30
Mutindu ya kutwadisa yina Yave ke zolaka ve
1 Yave ke na kutuba:
Kyadi na bana yina ke balukilaka munu!
Bawu ke kubikaka mambu yina kele ve na ndandu,
bawu ke salaka bangwisani yina mpeve me twadisa ve.
Ni mutindu yina bawu ke bwelaka disumu na zulu ya disumu!
2 Bawu ke kwendaka na Ngipiti ata kuyufula ntete munu,
samu na kuvwanda na lukengolo ya mbote na sika ya Falawo ntinu ya Ngipiti,
mpe samu na kusosa kiswamunu na mpewo na yinsi ya Ngipiti.
3 Kiswamunu ya Falawo ke kuma nsoni ya beno,
mpewo yina beno ke kwendaka sosa na Ngipiti,
yawu ke sala ti beno kuwombisa nkembo ya beno.
4 Bamfumu yina ke salaka na yandi kumaka yimeni na Sowane,
bantumwa ya beno me kuma na mbanza Anese.
5 Bawu nyonso ke kuma na nsoni samu na bantu yayi:
ba ke sadisa ve bawu,
ba ke pesa ve bawu maboko,
ba ke vwanda ve mfunu samu na bawu,
kasi ba ke vwanda dyambu ya nsoni mpe ba ke vweza bawu.
Bayina ke sumba lusalusu na Ngipiti
6 Mambu yina me tadila nsembolo ya bibulu ya Nengeve ni yayi:
Na kizunga ya kyadi mpe ya manyongo,
yinsi ya nkosi ya nkento na ya mbakala,
yinsi ya mpidi na ya nyoka yina ke dumukaka,
bawu ke na kunata bimvwama ya bawu na zulu ya mukongo ya bambuluku,
bawu ke na kunata bamvwilu ya bawu na zulu ya bankunki ya basamo,
samu na kwenda pesa yawu na bantu yina ke vwanda ata mfunu ve samu na bawu.
7 Lusalusu yina ke katukaka na Ngipiti,
yawu kele kaka ya mpamba, yawu kele mutindu mupepe.
Ni yawu yina, mu me bokila nge na nkumbu «Layabe ke na kupema»
Dikanda ya bantu yina zola ve kuwa
8 Yave tubaka na Esaya mutindu yayi:
Ntangu yayi kwiza, sonika yawu,
na zulu ya ditadi na mantwala ya bawu,
sonika yawu na kati ya dibuku,
na bilumbu yina ke kwiza,
yawu ke vwanda mbangi ya bantangu nyonso.
9 Samu ti ba kele bantu mosi ke tumamaka ve,
ba kele bana ya yintu ngolo,
yina ke zolaka ve na kusadila Musiku ya Yave.
10 Bawu ke tubaka na mimbikudi mutindu yayi: «Beno bika kwandi na kubikula!»
Bawu ke tubaka na bantu yina ke kuzwaka balumoni ti: «Beno bika na kuzabisaka beto balumoni ya tsyelika!
Beno zabisa beto mambu ya mbote,
beno zabisa beto mambu yina ke yangidika beto,
ata ti yawu kele ya luvunu,
11 beno bika nzila na nzila ya mbote,
beno katuka na nzila ya kusungama,
beno katula Nzambi ya longo ya Isayeli na mantwala ya beto!»
Kubwa mosi ya yimbi mingi
12 Ni yawu yina, Nzambi ya longo ya Isayeli ke na kutuba:
«Mutindu beno ke na kusafula nkembosolo yayi,
beno ke na kutula kivuuvu ya beno na bayina ke vunaka,
beno ke na kutula kivuvu ya beno na bayina ke nyokolaka,
mpe beno me tulaka ntima ya beno na yawu,
13 yimbi yina beno me sala ke vwanda samu na beno,
mutindu dibulu na kati ya kibaka ya kuzanguka,
yawu ke sala makelele mpe na mpamukunu, yawu ke kubwa.
14 Ba ke pasula yawu mutindu ba ke pasulaka mbinda ya kisadi-bambinda,
ba ke mwangisa yawu mpe ba ke katula yawu ve,
ntangu yawu ke mwangana, yawu ke bika ata kima ve,
samu na kutula makala ya tiya,
to samu na kuteka maza na yawu.»
Beno dingama mpe beno tula kivuuvu ya beno na munu
15 Yave Mfumu, Nzambi ya Longo ya Isayeli ke na kutuba mutindu yayi:
Beno vutuka na sika ya munu, mpe beno dingama, na yina beno ke vuuka,
ni na kati ya kizunu mpe kudingama ke vwanda ngolo ya beno.
Kasi beno zolaka ve ti ya vwandila mutindu yina!
16 Beno tubaka: «Beto ke kima mutindu bampunda.»
Ya tsyelika, beno ke kima, beno ke tuba:
«Beto ke kima mutindu bampunda yina ke na mbangu ya kulutila.»
Ni yawu yina, bayina ke landa beno ke lutila beno mbangu.
17 Mbeni kaka mosi ke kimisa funda mosi (1 000) ya bantu,
beno ke kima ntangu kaka bantu tanu ke sosa na kunwanisa beno,
tii ntangu beno ke kuma kaka
mutindu dikunzi, yina kele ya kutelama na nsongi ya mongo,
mutindu kidimbu ya yinsi na zulu ya mongo ya fyoti.
Ntangu ya mpulusu
18 Na yina, Yave ke na kuvingila beno samu na kutala beno kyadi,
ni yawu yina yandi ke telama samu na kutala beno kyadi.
Ya tsyelika, Yave kele Nzambi ya kudedama,
kyese na bayina nyonso ke tulaka kivuvu na yandi!
19 Beno bantu ya Siyone yina ke zingaka na Yelusalemi,
beno ke dila dyaka ve!
Samu ti ntangu beno ke looka na sika ya Nzambi,
yandi ke lakisa beno bumbote ya yandi,
ntangu yandi ke kuwa beno, yandi ke pesa beno mvutu.
20 Na ntangu ya mpasi, Mfumu ke pesa beno madya,
na ntangu ya bankwamusu, yandi ke pesa beno maza ya kunwa,
Mulongisi ya nge ke vwanda dyaka ve ntama na nge,
nge ke tala Mulongisi ya nge na meso ya nge.
21 Na yina, na manima ya beno, makutu ya beno ke kuwa ndinga ke tuba mutindu yayi:
«Beno tala, nzila yawu yayi, beno landa yawu,
kana yawu nata beno na lubakala, ni na lubakala,
kana na lumoso, ni na lumoso.»
22 Palata yina ba me pakula biteki ya beno, beno ke tala yawu mutindu kima ya kuvedila ve,
mpe wolo yina ba me namika na biteki yina ba yidikaka na bisengo ya kusulumuka,
nge ke losa yawu mutindu kinkuti ya mvindu,
beno ke tuba: «Katuka awa!»
23 Na yina, Nzambi ke nokisa mvula,
samu na kubutisa bambuma yina beno ke kunda,
madya yina ntoto ya beno ke pesa,
yawu ke vwanda ya mbote mpe ya kitoko,
na kilumbu yina, bibulu ya beno ke kuzwa bisika ya nene ya kudya.
24 Bangombe na bambuluku yina beno ke sadila na kubalula ntoto,
yawu ke kudya matiti ya mbote yina kele na mungwa,
matiti yina ba ke lenda na kubaka na musoma mpe na pele.
25 Na kilumbu ya mvita ya nene,
kilumbu yina bayinzo ya mitela ya yinda ke kubwa,
zulu ya myongo nyonso ya kuzangama mingi,
mpe zulu ya konso mongo ya fyoti,
ya ke vwanda na mizumba yina ke lutilaka maza na bamwila.
26 Nsemo ya ngonda ke lezima mutindu nsemo ya ntangu,
mpe nsemo ya ntangu ke lutila bambala nsambwadi nsemo ya ngonda,
nsemo ya ntangu ya kilumbu mosi ke vwanda mutindu nsemo ya ntangu ya bilumbu nsambwadi,
kilumbu yina Yave ke sadisa bantu ya yandi,
yandi ke nyakisa bamputa ya bawu me kuzwa.
Nzambi ke pesa kitumbu na bantu ya Asili
27 Nkumbu ya Yave me katuka ntama,
nkele ya yandi kele ya kulutila,
yawu ke nikaka,
bikoba ya yandi kele ya kufuluka na nkele,
ludimi ya yandi kele mutindu tiya yina ke yokaka.
28 Mpeve ya yandi kele mutindu muzumba yina maza ya yawu ke lutaka na ngolo
mpe ke kumaka tii na laka,
yawu ke kotisaka bayinsi na kati ya bampasi,
yandi ke tulaka singa na yinwa ya bantu ya bayinsi,
mutindu mpunda samu na kuzimbisa bawu nzila.
29 Kasi beno ke yimbila, mutindu na mpimpa ya mukembo, beno ke yangalala, mutindu bantu ke na kutambula na muningu ya dituutu, samu na kukwenda na mongo ya Yave, pene-pene ya Ntadi ya Isayeli.
30 Yave ke wakisa ndinga ya yandi ya ngolo,
yandi ke lakisa diboko ya yandi yina me kubama,
na kupesa kitumbu na kati ya nkele ya yandi
mpe na kati ya tiya ya yandi ya nene yina ke yokaka,
na kati ya mvula ya nene mpe ya matadi.
31 Samu na ndinga ya Yave,
ntinu ya Asili ke tekita na boma,
ntangu Yave ke bula yandi na mukawa ya yandi.
32 Na konso kubula yina Yave ke bula yandi, samu na kusemba yandi, ba ke sika bangoma ya fyoti mpe bansambi, Yave yandi mosi ke nwanisa yandi na diboko ya yandi.
33 Katuka ntama ba kubikaka tiya,
yawu kele ya kukubama samu na ntinu,
yawu kele ya kusunda mpe yawu kele ya nene,
tiya mpe bakuni kele ya mingi-mingi,
mpeve ya Yave ke yoka mutindu muzumba ya sufe.