2
1 Mu ke bika ve kisika ya munu ya kukengaka. Mu ke vwanda kaka ya kutelama na zulu ya bibaka mutindu nkebi
samu na kusosa kuzaba yinki Nzambi ke zabisa munu
mpe wapi mutindu yandi ke pesa munu mvutu samu na kuyawula ya munu.
Mvutu ya Yave
2 Yave me pesa munu mvutu yayi:
Sonika lumoni yayi,
sonika yawu na zulu ya matadi,
samu ti yawu zingila mpe ti ba tanga yawu mbote.
3 Ntangu me lunga ntete ve,
samu ti lumoni yayi kusalama,
ya ke dyaka ntama ve na kusalama.
Yawu ke salama, yawu ke vuna ve.
Kana yawu salama ve na mbangu,
vingila kaka, yawu ke salama.
4 Tala: «Muntu yina ke na mabanza ya yimbi ke kufwa,
kasi muntu ya kudedama ke zinga samu na kukwikama ya yandi.
5 Ya tsyelika, malafu ke vunaka.
Muntu ya lunangu ke pemaka ve,
yandi ke yukutaka ve mutindu yinsi ya bantu ya kufwa
mpe mutindu lufwa. Yandi ke botolaka yinsi mosi na mosi,
samu na kukutika mpe kuyala bantu ya bayinsi yina.
6 Kasi na manima, bantu ya bayinsi yango nyonso ke banda
na kwendaka sala masolo samu na kufinga mpe kuseka yandi.»
Bampasi
Bawu ke tuba mutindu yayi:
«Kyadi na nge yina ke bakaka bimvwama ya ngana.
Mambu yayi ke tatamana tii wapi ntangu?
Nge ke na kufuluka kaka na bamfuka.
7 Bayina nge ke na kudefa, ba lenda basikila nge na mpamukunu ve?
Bawu ke sala nge ve mutindu nge ke salaka bawu?
Nge ke kuma kisakununu ya bawu.
8 Mutindu nge botolaka bima ya bantu ya bayinsi mingi,
bawu mpe, ke botola bima ya nge
samu na menga ya bantu yina nge mwangisaka,
mpe samu na bampasi yina nge vwandaka talisa bayinsi,
bambanza mpe bantu yina ke zingaka kuna.»
9 «Kyadi na nge!
Yinzo ya nge me fuluka na bimvwama ya kulaba
mpe nge ke talaka ti mutindu nge kele mvwama,
ata mpasi lenda kukumina nge.
10 Mambu yina nge ke na kusala, ke talisa dikanda ya nge nsoni.
Mutindu nge ke na kubebisa bayinsi mingi,
nge ke na kubebisa luzingu ya nge.
11 Matadi ya bibaka ke looka,
mpe makunzi ya muludi ke pesa yawu mvutu.»
12 «Kyadi! Na muntu yina,
ke tungaka mbanza ya yandi na zulu ya menga,
mpe ke tungaka bwala na mavanga ya yimbi.
13 Mambu nyonso yayi kele ve kisalu ya Yave, Nzambi ya lulendo?
Bisalu nyonso yina bantu ke salaka ke vwandaka na ndandu ve.
Bantu ya bayinsi ke na kutala kaka mpasi ya mpamba.
14 Na yina, yinza nyonso ke fuluka
na luzabu ya nkembo ya Yave
mutindu maza ke fulusaka mubu.»
15 «Kyadi na nge!
Nge yina ke pesaka mpangi ya nge malafu ya kulutila ngolo
samu ti yandi kola
mpe nge tala kipene ya yandi.
16 Nge ke na kufulukaka na nsoni kasi na nkembo ve.
Nge mpe kunwa mpe katula bilele ya nge na mantwala ya bantu!
Yave ke manisa nkele ya yandi nyonso na sika ya nge
mpe nkembo ya nge ke kituka nsoni.
17 Kunyokola yina nge vwandaka nyokola bantu ya Libane,
ke vutukila nge.
Nge kufwaka bibulu ya bawu,
bibulu ya bawu mpe ke nwanisa nge
samu na menga ya bantu yina nge mwangisaka
mpe samu na kukwamisa yina nge vwandaka kwamisa bayinsi,
bambanza mpe bantu yina ke zingaka kuna.
18 Wapi ndandu kele na kiteki?
Ya ke kaka kima ba me yidikila na kisengo
yina ke na kulakisa bantu luvunu.
Muntu yina ke yidikaka biteki
ke tulaka kivuvu ya yandi na bima yina ke zonzaka ve?»
19 «Kyadi na nge!
Nge ke na kuzabisa na mwa kitini ya yinti:
“Vumbuka” to na ditadi yina ke zonzaka ve:
“telama” ata ti yawu lenda kuzabisa nge ata dyambu ve!
Ata ti ba fuka yawu na wolo mpe palata,
yawu ke na luzingu ve.
20 Kasi, Yave kele na kati ya Yinzo ya yandi ya longo.
Konso muntu na zulu ya ntoto
kudingama na mantwala ya yandi!»