14
Mvutukulu ya bayina kwendaka na bayinsi ya nzenza
1 Ee ya tsyelika, Yave ke lakisa luzolo ya yandi na bana ya Yakobi, yandi ke lakisa dyaka ti yandi soolaka Isayeli, yandi ke sala ti bantu ya yandi kupema na ntoto ya bawu mosi, banzenza ke vukana na bawu, mpe bawu ke vwanda kisika mosi na bana ya Yakobi.
2 Bantu ya nkaka ke kwiza baka bantu ya Isayeli samu na kuvutula bawu na yinsi ya bawu. Mvwilu ya bantu ya Isayeli ke vwanda ni ntoto ya Yave, mpe bantu yango ke kuma bisadi ya bakento mpe ya babakala samu na bantu ya Isayeli. Bayina bwilaka bantu ya Isayeli, bantu ya Isayeli mpe ke kumisa bawu bankole ya bawu, mpe bantu ya Isayeli ke yala bawu.
Nsukunu ya ntinu ya Babilone
3 Na yina, beno bantu ya Isayeli, kilumbu yina Yave ke pesa beno kizunu na manima ya kutala bampasi mpe bankwamusu, mpe na manima ya kuzinga na kati ya bundongo yina ba kotisaka beno, 4 beno ke yimbila kingana ya kitoko yayi samu na ntinu ya Babilone.
Beno ke tuba mutindu yayi:
«Wapi mutindu yayi? Yina vwandaka kwamisa beto ke dyaka ve!
Bamfyetokoso me manisa!»
5 Yave me zenga mukawa ya bantu ya yimbi,
yandi me manisa ngolo ya lutumu ya bayina ke yalaka,
6 muntu yina vwandaka bula
makanda ya bantu na nkele nyonso kondwa kupema,
mpe yandi vwandaka nyokola bantu ya bayinsi ya nkaka na lutumu ya yandi,
kasi ntangu yayi, ba ke landa yandi kondwa kupemisa yandi.
7 Ntoto nyonso ke na kupemaka mpe yawu kele na kati ya kizunu,
bantu ke na kuseka mpe kuyangalala.
8 Bayinti ya sipelese mpe bayinti ya sedele ya Libane ke na kuyangalala samu na kubwa yina nge me kubwa. Ba ke na kutuba:
«Katuka ntangu yina nge kubwaka,
ba ke na kuyuluka dyaka ve na zulu ya beto, samu na kuzenga beto.»
9 Kuna na yisi ya yinsi ya bafwa, ba ke na kuningana,
samu na kuyamba nge ntangu nge ke kuma kuna,
ba ke na kuvumbula bayina nyonso kufwaka,
bayina nyonso vwandaka bantwadisi awa na ntoto,
yandi ke telemisa bantinu nyonso ya bayinsi na bakiti ya bawu ya kintinu samu na nge.
10 Bantu nyonso ke na kutuba na nge mutindu yayi:
«Nge mpe, nge ke dyaka ve na ngolo mutindu beto?
Nge mpe me kuma mutindu beto?»
11 Ba me kulula lunangu ya nge na yinsi ya bafwa,
na muningu ya nsambi.
Kisika nge me lalila, ya kele na minsyobo mpe bima ya kubola.
12 Wapi mutindu nge me kubwa katuka na zulu tii na yisi?
Nge mbwetete yina ke lezimaka, mwana ya suka-suka!
Wapi mutindu nge me kubwa na ntoto,
nge yina nungaka bayinsi ya bantu!
13 Nge vwandaka tuba na yisi ya ntima mutindu yayi:
«Mu ke yuluka tii na dizulu,
mu ke tula kiti ya munu ya kintinu na zulu ya bambwetete ya Nzambi,
mu ke vwanda na zulu ya mongo ya mbwabanu,
kuna na nsuka ya node.
14 Mu ke yuluka na zulu ya matuti,
mu ke vwanda mutindu mosi na Nzambi ya Kulutila Kuzangama.»
15 Kasi ba me kulula nge tii na yinsi ya bafwa,
ba me kulula nge na yisi ya dibulu.
16 Bayina ke na kutala nge, ke na kusikikaka meso ya bawu na nge.
Bawu ke na kutala nge na nkebolo nyonso,
bawu ke na kutuba: «Yayi ni muntu yina vwandaka ningisa ntoto?
Yayi ni muntu yina vwandaka tekitisa bayinsi ya bintinu?
17 Ni yandi vwandaka mwangisa yinza mpe vwandaka kitula yawu na yinsi ya kuyuma?
Ni yandi vwandaka mwangisa bambanza
mpe vwandaka bika ve bankole?»
18 Ya tsyelika, bantinu nyonso ya bayinsi ata kukatula mosi,
bawu nyonso na nkembo ya bawu, bawu kele ya kulala muntu-muntu na kati ya ndyamu ya yandi.
19 Kasi nge, ba me losa nge ntama ya mpyema ya nge
mutindu kintala ya nganzi,
mutindu mvumbi ya muntu ba me kufwa na mbele ya mvita
mpe yina ba me losa na kati ya dibulu ya matadi,
kisika yina bantu ke dyatata bamvumbi.
20 Nge ke vukana ve na bampangi ya nge na mpyema,
samu ti nge mwangisaka yinsi ya nge.
Nge kufwaka bantu ya nge.
Ba ke tanguna dyaka ve dikanda ya bantu ya yimbi ya mankululu.
21 Beno kubama na kumanisa na kufwa bana
samu na yimbi yina batata ya bawu salaka!
Bika ti bawu kuzwa ve ntangu ya kubaka bantoto
samu na kufulusa yinza na mavanga ya bawu ya yimbi.
22 Yave Nzambi ya binwani ke na kutuba: «Mu ke katula nkumbu ya Babilone mpe bantu ya bawu yina ke bikana moyo, bana ya bawu mpe bana ya bana ya bawu. Ni Yave me tuba yawu. 23 Mu ke sala ti yawu kukuma bayinzo ya bangumba mpe dyanga, mu ke kombola bawu na kikombolo ya mwangusulu. Ni munu Yave Nzambi ya Binwani me tuba yawu.»
Yave ke mwangisa yinsi ya Asili
24 Yave Nzambi ya binwani me kudya ndefi mutindu yayi:
«Ya tsyelika, yina mu kanisaka na kusala, yawu ke salama.
Yina mu kubikaka, ni yawu ke talana.
25 Ee! Mu ke kufwa mu-Asili na yinsi ya yandi,
mu ke dyatila yandi na zulu ya myongo ya munu,
kizitu yina yandi tulaka bantu ya munu, yawu ke katuka,
mufuna yina kele na zulu ya mapeka, yawu ke katuka.»
26 Yina ni lukanu yina Yave me baka samu na ntoto nyonso.
Yina ni bankebosolo samu na bayinsi nyonso.
27 Ntangu Yave Nzambi ya Binwani me baka lukanu yimeni,
nani lenda sala ti yawu kusalama ve?
Ntangu yandi me lambula yimeni diboko ya yandi,
nani lenda sala ti yandi kuvutula yawu?
Ba ke na kukebisa ba-Filiseti
28 Mambu yina ba zonzaka na mvula yina kufwaka ntinu Akaze ni yayi:
29 Beno kuyangalala ve beno bantu ya yinsi nyonso ya ba-Filiseti,
beno kuyangalala ve samu ti yinti yina vwandaka bula beno me zengana!
Samu ti ni na mvumbi ya nyoka ke basikilaka mpidi,
mpe mwana ya yawu yina ke butukaka, ke vwandaka nyoka yina ke dumukaka.
30 Na yina bana, ya ntete ya bantu ya mpamba ke banda na kuyundula bibulu,
mpe bamputu ke banda na kulala na lukengolo nyonso,
kasi mu ke fwisa bantu ya beno nsatu,
mpe bayina ke bikana na manima ya nge ke manisa na kufwa.
31 Myelo, beno yawula!
Nge mbanza, looka na ngolo!
Yinsi nyonso ya ba-Filiseti ke na kubwa!
Samu ti mulinga ke na kukatuka na node,
na sika ya mbeni mpe ata muntu me kondwa na kati ya mulonga.
32 Wapi mvutu beno ke vutula na bayina me fidisa bantu yayi?
Ya kele ni Yave yandi mosi muntu yidikaka Siyone,
bantu ya kukuluka ya dikanda ya bantu ya yandi ke banda na kwenda bumbama kuna.