7
Nsangu samu na ntinu Akaze
1 Ntangu ntinu Akaze mwana ya Yotame, mutekolo ya Ozyase vwandaka ntinu ya Yuda, Lesine ntinu ya Alame, mpe Peka mwana ya Lemalya ntinu ya Isayeli, bawu kwizaka nwanisa mbanza Yelusalemi. Kasi bawu lendaka ve na kunwanisa yawu. 2 Ba tubaka na bantu ya dikanda ya Davidi mutindu yayi: «Bantu ya yinsi ya Alame me kwiza takama na ntoto ya Efalayime. Na yina, ntima ya ntinu Akaze mpe ya bantu ya yinsi ninganaka mutindu mupepe ke ningisaka bayinti ya mfinda.»
3 Yave tubaka na mumbikudi Esaya mutindu yayi: «Ntangu yayi, nge na mwana ya nge Seyale-Yasube, beno basika samu na kwenda bwabana Akaze, kuna na nsuka ya kisika yina ke lutilaka maza ya kizinga, na nzila ya bilanga ya bantu yina ke salaka batinta2Bt 18.17. 4 Nge ke zabisa yandi mutindu yayi: “Dingama, kuvwanda na boma ve. Ntima ya nge kutekita ve na mantwala ya nkele ya Lesine ntinu ya Alame mpe mwana ya Lemalya! Bawu kele mutindu bakuni zole yina ke na kunyenga ve, kasi yawu ke na kubasisa kaka mulinga.” 5 Ya tsyelika, bantu ya Alame na Efalayime mpe mwana ya Lemalya, bawu me baka lukanu ya kutalisa nge mpasi. Bawu me tuba mutindu yayi: 6 “Beto kwendeno samu na kunwanisa yinsi ya Yuda, beto ke talisa bawu boma mpe beto ke kota na mbanza. Beto ke sala nyonso samu ti bawu kwiza vukana na beto mpe kuna, beto tula mwana ya Tabeele ntinu.”» 7 Na yina, Yave ke na kutuba:
«Yawu ke simba ve mpe yawu ke salama ve.
8 Ya tsyelika, Damase kele mbanza ya kintinu ya yinsi ya Alame,
mpe kimfumu ya Lesine kele kaka na Damase.
Na ba mvula makumi sambanu na tanu, bantu ya Efalayime ke vwanda dyaka ve.
9 Samaliya kele mbanza ya kintinu ya Efalayime,
mpe mwana ya Lemalya kele mfumu ya Samaliya.
Kana beno kele ve na kiminu, beno ke lenda ve.»
Nsangu ya mbutukulu ya Emanwele
10 Yave tubaka dyaka na ntinu Akaze mutindu yayi: 11 «Lomba na Yave Nzambi ya nge kidimbu mosi samu na nge, ya vwanda na kati ya kisika yina kele sunda na yinsi ya bafwa to na bisika ya kulutila kuzangama.» 12 Ntinu Akaze vutulaka: «Mu ke lomba kima ve, mu zola ve kusombola Yave.»
13 Mumbikudi Esaya tubaka mutindu yayi: «Beno kuwa, mulemvo ya beno, beno dikanda ya Davidi! Kulemba yina beno me lembisa bantu me lunga ve, samu ti beto lembisa mpe Nzambi ya munu? 14 Na yina, Yave yandi mosi ke pesa beno kidimbu, ndumba yina me zaba ntete ve babakala ke kuzwa kivumu, yandi ke buta mwana ya bakala ba ke bokila yandi Emanwele yina zola kutuba: “Nzambi ke na betoMat 1.23.” 15 Madya ya yandi ke vwanda ni miliki ya kilo na mafuta ya nyosi, tii ntangu yandi ke vwanda na lenda ya kumanga yimbi mpe kusoola mambu ya mbote. 16 Kasi, ntete ti mwana kumanga yimbi mpe kusoola mambu ya mbote, ntoto ya bantinu zole yina ke na kutalisa nge boma, yawu ke bikana kaka yawu mosi. 17 Yave ke sala ti mpasi kubwidila nge, na bantu ya nge, mpe na dikanda ya nge. Bilumbu ya mpasi yina me salamaka ntete ve katuka ntangu yina Efalayime kabukaka na Yuda. Ntinu ya Asili.»
18 Na kilumbu yina, kaka na mbala mosi,
Yave ke sika muyosi samu na kubokila banzinzi,
banzinzi yina kele na kizunga,
kisika yina maza ya Nile ya Ngipiti ke vukanaka na mubu,
mpe banyosi yina kele na yinsi ya Asili.
19 Bawu nyonso ke kwiza vwanda
na mabenga yina kele na matadi,
na mizumba, na mabulu ya bantadi,
na zulu ya bayinti nyonso ya fyoti,
na bisika nyonso yina kele na matiti ya kudikila bibulu.
20 Na kilumbu yina, Yave ke baka kisalulu yina ba ke zengilaka mandefo
kuna na lweka ya nkaka ya nzadi ya Efalate, ya kele ni ntinu ya Asili,
yandi ke zenga bansuki ya yintu,
bansuki ya makulu, mpe mandefo ya beno2Sa 10.4-5.
21 Na kilumbu yina,
konso muntu ke yundula ngombe mosi ya nkento
mpe bankombo zole ya nkento.
22 Miliki ke vwanda mingi,
bantu ke banda kunwaka miliki ya kilo.
Ya tsyelika, bayina nyonso ke bikana na yinsi
ke kudya miliki ya kilo na mafuta ya nyosi.
23 Na kilumbu yina,
bilanga yina kele na funda mosi (1 000) ya bayinti ya vinu,
na ntalu ya funda mosi (1 000) ya bisengo ya palata,
yawu ke bikana kaka yawu mosi
mpe mwa bayinti ya basende ke fuluka kuna.
24 Bantu ya mbingu ke kwiza
samu kufwa bibulu na minani mpe madyonga,
bwala nyonso ke fuluka na bayinti ya basende.
25 Samu na myongo yina ba vwandaka sadila bilanga na sengo,
bantu ke kwenda dyaka kuna ve,
samu ti bantu ke vwandaka na boma ya mwa bayinti ya basende:
Ba ke bika ti bangombe, mameme na bankombo kwenda dyata yawu.