1 Beno sika mpungi samu

na kulwengisa bantu.

Mpasi ke na kukwiza na Yinzo

ya Yave mutindu mbemba.

Yave me tuba: «Bantu me

zitisa ve ngwisani ya munu.

Bawu me tumama ve

na Musiku ya munu.

2 Bawu ke looka na munu:

“Nzambi ya beto,

beto bana ya Isayeli, beto me zaba nge.”

3 Bantu ya Isayeli me manga mambu ya mbote,

na yina, mutantu ke landa bawu.

4 Bawu me soola bantinu

ata kuyufula luzolo ya munu.

Bawu me soola bamfumu,

munu ata kuzaba.

Bawu me yidika banzambi ya biteki

na wolo mpe palata ya bawu.

Mpe yawu me zimbisa bawu.

5 Bantu ya Samaliya,

mu me nyafuna kiteki ya beno

ya mwana ya ngombe.

Mu me dasukila bawu.

Tii wapi ntangu bawu ke

lenda ve na kuvwanda ya kuvedila?

6 Kiteki yina ya mwana ya ngombe

me katuka na Isayeli.

Ni muntu yidikaka yawu,

yawu kele ve Nzambi.

Ee, mwana ya ngombe ya Samaliya

ke mwangana na bitini.

7 Bawu me kunda mupepe,

mpe bawu ke yonzika kitembo ya ngolo.

Bambuma ya faline ke mena ve.

Kana yawu mena, yawu lenda kubuta ve.

Kana yawu pesa bambuma ya faline,

ni banzenza ke kudya yawu.»

8 «Ba me mina bantu ya Isayeli.

Bawu me kuma mutindu

kima yina bantu nyonso

ke na kuyina.

9 Bawu me kwenda na Asili.

Mbuluku ya mfinda ke

kebaka kimpwanza ya yandi.

Kasi bantu ya Efalayime

me futa samu na kuzwa makangu!

10 Ata ti bawu me futa bamfumu ya bayinsi,

ntangu yayi mu ke yonzika bawu.

Na mwa ntangu fyoti,

bawu ke tala mpasi na maboko ya ntinu ya Asili.

11 Bantu ya Efalayime me yidika

biyokolo mingi ya minkayulu

samu na mulemvo ya masumu.

Kasi biyokolo yango, ni yawu ke

na kusala ti bawu kubwa na masumu.

12 Ata ti mu sonikina bawu

lutangu ni lutangu ya misiku ya munu,

bawu ke tala yawu mutindu

ti yawu kele dyambu ya nzenza.

13 Bawu ke pesaka munu minkayulu

ya bibulu mpe bawu ke kudyaka

mbisi ya yawu.

Kasi, munu Yave,

mu ke ndimaka yawu ve.

Na ntangu yayi,

yandi ke bambuka moyo

na yimbi ya bawu,

yandi ke futisa bawu masumu ya bawu,

mpe bawu ke vutuka na Ngipiti.»

14 «Isayeli me zimbana Nzambi yina yidikaka yandi.

Yandi me tunga bayinzo ya kitoko.

Na yina me tadila Yuda,

yandi me tunga bambanza mingi

yina kele na bibaka ya lukengolo.

Kasi mu ke fidisa tiya na

bambanza yina

mpe yawu ke yoka bayinzo ya bawu ya kitoko.»