1 na ntangu yina mu zola kunyakisa Isayeli,

yimbi ya Efalayime

na masumu ya Samaliya

me talana, samu ti,

bawu ke na kusadila luvunu.

Muyibi ke na kukota na yinzo,

nkonga ya binwani

me mwangana na ngaanda.

2 Na bantima ya bawu,

bawu ke na kuyindula ata fyoti ve ti,

mu me zimbana ve yimbi

yina bawu ke na kusala.

Na ntangu yayi, mavanga ya

bawu ke ya kukangama na bawu,

mpe mu ke na kutala yawu.

3 Na yimbi ya bawu,

bawu ke na kutalisa ntinu kilengi.

Na luvunu ya bawu,

bawu ke na kuyangidika bamfumu.

4 Bawu nyonso ke na kusala kinsuza.

Bawu kele mutindu bafuule yina

kisadi-mampa me tulaka tiya.

Yandi me bika na kubwela yawu tiya,

kubanda ntangu yina yandi yidikaka

kiputi ya faline,

tii na ntangu yina yawu ke funa.

5 Na kilumbu ya mukembo ya ntinu ya beto,

bamfumu ke belaka na manima

ya kunwa vinu ya mingi,

mpe ntinu ke salaka mutindu

bawu, na kusekaka bampangi.

6 Bayina ke kubikaka mambu ya yimbi,

bawu kele tiya mutindu bafuule.

Na mpimpa nyonso,

nkele ya bawu ke talanaka ve.

Kasi na suka,

nkele yango ke talanaka,

mpe yawu ke yokaka mutindu tiya ya nene.

7 Bawu nyonso kele tiya mutindu fuule.

Bawu me kufwa bazuzi ya bawu.

Bantinu ya bawu nyonso me kufwa,

mpe ata muntu na kati ya bawu me bokila munu.»

8 «Efalayime ke na kuvukana na bantu ya nkaka.

Efalayime kele mutindu

galete yina ba me balula ve

mpe me nyenga lweka mosi.

9 Banzenza ke na kumanisa yandi ngolo,

kasi yandi ke na kuzaba ve.

Yandi me kuma na

bansuki ya mpembe,

kasi yandi ke na kuzaba ve.

10 Lunangu ya bantu Isayeli

ke na kufunda bawu.

Kasi bawu ke na kuvutuka ve

na Yave, Nzambi ya bawu.

Na kati ya mambu nyonso yina,

bawu me sosa ve yandi.

11 Efalayime kele mutindu dibembe ya kizoba,

yina kele ve na mayela.

Bawu me bokila bantu ya Ngipiti,

bawu me kwenda tii na Asili.

12 Na ntangu yina bawu ke kwenda,

mu ke losila bawu mpwasa ya munu.

Mu ke bwisa bawu mutindu

bandeke ya mazulu.

Mu ke bwila bawu ntangu mu ke kuwa ti,

bawu me vukana.»

13 «Kyadi na bawu samu ti,

bawu me kima ntama na munu.

Yawu ke vwanda mwangusulu

mpe nyonso ke beba samu na bawu,

samu ti, bawu me manga

na kutumama na munu.

Munu, mu zolaka vuukisa bawu

kasi bawu ke na kuzonza mambu ya luvunu

samu na munu.

14 Bawu ke na kubokila munu

na ntima mosi ve.

Bawu ke na yawula na

zulu ya bamfulu ya bawu.

Bawu ke na kulwalisa banzutu

ya bawu samu na kuzwa

bambuma ya faline na

vinu ya malu-malu.

Na kusalaka mutindu yina,

bawu ke na kupesa munu manima.

15 Na kutala mbote,

ni munu longaka bawu.

Ni munu pesaka bawu ngolo,

kasi bawu me banzila munu mambu ya yimbi.

16 Kana bawu ke vutuka,

ni na sika ya munu ve bawu ke vutuka.

Bawu kele mutindu munani ya kutengama.

Bamfumu ya bawu ke kufwa na mvita,

samu ti, bawu ke na kuzonza

yimbi samu na munu,

mpe kuna na Ngipiti,

bantu ke seka bawu!»