ya yandi, bawu bikaka yandi. 13 Bandeke nyonso ya mazulu ke kwiza zinga na yinti yina ba me zenga,

bibulu nyonso ya mfinda ke kwiza zinga na kati-kati ya bintala ya yawu.

14 Na yina, ata yinti na kati ya bayinti nyonso yina kele pene-pene ya maza ke vwanda na lunangu samu na yinda ya yandi mpe ata yinti ke vwanda na nsongi yina ke kwenda tii na matuti. Bawu nyonso ke kufwa mutindu bantu. Bawu nyonso ke kwenda na kati-kati ya yisi ya ntoto, kintwadi na bayina kulumukaka na ndyamu. 15 Yave, Mfumu ke na kutuba: Kilumbu yina sedele kulumukaka na yinsi ya bantu ya kufwa, mu salaka matanga, mu kangaka maza yina kele na yisi ya ntoto samu na yandi. Mu salaka ti maza ya miila kulumuka dyaka ve, samu na yandi, mu salaka ti mpimpa vwanda na zulu ya myongo ya Libane. Mpe bayinti nyonso ya mfinda ke yuma samu na yandi. 16 Na ntangu mu bwisaka yinti yina, bantu ya bayinsi ya nkaka tekitaka na makelele ya yawu. Ntangu mu kulumunaka yandi na yinsi ya bafwa, kintwadi na bantu yina ke kulumukaka na ndyamu, na kati-kati ya yisi ya ntoto, bayinti nyonso ya bilanga ya Edeni, bayinti nyonso ya mbote, ya kitoko ya Libane yina vwandaka kuzwa maza, yawu kuzwaka mbombolo. 17 Bawu mpe kulumukaka na yandi na yinsi ya bantu ya kufwa, kisika yina kele bantu yina kufwaka na mbele ya mvita. Bawu vwandaka sadisa yandi, bawu vwandaka zinga na mpewo ya lulendo ya yandi na kati-kati ya makanda ya bantu. 18 Nani me fwanana na nge na bunene mpe na nkembo na bayinti nyonso na kati ya bilanga ya Edeni? Ba ke kulumuna nge na kati-kati ya yisi ya ntoto, kintwadi na bayinti ya bilanga ya Edeni. Ba ke kunda nge kintwadi na bantu yina ba me zengisa ve bubakala mpe na bantu yina kufwaka na mbele ya mvita. Yayi ni musendo yina mu ke pesa na Falawo na bantu ya yandi, Ni Yave me tuba yawu.