Dibuku ya
ABAKUKE
NKOTOLO
Dibuku yayi ya Abakuke ke na kulakisa kizizi ya mumbikudi na kati ya bantangu ya mpasi ya kulutila. Yandi vwandaka tala mpasi mingi samu na bampangi mpe vwandaka zabisa na bantu ti ba bika kusala mambu ya yimbi. Yandi vwandaka lomba na bantu na kwiza na sika ya Nzambi mpe yandi vwandaka yangalala ntangu Nzambi vwandaka pesa yandi bamvutu.
Dibuku yayi, ba sonikaka yawu keba ve na kati-kati ya bamvula 699 mpe 587 ntete mbutukulu ya Yesu-Klisto, na ntangu yina bantu ya yinsi ya Babilone vwandaka yala bayinsi ya esete.
Na kati ya dibuku yayi, Nzambi ke na kupesa mvutu na mumbikudi ya yandi na nzila ya nsangu yina me tadila bantu ya ntangu ya Abakuke mpe bantu ya bantangu nyonso. Nsangu yango ni yayi: Muntu yina ke na mabanza ya yimbi ke kufwa, kasi muntu ya kudedama ke zinga samu na kiminu ya yandi mpe kuvingila na kivuvu nyonso lusalusu ya Nzambi.
Na kati ya bantangu ya mpasi, ba ke vwandaka mingi na nsatu ya dibuku yayi ya Abakuke samu na kubambukaka moyo na dyambu ya lukwikulu.
Dibuku yayi kele ya kukabuka mutindu yayi:
- Abakuke lombaka na sika ya Nzambi mpe Nzambi pesaka yandi mvutu (Abk 1).
- Musendo ya bantu ya mambu ya mbote mpe musendo ya bantu ya mambu ya yimbi (Abk 2).
- Lusambulu ya Abakuke (Abk 3).
1
1 Yayi ni mambu yina mumbikudi Abakuke talaka na kati ya lumoni.
Mumbikudi ke na kubokila Nzambi
2 Aa, Yave! Tii wapi ntangu
mu ke lomba na nge na kusadisa munu
kasi nge ke na kuwa munu ve?
Mu ke na kuyawula na sika ya nge:
Tala bampasi,
kasi samu na yinki nge ke na kupesa mvutu ve?
3 Samu na yinki nge ke na
kulakisa munu mambu ya yimbi?
Mpe wapi mutindu nge ke na kundima na
kutala bantu na kati ya bankwamusu?
Na mantwala ya munu,
mu ke na kutala kaka mwangusulu
mpe bampasi.
Na bisika nyonso,
kufundasana mpe kuswana ke na kulutila.
4 Ni yawu yina, ba ke na kuzitisa dyaka ve Musiku
mpe lufundusu ke na kusalama dyaka ve na ludedomo.
Muntu ya yimbi ke na kununga na mantwala ya muntu ya mbote
samu ti, banzengolo ke na kusalama mbote ve.
Mvutu ya Yave
5 Beno tala mambu yina ke na kusalamaka na kati ya bayinsi ya nkaka,
beno pamuka mpe beno yituka
samu ti, na ntangu yina beno kele ntete moyo,
ya kele na dyambu ke salama.
Dyambu ya yango, beno ke kwikila na yawu ve,
kana ba zabisa beno yawu.
6 Mu ke sala ti ba-Kalede kwiza na sika ya beno,
bantu yayi ya nsisi mpe yina ke na kyadi ve.
Bawu ke tambulaka na bayinsi nyonso,
samu na kwendaka kubotola bantoto ya ngana.
7 Bawu ke na ngolo, bawu ke talisaka boma
mpe samu na lunangu ya bawu,
bawu ke salaka mutindu bantima ya bawu ke zolaka.
8 Bampunda ya bawu me lutila mbangu na bayingo
mpe bampunda yango me lutila dyaka mbangu na bayimbwa ya mfinda yina ke sosaka madya ya bawu na nkokila.
Bayina ke nataka bampunda ya bawu ke katukaka ntama
mpe bawu ke dumukaka mutindu ngo-nuni* ke bwilaka madya ya yandi.
9 Bawu ke kwizaka na ngolo nyonso
samu na kusala mvwanzi mpe bawu ke talaka ata fyoti na manima.
Bawu ke yonzikaka bankole mutindu munyenge.
10 Ni bawu ke sekaka bantinu,
mpe bamfumu kele mutindu kisakununu ya Bawu.
Bawu kele ve na boma ya bambanza yina kele ya kutungama na bibaka ya lukengolo
mpe samu na kubotola yawu,
bawu ke fulusaka ntoto na ngaanda ya kibaka,
kubanda na yisi tii na zulu.
11 Bawu ke lutaka mutindu mupepe ya ngolo,
bawu ke talaka ngolo ya bawu mutindu nzambi ya bawu.
Mumbikudi ke na kubokila dyaka Nzambi
12 Aa, Yave! Katuka ntama,
nge kele ve Nzambi ya munu ya longo?
Beto ke kufwa ve!
Yave, nge soolaka ba-Kalede samu na fundisa beto.
Ditadi ya munu,
nge bokilaka bawu samu na kupesa beto kitumbu!
13 Meso ya nge me lutila kuvwanda ya kuvedila,
yawu lenda tala mambu ya yimbi ve
mpe nge lenda kundima ve na kutala bantu ya nge na kati ya bampasi.
Samu na yinki nge ke na kubika ti bantu ya bantima ya yimbi kunyokola bantu?
Samu na yinki nge me vwanda swii
na ntangu bantu ya bantima ya yimbi ke na kufwa bayina me lutila bawu na ludedomo?
14 Samu na yinki nge ke na kutala bantu
mutindu bambisi ya maza
to bibulu ya fyoti-fyoti yina kele ve na ntwadisi?
15 Ba ke bwilaka bantu
na ndoba mutindu mbisi.
Bawu ke bendaka bantu na bampwasa.
Ba ke yonzikaka yawu na mutete
mpe bawu ke kumaka na kilengi ya kulutila.
16 Ni yawu yina, bawu ke pesaka bampwasa ya bawu
minkayulu mpe ke yokaka mananasi samu na yawu.
Ni na bampwasa yango,
bawu ke kuzwaka misunya yina ke na mafuta mpe madya ya kitoko.
17 Na yina, bawu ke basisaka bambisi na bampwasa ya bawu
samu na kufwa dyaka bantu ya bayinsi, ata kutala bawu kyadi?