mutindu nzimbu ya kyadi.

2 Yave, mu me kuwa mambu yina nge me tuba,

mpe mu me kuma na boma.

Yave, sala mambu yango na ntangu ya beto.

Lakisa yawu na bantu ya ntangu ya beto

mpe ata ti nge ke ya kudasuka, fwila beto kyadi.

3 Nzambi me katuka na kizunga ya Temane,

Nzambi ya longo me katuka na mongo ya Palane.

Bunene ya yandi ke na kufulusa zulu,

mpe nkembo ya yandi me fulusa ntoto nyonso.

4 Nsemo ke banda na kulezima.

Balusyemo yina ke basikaka na kati ya diboko ya yandi,

kele mansweki ya ngolo ya yandi.

5 Kiyoolo ke na mantwala ya yandi,

mpe na ntangu yandi ke tambulaka,

dibawu ke basikaka na makulu ya yandi.

6 Ntangu yandi ke telamaka, ntoto ke ninganaka.

Ntangu yandi ke talaka bayinsi, yawu ke tekitaka na boma.

Myongo ya bantangu nyonso ke mwanganaka,

myongo ya fyoti ya ntama ke kubwaka.

Katuka ntama, kaka ni mutindu yayi yandi ke tambulaka.

7 Mu ke na kutala mutindu bayinzo ya lele ya bantu ya Kusane me kumwangana

mpe bantu ya Midyane ke na kuningana samu na bankwamusu.

8 Yave, nge ke dasukilaka banzadi?

Nkele ya nge kele samu na banzadi?

Nge ke dasukilaka mubu,

ntangu nge ke yulukaka na zulu ya bampunda

to na zulu ya bapusu-pusu ya mvita?

9 Nge me kubika munani ya nge.

Bandefi ya nge kele mutindu makonga.

Nge ke pasulaka ntoto na maza.

10 Ntangu myongo ke talaka nge, yawu ke tekitaka.

Ntangu bamvula ya ngolo ke nokaka,

yawu ke dyamisaka ntoto,

ntangu mubu ke dasukaka,

bimpo ya yandi ke kumaka tii na zulu.

11 Ntangu dyonga ya nge ke basisaka nsemo,

mpe na ntangu nsemo ya dyonga ya nge ke lezimaka,

Ntangu na ngonda ke ninganaka ata fyoti ve.

12 Nge ke tambulaka na ntoto na kudasuka nyonso,

nge ke dyataka bayinsi na nkele nyonso.

13 Nge kwizaka samu na kukuula bantu ya nge

mpe samu na mpulusu ya Masiya ya nge.

Nge me bwisa mfumu ya dikanda ya bantu ya yimbi.

Nge me manisa na kufwa bawu mpe bampangi ya bawu.

14 Nge me tobola bayintu ya bamfumu ya bambeni

na makonga ya bawu mosi.

Bambeni ke na kukwiza mutindu mupepe ya ngolo.

Bawu ke na kusala milolo ya nsayi samu na kumwangisa beto,

mpe samu na kufwa mputu yina vwandaka me bumbama.

15 Nge me tambula na zulu ya mubu

na bampunda ya nge, na zulu ya bimpo ya ngolo.

16 Ntangu mu kuwaka mambu yayi, mu yitukaka.

Ntangu mu kuwaka ndinga yina,

bikoba ya munu vwandaka tekita na boma

mpe nzutu ya munu nyonso lembaka.

Mu vwandaka vingila kilumbu ya kyadi ata kuningana,

samu na kwenda kunwanisa bantu yina ke na kukwamisaka beto.

17 Na yina, yinti ya fike ke buta dyaka ve.

Bayinti ya vinu ke pesa ve bambuma.

Bayinti ya olive ke buta ve.

Bilanga ke pesa ve madya.

Mameme ke vwanda dyaka ve na kati ya balupangu.

Bampaka ya bangombe ke vwanda dyaka ata na ngombe mosi ve.

18 Mu ke vwanda na kilengi samu na Yave,

mu ke yangalala samu na Nzambi, Muvuukisi ya munu.

19 Yave kele Mfumu ya munu, yandi kele mpe Ngolo ya munu,

yandi ke pesaka makulu ya munu ngolo mutindu makulu ya bankabi.

Ni yandi ke salaka ti mu tambula na zulu ya myongo.