8
Mwana ya mbikudi Esaya
1 Yave zabisaka na munu mutindu yayi: Baka dibaya mpe sonika bisono ya nene na kisengo mutindu yayi: «Mayele-Salale-Ase-Baze», yawu zola kutuba: «Na nswalu nyonso, ba botola bimvwama, na nswalu nyonso ba lokota bimvwama na manima ya kununga mvita!» 2 Mu lakisaka dibaya na bambangi zole, yina ke na ntima ya mbote: Nganga-Nzambi Uliya, mpe Zakali, mwana ya Belekya. 3 Mu vukisaka mfulu na mumbikudi ya kento, yandi kuzwaka kivumu mpe yandi butaka mwana ya bakala. Yave tubaka: «Pesa yandi nkumbu yayi: “Mayele-Salale-Ase-Baze”», yawu zola kutuba: «Na nswalu nyonso, botola bimvwama, na nswalu nyonso, lokota bimvwama na manima ya kununga mvita.» 4 Kasi, ntete mwana ya nge zaba kuzonza «tata» to «mama», ba ke nata bimvwama ya Damase mpe bima yina bantu ke kuzwaka na mvita na mantwala ya ntinu ya Asili.
Bantu ya Asili ke na kwiza mutindu nzadi ke dyamisa nyonso
5 Yave tubaka dyaka na munu mutindu yayi:
6 Bantu ya Yuda me vweza maza ya Silowe,
yina ke na kukulumuka malembe,
bawu me yangalala samu na ntinu Lesine,
mpe mwana ya Lemalya.
7 Ni yawu yina, Yave talisa bawu mpasi na kufulusa maza,
maza ya lulendo mpe ya nene ya nzadi ya Efalate.
Ya kele ni ntinu ya Asili mpe nkembo ya yandi nyonso.
Maza ya nzadi ya Efalate ke kuma mingi,
mpe yawu ke luta bandilu.
8 Yawu ke kombola Yuda,
yawu ke mwangana mpe ke dyamisa Yuda,
maza ke kuma tii na laka.
Ee! Emanwele ke tanda mapapu ya yandi,
mpe yawu ke fuluka na yinsi ya nge nyonso.
Nzambi kele na beto
9 Beno bantu, beno looka! Beno ke tala boma ya kulutila!
Beno nyonso, beno teka makutu,
beno bayina kele na bandilu ya ntoto!
Beno kubama na kunwana mvita,
beno ke tala boma ya kulutila!
Beno kubama na kunwana mvita,
beno ke tala boma ya kulutila!
10 Ata ti beno baka balukanu, yawu ke simba ve,
ata ti beno tuba mambu, yawu ke salama ve.
Samu ti Nzambi kele na beto.
Beto fwana kuzitisa Yave
11 Ni mutindu yayi Yave zonzilaka munu, ntangu diboko ya yandi simbaka munu, ntangu yandi lwengisaka munu, samu ti mu landa ve mavanga ya bantu yayi. 12 Beno bokila ve mfundu,
nyonso yina bantu yayi ke bokilaka mfundu,
beno vwanda na boma ve na yina ke talisaka bawu boma,
beno vwanda na boma ve.
13 Ni Yave Nzambi ya Binwani,
beno fwana kundima ti yandi kele longo,
ni yandi beno fwana kuzitisa,
beno fwana vwanda na boma ya yandi.
14 Yandi ke vwanda Yinzo ya longo,
yandi ke vwanda mpe ditadi ya kyadi,
ditadi ya nene yina ke bwisaka bantu,
samu na makanda zole ya bantu ya Isayeli,
yandi ke vwanda mpwasa mpe mutambu,
samu na bantu ya Yelusalemi.
15 Mingi ke bula mabaku,
bawu ke kubwa, bawu ke mwangana,
bawu ke kubwa na mutambu mpe ba ke simba bawu.
Mumbikudi dingamaka mpe yandi vwandaka vingila
16 Bumba mambu yayi, tula kinyemo na Musiku yayi na kati ya bilandi ya munu. 17 Kivuvu ya munu kele na Yave, yandi me pesa mukongo na dikanda ya Yakobi, mu ke kwikila kaka na yandi. 18 Munu mosi na bana yina Yave me pesa munu, beto kele bidimbu mpe bankebosolo na Isayeli, samu na Yave Nzambi ya Binwani, yandi yina ke zingaka na mongo ya Siyone.
19 Kana ba zabisa beno mutindu yayi: «Beno kwenda tala bantu yina ke bokilaka bampeve ya bantu ya kufwa, mpe bantu yina ke bikulaka mambu yina ke kwiza, bantu yina ke na kutuba na malembe mpe ke na kunyunguta. Bantu fwana kuyufula ve luzolo ya Nzambi ya bawu? Mpe bantu ya moyo bokila bantu ya kufwa samu na kwiza sadisa bawu?» 20 Beno vutula mutindu yayi: «Bantu kuvutuka na kusadila Musiku mpe mambu ya Nzambi, kana bantu kutuba ve mutindu yina, yawu zola kutuba ti nsemo ya suka-suka ke vwanda ve samu na bantu yayi.»
Kutambula na kati ya kitombe
21 Bawu ke lutila na yinsi na kati ya mpasi mpe na nsatu,
ntangu bawu ke vwanda na nsatu,
bawu ke dasuka mpe ke siinga ntinu na Nzambi ya bawu,
bawu ke talisa meso ya bawu na zulu.
22 Na manima bawu ke tala na ntoto:
«Ya ke vwanda kaka mpasi, kitombe, mpasi ya kulutila,
mpe kitombe ya kulutila.»
Mfumu ya kizunu
23 Kasi kitombe ke tatamana ve na kuyala,
awa na ntoto, kisika yina bantu ke na kutala mpasi ntangu yayi.
Kana na ntangu ya ntama,
kizunga ya Zabulone mpe ya Nefetali vwandaka na nsoni ya kulutila.
Kasi na bilumbu yina ke kwiza,
kizunga yina kele pene-pene na mubu, kuna na lweka ya nkaka ya nzadi ya Yolodani,
ke fuluka na nkemboMat 4.15-16; Lke 1.79.