2
Nzambi ke ndima dyaka bantu ya yandi
1 Kasi kilumbu kele,
yina lutangu ya bantu ya Isayeli
ke kuma mutindu munyenge ya mubu.
Ba ke fwanikisa yawu ve,
mpe ba ke lenda ve na kutanga
lutangu ya yawu.
Kisika yina ba vwandaka tuba na bawu:
«Beno kele ve bantu ya munu»,
ba ke tuba na bawu:
«Beno kele bana ya Nzambi ya moyo»*Na kati ya babibila ya nkaka, 2.1 mpe 2.2 kele ni 1.10 mpe 1.11, mutindu mosi mpe na yina me tadila 2.3-25 kele ni 2.1-23. Nsukunu ya yawu, kele mpe na Lom 9.26..
2 Na yina, bana ya Yuda
mpe bana ya Isayeli,
ke vukana, mpe bawu ke vwanda kisika mosi.
Bawu ke soola mfumu mosi
mpe bawu ke yala yinsi.
Yawu ke vwanda kilumbu ya nene ya IzeleeleOse 1.4.
3 Beno tuba na bampangi ya beno:
«Ami» (yina zola kutuba bantu ya munu)
mpe na bibusi ya beno:
«Luwama» (yina zola kutuba yina ba ke fwilaka kyadi).
Isayeli, kento yina kele ve ya kukwikama
4 Beno funda mama ya beno.
Beno funda yandi,
samu ti, yandi kele ve kento ya munu,
mpe mu kele ve bakala ya yandi.
«Yandi katula na kizizi ya yandi bidimbu ya kindumba!
Mpe yandi katula bidimbu ya kinsuza na kati-kati ya mabene ya yandi.
5 Kana yandi sala yawu ve,
mu ke katula yandi binkuti nyonso.
Yandi ke vwanda,
mutindu kilumbu yina, ba butaka yandi.
Mu ke sala ti, yandi kukuma
mutindu yinsi ya kuyuma.
Mu ke sala ti yandi vwanda
mutindu ntoto ya kuyuma,
mpe mu ke kufwa yandi na nsatu ya maza.»
6 «Mu ke tala ve bana ya yandi kyadi,
samu ti, bawu kele bana yina,
ba kuzwaka na kindumbaOse 1.2.
7 Ee, mama ya bawu me sala kindumba,
mama yina nataka kivumu ya bawu,
me sala mambu ya nsoni.
Yandi vwandaka tuba:
Mu ke landa makangu ya munu
yina ke pesaka munu dimpa na maza,
lele ya mika ya mameme
mpe lele ya lino, mafuta mpe malafu.»
8 Ni yawu yina munu Yave,
mu ke kanga yandi nzila,
na bayinti ya bansende.
Mu ke zunga yawu na kibaka,
samu ti, yandi tala dyaka ve,
nzila ya yandi.
9 Yandi ke landa makangu ya yandi,
kasi yandi ke kuzwa ve bawu.
Yandi ke sosa bawu,
kasi yandi ke tala ve bawu.
Yandi ke tuba:
«Mu fwana kuvutuka na bakala ya munu ya ntete,
samu ti, luzingu ya munu
vwandaka ya kulutila mbote
na ya bubu yayi!»
10 «Yandi vwandaka bakula ve
ti ni munu vwandaka pesa
yandi bambuma ya faline, vinu ya malu-malu mpe mafuta ya malu-malu.
Ni munu vwandaka vwamisa yandi
na kupesaka yandi wolo na palata
yina yandi vwandaka sadila
samu na kusambilaka Baale.
11 Ni yawu yina,
mu ke kwiza botola yandi
bambuma ya munu ya faline
na ntangu yina, ba ke yonzikaka yawu mpe vinu ya munu ya malu-malu na ntangu ya yawu.
Mu ke botola yandi bilele ya munu ya mika ya mameme mpe bilele ya lino
yina yandi vwandaka vwata,
samu na kufuka kipene ya yandi.
12 Kasi na ntangu yayi,
mu ke katula yandi bilele,
samu na kufwisa yandi nsoni
na meso ya makangu ya yandi
mpe ata muntu ke kabikisa munu
na kusala yawu.
13 Mu ke sukisa kyese ya yandi,
mikembo ya yandi,
mikembo ya yandi yina yandi ke salaka
na bilumbu ya ntete ya bangonda.
Mu ke sukisa basaba ya yandi,
mpe mikembo ya yandi nyonso.
14 Mu ke mwangisa bilanga ya yandi
ya bayinti ya vinu mpe ya bafike»,
yina yandi vwandaka tuba:
«Yayi ni difuta yina makangu ya
munu pesaka munu.»
«Mu ke sala ti bilanga yango,
kukuma mfinda kisika bibulu ya mfinda
ke banda na kwizaka kudya.
15 Mu ke pesa yandi kitumbu,
samu na bilumbu yina,
yandi vwandaka sadila Baale,
ntangu yandi vwandaka yoka Maaka ya nsunga ya mbote,
yandi vwandaka vwata milunga ya misapi
mpe bampanga na laka,
yandi vwandaka landa makangu ya yandi
mpe vwandaka zimbana munu.
Ni Yave me tuba yawu.
16 Ni yawu yina,
mu ke leba yandi,
mu ke benda yandi na yinsi ya kuyuma
mpe mu ke zonza na ntima ya yandi,
17 mpe kuna, mu ke vutula yandi bilanga ya yandi ya bayinti ya vinu
mpe mu ke sala ti mudimba ya Akole†Akole zola kutuba: Kisika ya kyadi.,
kukuma mwelo yinaYwa 7.24,
ke pesa yandi kivuvu.
Yandi ke landa dyaka munu
mutindu yandi vwandaka sala yawu
ntangu yandi vwandaka ntwenya,
mpe mutindu ntangu yina yandi
basikaka na Ngipiti.»
Kilumbu ya kuvutula ngwisani
18 «Yave ke na kutuba, na kilumbu yina,
yandi ke bokila munu “Bakala ya munu”,
mpe yandi ke bokila dyaka munu ve,
“Baale ya munu”, (yina zola kutuba mfumu ya munu).
19 Mu ke sala ti yandi bika na
kutangunaka dyaka nkumbu ya Baale,
mpe bankumbu ya banzambi ya mutindu yina,
ba ke zonzila dyaka yawu ve.
20 Na kilumbu yina,
mu ke tula na bantu ya munu,
ngwisani na bibulu ya mfinda,
na bandeke ya mazulu,
na bibulu ya fyoti yina kele na ntoto.
Mu ke zenga minani ya mvita,
mpe bambele ya mvita.
Mu ke sukisa mvita,
nyonso yina ke zimbana
mpe mu ke sala ti,
bantu ya munu lala na kizunu.
21 Isayeli, nge ke vwanda
kento ya munu,
ya bamvula na bamvula.
Na kukwela nge,
mu ke futa ntalu yayi:
ludedomo, kusungama,
kukwikama mpe luzolo.
22 Mu ke kwela nge na kukwikama nyonso,
mpe nge ke zaba mbote Yave.
23 Yave ke na kutuba:
Na kilumbu yina,
mu ke pesa mvutu.
Mu ke pesa mvutu na mazulu
mpe mazulu ke pesa mvutu na ntoto.
24 Ntoto ke vutula mvutu na kupesa bambuma ya faline,
vinu ya malu-malu,
mpe mafuta ya malu-malu.
Mpe bima yayi ke pesa mvutu na Izeleele.
25 Mu ke sala ti,
yandi vwanda mutindu bambuma
ba me mwanga na yinsi nyonso samu na munu.
Mu ke fwila Lo-Luwama kyadi.
Mu ke tuba na Lo-Ami:
“Nge kele bantu ya munu”,
mpe yandi ke tuba:
“Nzambi ya munu.”»