Dibuku ya
OSEYA
NKOTOLO
Na manima ya mumbikudi Amose, Oseya kumaka mumbikudi ya Yave na yinsi ya kintinu ya Isayeli na kimfumu ya londe, pene-pene ya mvula 750 tekila mbutukulu ya Yesu. Yandi salaka bamvula makumi zole na tanu. Na ntangu yina, mbanza ya kintinu ya Samaliya vwandaka me mwangana ntete ve. Bantu vwandaka sambila biteki mpe bawu vwandaka tumama ve na Nzambi. Na kulakisa kwondwa kukwikama ya Isayeli na Nzambi, Nzambi lombaka na Oseya na kukwela kento ya kindumba. Nzambi zabisaka na Oseya na kuzola kento yango ya kindumba samu na kulakisa ti Nzambi mpe ke zolaka bantu ya yandi ata ti bawu ke tumamaka ve na yandi.
Na manima ya kintinu ya Yelobowame 2, yinsi kumaka tengu-tengu. Na Samaliya, ba vwandaka baka kintinu na ngolo. Mpe yawu vwandaka sala ti, konso ntinu kunata bansalulu ya yandi na yinsi. Mpe dyaka, kimfumu ya yinsi ya Asili vwandaka sosa na kubaka yinsi ya Isayeli ya node. Mambu ya kukondwa ludedomo yina mumbikudi Amose zonzilaka vwandaka lutila. Nzambi ya ba-Kaanani vwandaka benda bantu mingi ya Isayeli. Ni yawu yina kiminu ya bantu mingi ya Nzambi kubwaka. Kasi, mutindu bakala ke lemvokilaka kento ya yandi, Nzambi mpe salaka nsilulu ya kulemvokila bantu ya yandi ntangu yandi tubaka: Mu ke belusa Isayeli na kimbevo ya yandi ya kondwa kiminu na munu. Mu ke zola yandi na ntima mosi samu ti, mu ke dyaka ve na nkele na yandi.
Dibuku yayi kele ya kukabuka mutindu yayi:
- Luzingu ya makwela ya Oseya na ndongosolo ya yawu (Ose 1.1–3.5).
- Mambu yina Isayeli bwabanaka mpe mbangululu ya yawu (Ose 4.1–9.9).
- Mambu yina salaka ti bantu ya Isayeli kuvwanda ve ya kukwikama na Nzambi (Ose 9.10–14.1).
- Luzolo ya Nzambi ke lutila kaka (Ose 14.2-10).
1
1 Yayi ni mambu ya Yave yina yandi tubaka na Oseya, mwana ya Beeli. Ya vwandaka na ntangu ya bantinu Uzya, Yotame, Akaze, Yezekya1Bt 12.16-20; 2Bt 14.23-29 bantinu ya Yuda, mpe na ntangu ya ntinu Yelobowame, mwana ya Yowase, ntinu ya Isayeli.
Makwela ya Oseya mpe mbutukulu ya bana ya yandi
2 Yayi ni mbandukulu ya mambu yina Yave tubaka na bantu ya yandi na yinwa ya Oseya. Yave tubaka na Oseya:
«Kwenda baka kento yina ke salaka kindumba,
mpe bana yina yandi ke na kubutaka na kindumba,
samu ti, bantu ya yinsi me manga Yave.
Na mutindu yina, bawu ke na kusala kindumba.»
3 Na yina, Oseya kwendaka baka Ngomele, mwana ya Divelayime. Kento yango kuzwaka kivumu mpe yandi butilaka yandi mwana ya bakala. 4 Yave tubaka na Oseya:
«Pesa yandi nkumbu Izelele,
samu ti na mwa ntangu fyoti,
mu ke sukisa kintinu ya dikanda ya Isayeli
na kufutisa dikanda ya Yewu
menga yina yandi tangisaka kuna na Izeleele2Bt 9–10.
5 Na kilumbu yina,
mu ke manisa ngolo
ya binwani ya Isayeli
kuna na mudimba ya Izeleele.»
6 Ngomele kuzwaka dyaka kivumu. Yandi butaka mwana ya kento. Yave tubaka na Oseya:
«Pesa yandi nkumbu Lo-Luwama (yina zola kutuba, yina ba ke fwilaka ve kyadi),
samu ti, mu ke tatamana dyaka ve
na kufwila dikanda ya Isayeli kyadi.
Mu ke lemvokila dyaka ve bawu.»
7 «Kasi na yina me tadila dikanda ya Yuda, mu ke fwila bawu kyadi, mpe mu ke vuukisa bawu, munu Yave, Nzambi ya bawu. Mu ke vuukisa bawu. Kasi ya ke vwanda ve na munani, na mbele ya mvita, na mvita, na bampunda, to na bapusu-pusu ya mvita.»
8 Ngomele zengaka Lo-Luwama mabene. Na manima yandi kuzwaka dyaka kivumu, mpe yandi butaka mwana ya bakala, 9 mpe Yave tubaka na Oseya:
«Pesa yandi nkumbu Lo-Ami (yina zola kutuba bawu kele ve bantu ya munu),
samu ti beno kele ve bantu ya munu,
mpe munu, mu ke vwanda ata kima samu na beno.»