13
Nsukunu ya Babilone
1 Mambu yina talaka Esaya mwana ya Amose na yina me tadila nsembolo ya Babilone ni yayiYel 50–51; Luz 17–18:
2 «Na zulu ya mongo yina ke na kima ve, beno telemisa kidimbu ya yinsi,
beno looka na sika ya myongo yango,
beno lambula yawu maboko,
bika ti ba kota na myelo ya bamfumu!
3 Mu me pesa bantumunu na bayina ba byekaka samu na munu,
mu me bokila mpe binwani ya munu ya ngolo
yina ke salaka nkembo ya munu,
samu ti bawu kulakisa wapi mutindu kele nkele ya munu.»
4 Beno kuwa makelele yina ke na kuwakana na zulu ya myongo
yawu kele mutindu makelele ya nkonga ya bantu.
Beno kuwa makelele ya bayinsi ya bintinu ya kuvukana.
Yave Nzambi ya binwani ke na kuluta, samu na kutala mbote-mbote binwani,
samu na kukwenda na mvita.
5 Bawu me katuka na yinsi mosi ya ntama,
na balweka nyonso,
Yave mpe binwanunu ya nkele ya yandi
ke kotisa yinsi nyonso na kati ya bidilu.
6 Beno yawula samu ti Kilumbu ya Yave me kuma pene-pene,
Yawu ke na kwiza mutindu kitembo ya ngolo,
yina me katuka na sika ya Nzambi-Mpungu.
7 Ni yawu yina, maboko ya bawu nyonso ke lemba
mpe bantima ya konso muntu ke sulumuka.
8 Bawu ke fuluka na boma mingi,
binama nyonso ke sala bawu mpasi mpe ke kangama,
bawu ke tengimisa banzutu mutindu kento ke na misongo,
bawu ke talasana bawu na bawu na kuyituka nyonso,
bizizi ya bawu ke vimba na boma.
9 Beno tala, Kilumbu ya Yave ke na kukwiza,
ya kele kilumbu mosi ya nsisi,
kilumbu ya nkele mpe ya myangu,
kilumbu yina ke kitula ntoto na kisika ya kumwangana,
yawu ke manisa na kuzimbisa misumuki.
10 Samu ti bambwetete kuna na zulu mpe bima ya nkaka yina ke lezimaka na zulu,
ke pesa dyaka ve nsemo ya yawu,
ntangu ke kuma ndombe kaka na ntangu yina yawu me basika,
ngonda mpe ke pesa dyaka ve nsemo ya yawu.
11 Yave ke na kutuba:
«Mu ke pesa bantu ya yinza kitumbu samu na yimbi ya bawu,
mu ke pesa bantu ya yimbi kitumbu samu na masumu ya bawu,
mu ke manisa lunangu ya bantu yina ke yinaka bampangi,
mpe mu ke zimbisa lunangu ya bantu yina ke salaka mambu nyonso na ngolo.
12 Mu ke sala ti bantu kukuma mpasi na kutala, mutindu wolo ya mbote,
mu ke sala ti bawu kukuma mpasi na kutala, mutindu wolo ya Ofile.1Bt 9.28»
13 Ni yawu yina, mu ke ningisa dizulu,
ntoto ke ningana na lufulu ya yawu,
na nkele ya munu Yave Nzambi ya Binwani,
na kilumbu yina ya nkele ya munu ya kulutila.
14 Na kilumbu yina,
bantu ke kuma mutindu bansyesye yina ba ke na kulandaka mbangu,
to mameme yina ke dyaka na muvungi ve,
konso muntu ke na lweka ya bantu ya yandi,
konso muntu ke na kukima na yinsi ya yandi.
15 Bayina nyonso ba ke simba ba ke tobola bawu na dyonga,
mpe bayina ba ke bwila ke kufwa na mbele ya mvita.
16 Bana ya bawu, ba ke nika bawu na meso ya bawu,
ba ke laba bima nyonso ya bayinzo ya bawu,
ba ke vukisa mfulu na ngolo na bakento ya bawu.
17 «Mu ke fidisa bawu ba-Mede mutindu bambeni,
ba-Medi yina ke zolaka ve palata,
mpe ke yinaka wolo.
18 Madyonga ya bawu ke kufwa bantwenya,
ba ke tala ve kyadi ya bana yina ke ntete na kunwa mabene,
bawu ke tala ve bana ya fyoti kyadi.»
19 Na yina, Babilone yinsi ya kintinu ya kulutila kitoko,
kitoko yina bantu ya Kalede ke sadilaka lunangu,
yawu ke kuzwa kitumbu ya mutindu yina Nzambi pesaka na Sodome mpe Ngomole.
20 Ata muntu ve ke zinga dyaka kuna,
ya ke vwanda dyaka ve na bantu kuna, bambandu na bambandu.
Mu-Alabe ke sala ve bayinzo ya bawu ya balele kuna,
mivungi mpe ke lalisa ve bibulu ya bawu kuna.
21 Kasi ni banyawu ya mfinda ke sala bayinzo ya bawu kuna,
dikuti ke fuluka na bayinzo ya bawu,
ba-otelise ke zinga kuna
mpe bankombo ya mbakala ke bina kuna.
22 Kimbungu ke looka na mifwidi
bambulu ke looka na bayinzo ya kitoko.
Ntangu me kuma pene-pene,
Babilone ke dyaka ve na luzingu ya yinda.