19
Nsembolo ya yinsi ya Ngipiti
1 Nsembolo ya yinsi ya Ngipiti ni yayi:
Yave me yuluka na zulu ya dituti yina ke kwendaka mbangu,
yandi ke na kukwiza na yinsi ya Ngipiti,
ntangu yandi ke na kubelama,
banzambi ya Ngipiti ke na kutekita,
mpe bantu ya Ngipiti ke na kumanisa ngoloYel 46.2-26; Eze 29–32.
2 «Mu ke sala ti bantu ya Ngipiti kunwana bawu na bawu,
konso muntu ke nwanisa mpangi ya yandi, konso muntu ke nwanisa ndiku ya yandi,
bantu ya mbanza ke nwanisa bantu ya mbanza ya nkaka, bantu ya yinsi ya kintinu ke nwana na bantu ya yinsi ya nkaka ya kintinu.
3 Bantu ya Ngipiti ke lemba mingi,
mpe mu ke bebisa nyonso yina bawu kanisaka na kusala,
bawu ke kwenda na sika ya banzambi ya luvunu mpe bampeve ya bantu ya kufwa,
bantu yina ke bokilaka bampeve ya bantu ya kufwa, mpe bantu yina ke bikulaka mambu yina ke kwiza.
4 Mu ke yekula bantu ya yinsi ya Ngipiti na maboko ya bamfumu yina ke talaka ve bantu kyadi,
ntinu mosi ya lulendo ke yala bawu.»
Ni Yave Mfumu me tuba yawu,
Yave Nzambi ya Binwani me zonza.
5 Maza ya nzadi ya Nile ke kawuka,
nzadi nyonso ke manisa na kuyuma.
6 Banzadi ke kuma na sunga ya yimbi,
bamwila yina ke kubwaka na nzadi ya Nile, yawu ke yuma,
batwandu na matiti yina ya nkaka yina ke menaka na kati ya maza, yawu ke beba.
7 Na kumu ya yinda nyonso ya nzadi ya Nile,
kisika yina nzadi ke bwabanaka na mubu,
bilanga nyonso yina ba kundaka kuna,
bilanga yina ke kuzwaka maza ya nzadi ya Nile, yawu ke yuma,
yawu ke zimbana mpe ata kima ke bikana.
8 Milobi-mbisi ke kwama,
bayina nyonso ke losaka bandoba na kati ya nzadi ya Nile, bawu ke yawula,
bayina ke yalumunaka bampwasa na zulu ya maza ke vwanda na kyadi.
9 Bayina ke sadilaka na lino ke yobila nsoni,
bayina ke bongisaka lino, mpe bayina ke yidikaka yawu, bizizi ya bawu nyonso ke soba samu na manyongo.
10 Yina ke simbaka yinsi ke mwangana,
bayina nyonso ke salaka mpe ke kuzwaka difuta, bawu ke nyonga.
11 Bamfumu ya mbanza Sowane me kuma mutindu bizengi.
Bantu ya ndwenga yina ke pesaka ntinu ya Ngipiti malongi,
bawu me kuma mutindu kimvuka ya bizoba.
Wapi mutindu beno lenda tuba na ntinu ya Ngipiti ti:
«Beto kele bana ya bantu ya ndwenga, bana ya bantinu ya ntangu ya ntama?»
12 Wapi bawu, bantu ya nge ya ndwenga,
bipesi-malongi ya nge, wapi bawu?
Bika ti bawu kuzabisa nge nyonso,
bawu kuzabisa nge yinki Yave Nzambi ya Binwani,
me kubika na kusala ya yimbi samu na yinsi ya Ngipiti!
13 Bamfumu ya mbanza Sowane kele bilawu,
bamfumu nyonso ya mbanza Memfi ke na kuzaba dyaka ve yinki ya kusala,
bamfumu ya bifumba ya bawu ke na kunata bantu ya Ngipiti na nzila ya yimbi.
14 Yave me bulumuna mpeve mosi ya kizungu-zungu na kati ya bantu ya yinsi ya Ngipiti,
yandi me zimbisa bawu nzila na nyonso yina bawu ke na kusala,
bawu me kuma mutindu muntu me kola malafu mpe me kubwa na zulu ya bilusi ya yandi.
15 Na yina, bantu ya yinsi ya Ngipiti ke sala dyaka ata kima ve, bawu nyonso ke lenda dyaka ve na kusala ata kima, ya vwanda yintu, mpe mukila, ya vwanda diba mpe kintala.
Ngipiti ya mbasi
16 Na kilumbu yina, bantu ya yinsi ya Ngipiti ke kuma mutindu bakento. Bawu ke tekita mpe ke vwanda na boma, ntangu Yave Nzambi ya Binwani ke ningisila bawu diboko ya yandi. 17 Ntoto ya bantu ya Yuda ke talisa bantu ya Ngipiti boma. Konso ntangu yina ba ke banda na kutangunaka nkumbu ya ntoto ya Yuda, bantu ya Ngipiti ke tala boma, samu na mambu yina Yave Nzambi ya Binwani ke kubika samu na bantu ya Ngipiti.
18 Na kilumbu yina, ya ke vwanda kuna na yinsi ya Ngipiti, bambanza tanu kisika ba ke banda na kuzonzaka ndinga ya ba-Ebeleyo. Ba ke banda na kudyaka bandefi na Nkumbu ya Yave Nzambi ya Binwani. Mosi na bambanza yango ba ke bokila yawu Mbanza ya NtanguYel 44.1; Esa 45.23.
19 Na kilumbu yina, kuna na kati-kati ya yinsi ya Ngipiti, ya ke vwanda na kiyokolo mosi ya minkayulu samu na Yave. Pene-pene ya ndilu ya yinsi, ya ke vwanda na ditadi yina ke vwanda ya kutelama mutindu kidimbu samu na Yave. 20 Samu na Yave Nzambi ya Binwani, ya ke vwanda kidimbu mpe kimbangi na bantu ya Ngipiti. Ntangu ba ke kwamisa bawu, kana bawu kulooka na sika ya Yave, yandi ke fidisa bawu muvuukisi mpe yandi ke nwanina bawu, samu na kukuula bawu. 21 Yave ke sala ti bantu ya Ngipiti kuzaba yandi, mpe na kilumbu yina, bantu ya Ngipiti ke zaba Yave. Bawu ke sadila yandi na kupesaka yandi minkayulu mpe makabu. Bawu ke sadila Yave bansilulu mpe bawu ke lungisa yawu. 22 Yave ke bula bantu ya Ngipiti, yandi ke bula bawu, kasi yandi ke belusa bawu. Bawu ke vutuka na sika ya Yave. Yave ke wila bawu mpe yandi ke nyakisa bawu.
23 Na kilumbu yina, ya ke vwanda na nzila yina ke katuka na yinsi ya Ngipiti tii na Asili. Bantu ya Asili ke banda na kukwendaka na Ngipiti mpe bantu ya Ngipiti ke banda na kukwendaka na Asili. Bantu ya Ngipiti ke sadila Yave kintwadi na bantu ya Asili.
24 Na kilumbu yina, kintwadi na yinsi ya Ngipiti mpe ya Asili, yinsi ya tatu ke vwanda ni Isayeli. Bayinsi yayi ke vwanda lusakumunu ya ntoto nyonso. 25 Yave Nzambi ya Binwani ke sakumuna yawu na kutuba: «Mu me sakumuna Ngipiti bantu ya munu, Asili yina mu yidikaka na maboko ya munu mpe Isayeli mvwilu ya munu!»