Nge vwandaka mutindu mwana ya nkosi na kati-kati ya bantu ya makanda,

nge vwandaka mutindu kibulu ya nsisi yina kele na kati ya mubu,

nge vwandaka basika na kati ya maza mpe nge vwandaka ningisa miila,

nge vwandaka ningisa maza na makulu ya nge,

nge vwandaka bebisa miila nyonso.

3 Yave, Mfumu ke na kutuba:

Ntangu bantu mingi ke vukana,

mu ke kanga nge na mutambu ya bambisi,

mu ke benda nge na kati ya mpwasa.

4 Mu ke losa nge na ntoto,

mu ke losa nge na kati ya mfinda,

mu ke sala ti bandeke nyonso ya mazulu kwiza zinga na zulu ya nge,

mu ke pesa nge na bibulu nyonso ya mfinda, nge ke kuma madya ya bawu.

5 Mu ke tula nzutu ya nge na zulu ya myongo,

mu ke fulusa midimba na misuni ya nge.

6 Mu ke fulusa yinsi na menga ya nge,

yawu ke kuma tii na myongo,

menga ke fuluka tii na midimba.

7 Ntangu nge ke kufwa, mu ke kanga mazulu,

mu ke sala ti bambwetete kulezima dyaka ve,

mu ke kanga ntangu na dituti,

ngonda ke pesa dyaka ve nsemo.

8 Samu na nge, mu ke sala ti ngonda, ntangu na bambwetete,

kulezima dyaka ve,

mu ke sala ti kitombe fuluka na yinsi ya nge,

ni Yave, Mfumu me tuba yawu.

9 Mu ke sala ti bantu mingi kuvwanda na kyadi, ntangu mu ke samuna kumwangana ya nge na bantu ya makanda, bantu yina nge vwandaka zaba ve. 10 Mu ke mwangisa bantu ya makanda mingi samu na nge, bantinu ya bawu ke tekita na boma samu na nge, mu ke basisa mbele ya munu ya mvita na ntwala ya bawu. Kilumbu yina nge ke kubwa, bawu ke lemba ve na kutekita, mosi na mosi, ke tala boma ntangu nyonso samu na luzingu ya yandi. 11 Yave, Mfumu ke na kutuba: Mbele ya mvita ya ntinu ya Babilone ke bwidila nge. 12 Mu ke sala ti ba kufwa na mbele ya mvita bantu ya nge nyonso ya mingi-mingi,

na binwani ya makanda ya bantu yina ke sakanaka ve,

bawu ke sukisa lunangu ya bantu ya Ngipiti,

bantu nyonso ya bawu ke zimbana.

13 Mu ke kufwa bibulu ya nge nyonso,

yina kele pene-pene ya miila ya nzadi Nile,

makulu ya bantu na ya bibulu ke ningisa dyaka ve maza.

14 Mu ke dingimisa miila ya bawu,

mu ke sala ti miila ya bawu tanga mutindu mafuta,

ni Yave, Mfumu me tuba yawu.

15 Ntangu mu ke mwangisa yinsi ya Ngipiti, yawu ke kuma mutindu yinsi ya kuyuma,

mu ke zimbisa bima nyonso yina kele kuna,

mu ke manisa na kufwa bantu nyonso yina ke zingaka kuna,

na yina, bawu ke zaba ti mu kele Yave.

16 Yayi ni mukunga ya kyadi yina bantu ke yimbila, ya kele ni bandumba ya makanda ya bantu ke yimbila yawu. Bawu ke yimbila yawu samu na Ngipiti. Bawu ke yimbila yawu samu na bantu nyonso yina ke zingaka kuna. Ni Yave, Mfumu me tuba yawu.

na kati-kati ya yisi ya ntoto,

kintwadi na bantu yina kulumukaka na ndyamu.

19 Nani nge me lutila na kitoko?

Kulumuka, ba ke kunda nge na bantu yina ba me zengisa ve bubakala.

20 Bawu ke kufwa na kati ya bantu yina ke kufwa na mbele ya mvita,

mbele ya mvita me kuma,

beno nata Ngipiti na bantu ya yandi ya mingi-mingi!

21 Binwani ya kibakala,

bayina kele na yinsi ya bantu ya kufwa,

na bayina vwandaka sadisa bawu,

bawu ke tuba:

Bawu me kulumuka, mpe me kwiza lala ata na kati-kati ya beto,

bawu bantu yina ba me zengisa ve bubakala,

bawu me kufwa na mbele ya mvita.

22 Yayi ni Asili, yandi na bantu ya yandi nyonso,

bawu me kufwa,

bandyamu ya bawu me zunga bawu,

bawu nyonso me kufwa na mbele ya mvita.

23 Ba tulaka bandyamu ya bawu,

na kati ya dibulu ya yinda,

bantu mingi ya yandi me zunga ndyamu ya yandi,

bawu nyonso me kufwa,

bawu me kufwa na mbele ya mvita,

ni bawu vwandaka talisa bantu boma na ntoto.

24 Beno tala ntinu ya Elame na binwani ya yandi,

bandyamu ya binwani ya yandi me zunga yandi,

bawu nyonso me kufwa,

bawu me kufwa na mbele ya mvita,

bantu yina ba me zengisa ve bubakala,

bayina vwandaka talisa bantu boma awa na ntoto ya bantu ya moyo,

bawu me kulumuka na kati-kati ya yisi ya ntoto,

ntangu yayi, bawu me fuluka na nsoni,

kintwadi na bayina kulumukaka na ndyamu.

25 Ba me lalisa nzutu ya ntinu ya Elame,

na kati-kati ya binwani ya yandi nyonso yina kufwaka na mbele ya mvita,

bandyamu ya binwani ya yandi me zunga yandi,

bantu nyonso yina ba me zengisa ve bubakala me kufwa na mbele ya mvita,

bawu yina vwandaka talisa bantu mpasi, kati na nsoni,

bawu kele kintwadi na bayina kulumukaka na yinsi ya bantu ya kufwa,

ba tulaka bawu na kati-kati ya bayina kufwa na mbele ya mvita.

26 Ntinu ya Meseke na ya Tubale, me kufwa na binwani ya bawu nyonso,

bandyamu ya binwani ya bawu me zunga bawu,

bantu yina ba me zengisa ve bubakala me kufwa na mbele ya mvita,

bayina vwandaka talisa bantu boma awa na ntoto ya bantu ya moyo,

27 Ba kundaka ve bawu kisika mosi na binwani ya kibakala,

bawu kufwaka kintwadi na bantu yina ba me zengisa ve bubakala,

bawu kulumukaka na yinsi ya bantu ya kufwa,

na bambele ya bawu ya mvita na yisi ya bayintu ya bawu,

na binwanunu ya bawu,

kasi yimbi ya bawu kele na zulu ya mikwa ya bawu,

samu ti binwani yina ya kibakala vwandaka talisa bantu boma,

awa na ntoto ya bantu ya moyo.

28 Samu na nge Falawo, nge me kufwa,

ba me kunda nge kisika mosi na bantu yina ba me zengisa ve bubakala,

ba tulaka nge kintwadi na bayina kufwaka na mbele ya mvita.

29 Beno tala Edome, bantinu ya yandi, na bamfumu ya yandi, ba kundaka bawu na bantu yina kufwaka na mbele ya mvita ata ti bawu vwandaka na kibakala. Ba kundaka bawu kintwadi na bantu yina ba me zengisa ve bubakala, bayina kulumukaka na ndyamu. 30 Bamfumu nyonso ya node, na bantu nyonso ya Sidone, bayina kufwaka na bawu na mbele ya mvita, ata ti bawu vwandaka talisa bantu boma samu na kibakala ya bawu, kasi bawu kele ya kufuluka na nsoni, bawu kufwaka na nsoni mpe ba kundaka bawu kintwadi na bantu yina ba me zengisa ve bubakala, bayina kulumukaka na ndyamu. 31 Falawo ke tala bawu, mpe yandi ke kuzwa mbombolo samu na mambu yina me kumina binwani ya yandi. Falawo, na binwani ya yandi, bawu ke kufwa na mbele ya mvita. Ni Yave Mfumu me tuba yawu. 32 Mu ke mwangisa nkele ya munu awa na ntoto ya bantu ya moyo, ntangu yayi, Falawo, na binwani ya yandi nyonso me kufwa mpe ba ke kunda bawu, kintwadi na bantu yina ba me zengisa ve bubakala, bayina kufwaka na mbele ya mvita. Ni Yave Mfumu me tuba yawu.