29
Yelusalemi, ba me zunga yawu na bambeni mpe ba me kuula yawu
1 Kyadi na Alyele, Alyele,
mbanza yina ntinu Davidi me kwiza tula kivwandu ya yandi!
Beno lenda zitisa mikembo nyonso, mvula na mvula.
2 Kasi mu ke mwangisa nge, Alyele. Nge ke nyonga mingi mpe kudila, mpe nge ke vwanda samu na munu mutindu kiyokolo ya minkayulu.
3 Mu ke tula kivwandu ya munu na balweka ya nge nyonso,
mu ke zunga nge na bima yina ba ke sadilaka samu na kuzunga mbanza,
mu ke tunga bayinzo ya mitela ya yinda samu na kunwanisa nge.
4 Ba ke kulula nge, ndinga ya nge ke basikila na yisi ya ntoto,
mambu ya nge ke vwanda na yisi ya fundu-fundu, ndinga ya nge ke basikila na yisi ya ntoto,
ndinga ya ke basika na yisi ya ntoto mutindu mambu ya mpeve,
yina ke kunyunguta na fundu-fundu.
5 Nkonga ya bambeni mingi ya nge ke fwanana na dituti ya fundu-fundu,
nkonga ya binwani mingi ke dyata nge mutindu dititi yina mupepe me nata.
Kaka na mbala mosi,
6 Yave Mfumu ya Binwani me sala,
na nzila ya kidumu, mpe na kuningisa ntoto,
na makelele ya ngolo, na mupepe ya ngolo mpe mvula,
na tiya yina ke mwangisaka.
7 Nkonga ya bantu mingi yina ke na kunwanisa nge, Alyele, ke zimbana mutindu ndosi.
Ba yina nyonso ke na kutunga bibaka na balweka nyonso ya nge samu na kunwanisa nge,
mpe ke na kufyetikisa nge, ba ke zimbana,
mutindu lumoni na mpimpa.
8 Muntu ke na nsatu ke lota ndosi ti yandi ke na kudya,
na ntangu yandi ke vumbuka, kivumu kele mpamba,
muntu kele na mpwina ke lota ndosi ti yandi ke na kunwa maza,
na ntangu yandi ke vumbuka, yandi ke ya kulemba, mpe laka ya kuyuma,
ya ke vwanda mutindu mosi na nkonga mingi ya yinsi,
yina ke kwiza nwanisa mongo ya Siyone.
Bumpofo mpe kukola malafu
9 Beno yituka mpe kuzonza dyambu ve!
Beno kanga meso mpe beno kuma bampofo!
Beno kola, kondwa kunwa vinu!
Beno tambula tengu-tengu kondwa kunwa malafu!
10 Yave me lalisa beno pongi mosi ya ngolo,
yandi me sala ti mimbikudi ya beno kutala ve,
yandi me tula lele na kizizi ya bayina ke talaka mambu.
11 Lumoni yayi kele samu na beno mutindu bampova ya dibuku ya kukangama ba ke pesa na muntu yina zaba kutanga ba ke tuba na yandi: «Mulemvo ya nge, tanga yawu», kasi yandi ke vutula: «Mu lenda ve, dibuku kele ya kukangama». 12 Mpe ba ke pesa dibuku na muntu yina zaba kutanga ve na kutuba: «Mulemvo ya nge, tanga yawu», kasi yandi ke vutula: «Mu zaba kutanga ve».
Mambu yina ke yitukisaka me manisa ve
13 Yave ke na kutuba: Ntangu bantu yayi ke belamaka na munu,
bawu ke na kuzitisa munu na yinwa mpe na bikoba ya bawu,
kasi bantima ya bawu kele ntama na munu,
mpe buzitu yina bawu ke na yawu samu na munu,
yawu kele kaka ntumunu yina bantu me longisaMat 15.8-9; Mke 7.6-7.
14 Ni yawu yina, mu ke tatamana na kuyitukisa bantu yayi,
na mavanga yina ke yitukisaka.
Ata ndwenga ya bawu, bantu ya ndwenga ke bakula kima ve,
ata mayela ya bawu, bantu yayi ya mayela ke lenda kubangula kima ve.
Nani beno ke na kubakila Nzambi?
15 Kyadi samu na bantu yayi ke na kusala na mansweki na kubumba manaka ya bawu na Yave!
Ba ke kubika bisalu ya bawu na kitombe.
Ba ke tuba: «Nani lenda tala beto? Nani me zaba yina beto ke na kusala?»
16 Na kutala mbote, beno ke na kukivuna na nyonso!
Ba lenda fwanikisa kisadi-bambinda mutindu mosi na ntoto ya kulamba?
Kima lenda tuba na muntu yina me yidika yawu:
Ni yandi ve yidikaka munu?
Diyuki lenda tuba na kisadi-bambinda:
Yandi kele na mayela ve?
Mbalukulu ya nene ya mambu
17 Na ntangu fyoti,
mfinda ya Libane ke kuma bilanga ya bayinti ya bambuma,
mpe bilanga ya yinti ya bambuma ke kuma mutindu mfinda?
18 Kilumbu yina bantu ya makutu ya kufwa ke kuwa mambu yina kele na dibuku,
bampofo ke basika na mpimpa ya kitombe
mpe meso ya bawu ke tala.
19 Bantu ya mpasi ke vwanda na nsayi ya kulutila samu na Yave,
bayina kele na bumputu ya kulutila
ke bina na nsayi samu na Nzambi ya Longo ya Isayeli.
20 Ya ke vwanda nsukunu ya bamfumu ya yimbi, mpe lunangu ya bawu ke manisa.
Ba ke vwanda dyaka ve, bayina vwandaka sosa kusala yimbi na ba ya nkaka,
21 bayina ke vuninaka bantu mambu,
bayina ke tambila bazuzi mitambu na bisika ya lufundusu,
bayina ke kangisaka muntu yina me sala ya yandi ata dyambu.
22 Ni yawu yina, Yave,
yandi yina kuulaka Abalayami,
ke na kutuba na dikanda ya Yakobi mutindu yayi:
«Ntangu yayi, bantu ya Yakobi ke tala dyaka ve nsoni,
kizizi ya yandi ke vwanda dyaka ve ya kyadi.
23 Bawu na bana ya bawu ke tala,
yina mu ke sala na kati ya bawu,
ba ke zaba nani mu kele,
munu Nzambi ya Longo ya Yakobi,
ba ke vwanda na boma ya kusala ti mu dasuka,
munu Nzambi ya Isayeli.
24 Bayina vwandaka zenga mambu ya bantu
na mutindu ya yimbi ke bakula,
bayina vwanda tonga ke ndima ti ba lwengisa bawu.»